Германия ва Гана терма жамоалари бизга Мундиалдаги энг қизиқарли ўйинлардан бирини намойиш қилиб беришди. Ҳеч бир жамоа ютқазишни истамади, ҳеч ким ҳимояга ётмади, ҳар иккала жамоа ҳужумкор ўйин намойиш этди. Натижада 2:2 — ҳаққоний натижа қайд этилди.
Гана биринчи турда АҚШга ютқазиб қўйгани учун Германияга қарши ўйинда уларга сув ва ҳаводек зарур эди. Шу билан бирга интизомли немисларга қарши ҳаддан ташқари очиқ футбол намойиш қилиб бўлмаслигини африкаликлар яхши тушунишарди. Жамоалар ҳимояни унутмаган ҳолда етарлича ҳужумлар ташкил этишди, гол уриш учун яхши имкониятларга эга бўлишди. Бироқ биринчи бўлимда мухлислар гол кўришмади.
Иккинчи бўлим бошида африкаликлар битта хатога йўл қўйишди. Улар Филипп Лам томонидан узатилган тўпни қайтара олишмади ва Марио Гётце ҳисобни очди. Гана ҳисобни тенглаштириш учун атиги 3 дақиқа етарли бўлди. Ўнг қанотдан етказилган тўпни Андре Айю бош билан дарвозанинг олис бурчагига жойлаб қўйди!
Ўз навбатида Германия терма жамоасининг ҳимоядаги хатосини ганаликлар кечиришмади. Ўйиннинг 63-дақиқасида Мунтарий аниқ узатмаси билан Гьянни дарвозабон билан бирга-бир вазиятга чиқариб юборди. 3-рақамли ҳужумчининг зарбасини Нойер қайтара олмади.
Мазкур ЖЧда кўпчилик кутаётган воқеа содир бўлди. Мирослав Клозе захирадан майдонга тушди ва ЖЧ финал босқичидаги ўзининг 15-голини уришга муваффақ бўлди. Бурчакдан етказилган тўпни Хёведес бош билан ортга уриб юборди. Клозе эса тўпга шундоққина оёқ қўйди ва дарвозани ишғол қилди. 2:2.
Иккинчи бўлимда хавфли вазиятлар ҳар иккала дарвоза олдидан шунчалик кўп бўлдики, терма жамоаларнинг иштиёқига, жисмоний тайёргарлигига қойил қолмасдан иложимиз йўқ. Ўйиннинг сўнгги 10 дақиқасидаги ҳужумлар оқибатида исталган жамоа ғалабани илиб кетиши мумкин эди. Бироқ, назаримизда, дуранг натижа ҳаққоний бўлди.
Эътиборли томони, бугунги баҳсда ака-ука Жером ва Кевин-Принс Боатенглар бир-бирига қарши ўйнаган бўлса, Андре ва Жордан Айюлар Гана шарафини ҳимоя қилишди.
Ушбу натижадан кейин Гана дастлабки очкосини қўлга киритган бўлса, Германия ҳисобидаги очколар сони 4тага етди.
ЖЧ-2014. "G" ГУРУҲИ. 2-ТУР
ГЕРМАНИЯ – ГАНА - 2:2 (0:0)
Голлар: 1:0 – 51 Гётце, 1:1 – 54 А. Айю, 1:2 – 63 Гьян, 2:2 – 71 Клозе.
Германия: Нойер, Ж.Боатенг (Мустафий, 46), Мертесакер, Хуммельс, Хеведес, Кроос, Лам, Хедира (Швайнштайгер, 70), Ўзил, Гётце (Клозе, 69), Мюллер.
Гана: Дауда, Аффуль, Менса, Бойе, Асамоа, Рабиу (Агеманг-Баду, 78), Мунтарий, Атсу (Вакасо, 72), К.Боатенг (Ж.Айю, 52), А.Айю, Гьян.
Огоҳлантириш: Мунтарий (90).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
