"Сиз эплаганингизча гол уринг, биз истаганимизга урамиз", бўларди бир пайтлар Бразилия терма жамоасининг шиори. Бир кун келиб "футбол афсунгарлари" юрти вакиллари бу даражада "бечораҳол" аҳволга тушиб қолади деб ким ўйлабди дейсиз?
Сколари жамоаси таркиб борасида ўта кучли эмаслиги Мундиал бошланмасидан аввал маълум эди. Мезбонлар асосан жамоавий ўйин, мухлисларнинг қўллаб-қувватлаши ва Неймарнинг маҳорати эвазига ярим финалгача етиб келишди. Аммо ҳақиқий синов олдида "ип эшолмай" қолишини ҳеч ким кутмаган бўлса керак.
Жамоа сардори Тиагу Силва ва етакчи Неймарсиз қолган бразилияликлар Германияга қарши ўйинда очиқ футбол кўрсатиш яхшиликка олиб келмаслигини Сколари ҳам яхши биларди. Аммо стадионга йиғилган мухлислар ва 200 миллион аҳоли қаршисида ҳужумкор ўйин қилмасликнинг иложи йўқ эди. Натижада жамоа аросатда қолди ва қаттиқ жазоланди.
Бразилия биринчи бўлиб гол ўтказиб юборишга руҳан тайёр эмасди. Боз устига, оддий вазиятда — бурчак тўпидан кейин Мюллерни бўш қолдирилди ва Томас мусобақадаги бешинчи голини "селасео" дарвозасига йўллади. Балки Силва бўлганида ушбу гол юзага келмасмиди? Аммо бир вақтлар иқтидорлар ва юлдузлар борасида жуда катта танловга эга бўлган "сариқ девлар", бир-икки нафар футболчига боғланиб қолгани ачинарли албатта.
Буёғига германияликларнинг иши юришиб кетди. Бразилия ҳужумга ўтаверди, голни эса "немис машинаси" урди. Қандайдир 6 дақиқа ичида урилган 4та голни кўриб, Германияга нисбатан "гол машинаси" таърифини берса ҳам бўларди. Бразилия нима қилаётганини, нима бўлаётганини тушунмасди. Совуққон немислар эса исталган услубда тўпни дарвоза тўрига жойлашди. Энг муҳими, Мирослав Клозе ўзининг ЖЧларидаги 16-голини урди ва мутлақ рекордчига айланди.
Иккинчи бўлимнинг дебютини мезбонлар жуда кучли бошлашди. Уларда гол уриш 3та юз фоизли имконият юзага келди. Аммо Мануэль Нойер барча зарбаларни бартараф этди ва пентакампеонларнинг шаштини янада тушириб юборди. "Сариқ девлар" ҳеч бўлмаганда битта гол уришганида эди, бу уларга руҳий далда бўларди.
Ўйиннинг қолган дақиқаларида эса захирадан тушган Андре Шюррле иккита гол урди ва ҳисобни 0:7 кўринишига олиб келди. Ўйиннинг энг сўнгги дақиқаларида Оскар битта жавоб тўпини киритди... Бу ЖЧ ярим финал баҳси эмас, қандайдир қўрқинчли тушга ўхшарди бразилияликлар ва унинг мухлислари учун.
Германия дастлабки финалчига айланди. Йоахим Лёв жамоаси ўз рақибини эртага билиб олади. Кўрамиз, эртага бўладиган Голландия-Аргентина баҳсида бизни қандай сюрпризлар кутаётган экан!...
ЖЧ-2014. Ярим финал
БРАЗИЛИЯ - ГЕРМАНИЯ 1-7
Голлар: 0:1 – 11 Мюллер, 0:2 – 23 Клозе, 0:3 – 24 Кроос, 0:4 – 26 Кроос, 0:5 – 29 Хедира, 0:6 – 69 Шюррле, 0:7 – 79 Шюррле, 1:7 – 90 Оскар.
Бразилия: Жулио Сезар, Майкон, Давид Луиз, Данте, Марсело, Л. Густаво, Фернандиньо (Паулиньо, 46), Халк (Рамирес, 46), Оскар, Бернард, Фред (Виллиан, 70).
Германия: Нойер, Лам, Дж.Боатенг, Хуммельс (Мертесакер, 46), Хеведес, Хедира (Дракслер, 76), Швайнштайгер, Мюллер, Кроос, Озил, Клозе (Шюррле, 58).
Огоҳлантириш: Данте (68).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
