Англия премьер-лигаси етакчи клубларидан бири - «Манчестер Сити» кўпчиликнинг тахминига терс ўлароқ, «Барселона»га етарлича қаршилик кўрсатолмади - 0:2. Ваҳоланки, ЧЛ доирасидаги ўйиндан аввал «шаҳарликлар» устози Мануэль Пеллегринининг кўп йиллар Испанияда ишлагани, «Барса»ни яхши билишию, уни тўхтатиб қолишга қодир футболчиларга раҳнамолик қилаётгани айтилганди.
- Аввало, Англиядаги таассуротларингиз билан ўртоқлашсангиз...
- Фақат ижобий фикрлар айтишим мумкин. Дарҳақиқат, АПЛга кўчиб ўтганим ва «Манчестер Сити»да иш бошлаганим фаолиятимдаги муҳим қадамдир. Гап жаҳоннинг энг яхши лигаси ҳақида кетяпти: АПЛ жамоалар савияси бўйича ҳам, мавқеи жиҳатидан ҳам, ўйинларнинг томошабоплиги бобида ҳам 1-ўринда! Мухлисларга тўла трибуналар фикримга асос. Қолаверса, клублар харидлар учун маблағ ажратиш бобида ҳам олдиндалар. Буларнинг барчаси кишини ҳар кунлик ишга имкон қадар жиддийроқ ёндашишга ундайди. Албатта, ўзинг учун янги лигада иш бошлаш анча қийин. Зеро, мен премьер-лигани ташқи томондан билардим, холос. Умуман, бу ердаги футбол инфратузилмаси бошқа лигадагилардан анча фарқланади. Нима деяётганимни яхши биламан, чунончи, Англия мен ишлаётган 5-мамлакат ҳисобланади. Ҳозирча ишонч билан айтишим мумкин: кўрганларим кутганимдан зиёда бўляпти.
- АПЛнинг айнан қайси жиҳати сизни кўпроқ ҳайратга соляпти?
- Жамоаларнинг рақобатдошлиги ва охиригача, бутун 90 дақиқа кураш кечиши. Агарда бошқа лигаларда бирор жамоа 2та ёки 3та тезкор гол урса, ўйин тақдири ҳал этилган ҳисобланади. Англияда бундай эмас. Бу ерда ютқазаётган томон токи финал ҳуштаги чалингунча курашдан тўхтамайди. Англияда техник салоҳияти унчалик яхши бўлмаган клублар ҳам бор, лекин улар айнан жисмоний етуклик эвазига ҳар қандай рақибга қийинчилик туғдиришади. Қисқаси, умумий ҳолат Испаниядагидан яхшироқ.
- Энди айтингчи, лигада ёқмаган томони нима?
- Ишонмаслигингиз мумкин, бироқ бирор жиҳат юзасидан эътироз билдиролмайман. Айтайлик, ҳакамлик савияси жуда юқори, майдонлар идеал ҳолатда... Тўғри, айримларга Рождество арафасида кўп ўйин ўтказилиши ёқмайди, бироқ биз Англия анъаналарини ҳурмат қилишимиз керак.
- «Манчестер Сити» 4та фронтда кураш олиб боришда давом этяпти. Бу оғир эмасми?
- Албатта, клуб қийин даврда турибди. Боз устига, айрим етакчиларимиз жароҳатланишган. Фернандиньо, Агуэро, Настасич - булар биз учун ўта муҳим футболчилар.
- Моуриньонинг айтишича, АПЛда айнан «Манчестер Сити» ғолиб чиқиши керак экан, зеро, жамоангиз трансферлар бозорида ҳаммадан кўп сарфлаяпти...
- Жозе миясига келган гапни айтиши мумкин, бироқ барчасига асос ҳам келтириши керак. Асос шуки, мавсум арафасида «Челси» биздан кўра, кўпроқ пул сарфлади. 10 йиллик харажатларга қарасак ҳам, яна худди шундай манзарани кўрамиз. Бундай гаплар фақат битта мақсадда айтилади - ўз жамоасини турли босимлардан қутқариш ва рақибларга ноқулайлик туғдириш учун. Умуман, мен бу каби сўзларга унчалик аҳамият бермайман.
- «Манчестер Сити» янада кучайиши мумкинми?
- Албатта. Бунинг учун бор билимимни сафарбар этаман. Англияда биринчи мавсумни ўтказяпман, лекин ҳозирдан ҳаммаси ёқяпти. Ўйлашимча, жамоам ҳали кўплаб жиҳатлар бўйича кучаяди. Клубга келган янги мураббий аввало, унинг кучли ва кучсиз томонларини аниқлашга уринади ва шу асосда ўйинни ўзгартиради. Табиийки, ушбу жараёнга маълум вақт кетади. Айтайлик, жамоа дастлабки ярим йилда янги услубларга мослашади ва 100 фоиз салоҳиятини намойиш этиш йўлларини излайди. Умуман, ишончим комил, мен «Сити»га ўзига хос услубни татбиқ эта оламан. Ишонинг, бу жуда муҳим.
- Сиз назарда тутаётган услуб қандай?
- Баланслашган жамоа тузмоқчиман. Клубимиз ҳақида гап борганида, бизнинг кўп гол уришимизни таъкидлашади. Лекин ҳимояда ҳам тўлақонли иш олиб боряпмиз.
- Навбатдаги мавсумда яна янги футболчиларга эҳтиёж сезасизми?
- Йўқ, бизда ажойиб таркиб юзага келди.
- Клуб спорт директори Чики Бегиристайн билан муносабатларингиз қандай?
- Яхши. Англияга кўчиб ўтишимга айнан Чики сабабчи бўлди. У ва Ферран Сориано. Улар мени, ўйин услубимни яхши билишади ва «Манчестер Сити»га наф бера олишимга ишонишади. Ҳозирда жиддий қўллаб-қувватлаётганларини яққол ҳис қиляпман.
- Доимо битта гапни тез-тез қайтарасиз: «Футбол эстетика, томошабоплик, мухлислар билан чамбарчас боғлиқ».
- Жаҳон чемпионати - ер юзидаги энг машҳур томоша. Ҳа, ЧЛ мавқеи ҳам тобора ошяпти. Ҳомийлар ва телекомпаниялар катта маблағ тикишяпти. Шундай экан, мухлисларга чинакам шоу кўрсатиб беришимиз шарт. Боз устига, клуб хўжайинлари катта маблағ сарфлаб, ажойиб футболчилар билан таъминлашяпти. Биласизми, мен хаёлпараст ёки романтик эмасман ва агарда «Жамоанг яхши ўйнамайдию, 1:0 ҳисобида ютади», дейишса, бу вариантни ҳам танлашим мумкин. Лекин бу ҳол менинг чиройли ғалабага интилмаслигимни билдирмайди. Шунчаки, натижа ва томошабопликни уйғунлаштира олиш зарур.
- Ла-лига кучаймоқдами ёки...?
- Сезиларли даражада орқага кетяпти. Испанияга хорижлик сифатида ташриф буюргандим, лекин 10 йил давомида маҳаллий бўлиб кетдим. Барча салбий жараёнлар қандай бошланганини кўриб турдим. Ҳозирда улар Ла-лигага таъсир ўтказяпти. «Реал» ва «Барса» каби кучга эга бўлган «Севилья», «Валенсия» ва «Депортиво» клублари қани? Мамлакат чемпиони 75-77 очко тўпларди. Ҳозир нима бўлаётганига бир қаранг... «Валенсия» энг яхши футболчиларидан маҳрум бўлди. «Севилья», «Бетис» ва «Вильярреал» ҳақида ҳам шундай дейиш мумкин. Ҳозир кўпчилик «Атлетико» ҳақида гапиряпти, дарҳақиқат, у яхши жамоа. Бироқ охирги 10 йилликнинг нақ 8та мавсумида 2та етакчи яқинига йўламаганлиги ҳам ҳақиқат. Асосий жиҳат, стадионлар тўлмаяпти, 10 йил олдин эса бошқача эди.
- Испания примеросида рақобат пастлиги «Мадрид» ва «Барса»га ҳам ёмон таъсир қилиши мумкинми?
- Албатта, бунга ўтган мавсум гувоҳ бўлдик-ку. «Барса» миллий чемпионатда рақобат нималигини билмади, бироқ евромайдонда «Бавария»га тўқнаш келиб, қандай вазиятга тушди? Ёки «Реал»ни олайлик... Ҳа, бу жамоалар энг кучли футболчиларни сотиб олишга қодирлар, бироқ рақобатнинг йўқлиги уларга узоқ муддатли муваффақият келтирмайди.
- Бугунги «Барса» кечагисидан кучлими ёки кучсизроқ?
- Таркиби бинойидек ва ажойиб футбол кўрсатишда давом этяпти. Қисқаси, савияси унчалик ўзгармади. Эҳтимолки, Гвардиола вақтида жамоа ёрқинроқ ўйнарди...
- Клубни айнан Гвардиола ўзгартирдими?
- «Барса» Райкаард вақтида ҳам яхши жамоа эди, бироқ Гвардиола фундаментал ўзгаришларни киритди. Хусусан, ҳимояга жиддийлик олиб кирди. Яна «прессинг» кучайди. Менда «Камп Ноу»да «Барса»га қарши кечган ўйиндан ажойиб хотиралар қолган. Ўшанда «Мадрид»ни бошқарардим. Биз рақибнинг кучли жиҳатларини аниқлаб, уларга қарши тизим ишлаб чиққандик. Бироқ «Барса» барибир, кучлилик қилган ва ғалабага эришган. Ажойиб ўйин. Нима бўлишидан қатъий назар, «Барса» ўйин тақдирини якка ўзи ҳал этишга қодир футболчиларга эга кучли жамоа.
- Улардан бири Месси...
- Шак-шубҳасиз, у жароҳатдан сўнг ҳам одатга кўра, 2-3та омадли ҳаракати билан кўп нарсани ҳал қиляпти.
- Неймар...
- Буюк ўйинчи мана, ёш бўлишига қарамай, буюк жамоанинг бир қисмига айланди. Озгина вақт ўтсин, кўрасизлар, у Каталонияга тўлақонли мослашиб олади. Хуллас, «Барса» бразилияликни харид қилганидан ҳеч қачон афсусланмайди.
- Вальдес...
- Қойилмақом дарвозабон.
- Айтишларича, у «Сити» сафига қўшилиши мумкин экан...
- Ҳозир бу ҳақда ўйламаяпмиз. Умуман, охирги вақтларда нафақат Вальдес, балки Вилли Кабальеро, Рейна ва Касильясни ҳам жамоамизга «бичишди».
- Касильяснинг ҳолати ҳақида қандай фикрдасиз?
- У ҳали ҳамон кўп нарсага қодир. Лекин Диего Лопес ҳам чакки эмас. Айтайлик, «Вильярреал»ни бошқарганимда, жамоага кўп фойда берганди.
- Касильяс Англия футболига мос келармиди?
- Касильяс - ҳар қандай футболга мос келувчи кипер. Ахир битта клубда 10 йилдан ортиқ ўйнаган, кўплаб совринларни ютган, миллий жамоаси билан мисли кўрилмаган муваффақиятларга эришган футболчига ишонмаслик мумкинми?
- «Мадрид» билан хайрлашганингиздан сўнг қалбингизда яра қолмадими?
- Йўқ. Албатта, жамоани узоқроқ вақт бошқаришни ўйлагандим, лекин ҳозир бу ҳақда гапиришдан маъно йўқ. Асосийси, ҳеч кимдан хафа эмасман. Ҳарқалай, «Сантьяго Бернабеу»да қандай қўллаб-қувватлашгани ҳамон ёдимда. Қолаверса, битта эшик ёпилса, бошқаси очилади - бу футбол ҳаётининг қонуни.
- Сиз «Мадрид»ни жамоа муҳити яхши бўлмаган даврда бошқаргансиз...
- Бу ҳақда гапиришни истамайман. Чунончи, нима десам, худди ўзимни оқлашга уринаётгандек бўламан. Ўзимни оқлашим эса шарт эмас. Факт шуки, «Мадрид»ни катта иштиёқ ва роҳат билан шуғуллантирганман. Ҳа, барчаси бошқача кечишини истагандим, бироқ сал ўхшамади...
- Агуэро чиндан ҳам, жаҳоннинг энг кучли 5 нафар футболчиси қаторига кирадими?
- Бунга шубҳа йўқ. У тўлиқ шаклланган футболчи. Серхио доимо кучли бўлган, АПЛ эса уни янада тоблади.
- Серхио бир неча марта Испанияга қайтиш нияти ҳақида сўз очди. Уни «Барса» ва «Мадрид»да кутишяпти...
- Агуэро яна Испанияда? Йўқ, бундай бўлади, деб ўйламайман. У шу ерда, «Сити»да кучли, худди Яя Туре каби. Агар «Кун» Мадридга йўл олса, токи у ерда Криштиану Роналду ўйнар экан, «Реал» ўз жамоасига айланмайди. «Барса» хусусида ҳам шу гап: Месси жамоада қолар экан, у ерда ҳеч ким асосий ролга чиқолмайди. Ўйлашимча, Агуэро биз билан қолса, яқин 1-2 йил ичида «Олтин тўп» учун курашда Испания чемпионати юлдузларига жиддий рақобат тақдим этиш салоҳиятига эга бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
