Ишонаверинг, бу салат сизни қизиқтириши табиий. Чунки бу “хуштаъм таом” кечагина пайдо бўлгани йўқ.
Уругвайлик Луиз Суарес 2010 йилда футболдан бироз четлашди. Тўғри-да, яшил майдонда ҳадеб тўп суравериш кимга ҳам ёқади дейсиз. Шунда у янги соҳага қўл урди.
Аслида, ҳаммаси Луиснинг ўйиндан олдин тўйиб овқатланмаганидан бошланган бўлса кераг-ов. Нега дейсизми? Чунки 2010 йил — Суарес янги рецепт ўйлаб топмагунга қадар “овқатланиш”нинг бу тури футболда сира учрамаганди. Ўшанда биров дунёда мана бунақа “мазали” таомлар бор деса биров ишонмасди ҳам. Луис эса буни барчага кўрсатиб қўйди. Ўшанда “Ливерпуль” Голландиянинг “ПСВ” жамоасига қарши майдонга тушганди. Нима ҳам бўлди-ю, футболчилар орасида жанжал бошланди. Бу жанжалнинг асосий сабабчилари Суарес ва рақиб ўйинчиси Отман Баққол эди. Луис одатига кўра бақираверди, бақираверди, қараса, жанжал ҳеч тинчимайдиган. Шунда “Ҳап сеними” деди-ю, ўткир тишларини ишга солди, рақибнинг елкасини боплаб тишлади. Тамом. Бу воқеа Суаресни футболдан ошпазликка ўтказди.
“Суареснинг тишлари” ростакамига ажойиб салат. Ҳали ҳам ишонмаяпсизми, унда мақоламизнинг давомини, албатта, ўқинг. Ғаройиб тамаддидан сўнг “бош ошпаз”га айланган Луисга бу фаолият ёқиб қолди, шекилли.
“Ўрганган кўнгил ўртанмай қўймас”, деган нақл бежизга айтилмаган экан-да. Акс ҳолда, қаҳрамонимиз яна эски касбини эслаб қолармиди? Бўш вақтида ошпазлик қоидаларини яхшилаб ўрганган шекилли, Суарес яна тамадди қилишга тушди. Бу сафарги барра таом — “Челси” жамоасининг “қуён”и Братислав Иванович бўлди. “Қуён” деганимизга ҳайрон бўлманг, биз Братиславга Суареснинг кўзи билан қарадик, холос. Сиз ҳам шундай қараб кўринг, балки, миянгизда бизникидан-да оригиналроқ ўхшашлик пайдо бўлар. Хуллас, Суареснинг наздида “Иванович” энг “сара кўкат” бўлиб кўринди, шекилли, уни ҳам салатга қўшишга аҳд қилди. Аммо бу сафар ҳам омади юришмади, ошқозони отравления бўлиб, нақ 10 марта овқатланишдан маҳрум бўлди.
Касаллиги жуда қийнаганиданми ёки иштаҳаси йўқолдими, билмадиг-у, ҳар ҳолда, Суарес узоқ вақт сара “таом”лардан кўзини олиб қочиб юрди. Баъзи-баъзида “ширин хотиралари” безовта қилгандир, лекин яна отравления бўлиб, қатор “нонушта”лардан қуруқ қолиш кимга ҳам ёқади дейсиз. Буни қарангки, “очофат” қаҳрамонимиз анча пайтача нафсини жиловлаб юрди. Бироқ...
Хўрандамизнинг сабри, барибир, узоққа бормади. Қолаверса, бошланган ишни чала қўйиб бўлмайди, салатнинг таркибини бойитиш керак эди-да. Луис бу борада янги кашфиётга қўл урди. Бразилиядаги чемпионатда Италияга қарши кечган матчда Суарес янгигина узилган эмас-у, лекин яхшигина сақланган “сабзи”ни кўриб қолди. Бир чидади, бўлмади, икки чидади, бўлмади. Ахийри барига қўл силтаб, ўша “сабзи”дан бир тишлам узиб олишга шайланди. Устига-устак, хумори ҳам тинчлик бермаётганди. Ҳаммаси бир бўлиб, Суаресни “Кьеллини” деб аталган сабзавотга ҳужум қилишга ундади. Айтгандай, қаҳрамонимизга бу “сабзи” яхшигина таниш экан. Ҳа-ҳа, яна қанақасига денг, у “Кьеллини”ни илгари ҳам таътимоқчи бўлган, лекин бунинг уддасидан чиқолмаган экан. Балки, ўшандаёқ кўз остига олиб қўйгандир. Лекин “сабзи” ҳам анойилардан эмас экан, “махлуқ”ни бир уриб, ағдарди. Қолаверса, “сабзи”нинг “экилганига” ҳам анча бўлган, шу боис етарлича қаттиқлашиб қолганди. Бироқ Луис бу сафар ҳам таътиб кўришга улгурди. “Сабзи”нинг ширинлигиданми, қаттиқлигиданми, тиши ҳам қамашиб қолди. Бизнинг салат яна бир “витаминларга бой сабзавот” билан бойиди.
Бу сафарги “нонушта” ошпазимизга янада қимматга тушди. Суарес 9 бора “нонушта қилишдан” маҳрум бўлди, 4 ойга эса стадионда ўлжа излашдан мосуво қилинди. Ҳа, энди биз Луисни маълум муддат кўрмаймиз.
Демак, биз эътиборингизга янги — “Суареснинг тишлари” номли салатимизнинг ажойиб рецептини ҳавола этамиз. Демак, салатимизга қуйидагилар керак бўлади:
— “Баққол” номли чап елка;
— ўнг қўл — “Иванович”
— чап елка — “Кьеллини”...
Биз бежизга рецептимизни учта нуқта билан якунламадик. Чунки хўрандамиз бу салат таркибини янада бойитиши эҳтимолдан холи эмас. Бунинг учун эса энди “орттирган касали”дан қутулиши керак бўлади.
Шунақа, азиз мухлислар, футбол бизни нафақат шиддати, балки мана шундай ғаройиб ҳангомалари билан ҳам ҳайратга солаверади. Эҳтимол, футболдан бошқа “касб” эгалари ҳам ажралиб чиқар, нима дедингиз?!
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
