17 август куни Хитойнинг Нанкин шаҳрида бошланган II ўсмирлар ёзги олимпия ўйинларида спортнинг 17 тури бўйича мусобақалар ўтказилиб, мамлакатимиз вакиллари дзюдо, оғир атлетика, сузиш, спорт гимнастикаси, академик эшкак эшиш ва стол тенниси бўйича бўлиб ўтган баҳсларда иштирок этдилар.
Эътиборлиси, юртимиз спортчилари биринчи кунги мусобақалардаёқ иккита бронза медалига сазовор бўлдилар. Жумладан, дзюдо кураши бўйича вазни 66 кг.гача бўлган полвонлар беллашувида Ватанимиз шарафини ҳимоя қилган Суҳроб Турсунов ҳамда оғир атлетика бўйича ўсмирлар ўртасида ўтказилган баҳсларда Адҳамжон Эргашев (-56 кг) совриндорлар сафидан ўрин эгаллашди.
Суҳроб Турсунов биринчи баҳсда болгариялик Стоян Тарапановни муддатдан аввал иппон баҳоси билан енгиб, иккинчи беллашувда украиналик тажрибали спортчи Богдан Ядов қаршилигини енга олмади. Шундан сўнг ўтиш мусобақасида иштирок этган Суҳроб дастлаб беларуслик, сўнгра эса арманистонлик полвонни муддатдан аввал мағлуб этиб, бронза медали учун курашни давом эттирадиган бўлди.
Учинчи ўрин учун кечган беллашувда ҳамюртимиз Коста-Рика вакили Жулиан Санчони мағлуб этди ва иккинчи ўсмирлар олимпиада ўйинларининг бронза медали билан тақдирланди.
Делегациямиз ҳисобига навбатдаги бронза медалини оғир атлетика бўйича ўғил болалар ўртасида ўтказилган мусобақада Адҳамжон Эргашев келтирди. Вазни 56 кг.гача бўлган спортчилар мусобақасида баҳс юритган ҳамюртимиз даст кўтаришда 110 кг., силтаб кўтаришда эса 133 кг. тошни ўзига бўйсинтириб, иккикураш якунига кўра 243 кг. натижа билан бронза медали совриндори бўлди. Худди шундай натижани қайд этган вьетнамлик спортчи иккинчи, 283 кг. натижа кўрсатган хитойлик спортчи эса биринчи ўринни эгаллади. Шу ўринда таъкидлаш жоизки, оғир атлетика спорт турида спортчилар кўрсатган натижалари бир хил бўлганда, қай бир спортчининг шахсий вазни енгилроқ бўлса, ўша спортчига юқори ўрин берилади. Мазкур мусобақада вьетнамлик спортчининг вазни Адҳамжоннинг вазнидан 40 грамм енгил бўлганлиги боис, кумуш медаль вьетнамлик спортчига берилди. Спортнинг ушбу турида иштирок этадиган яна икки спортчимиз 22 август куни баҳсларга киришадилар. Ўғил болалар ўртасида ўтказиладиган мусобақада Фарҳодбек Собиров (-85 кг) ғолиблик учун кураш олиб борса, қизлар мусобақасида Камила Абдуллаева (+63 кг) баҳсларда иштирок этади.
Биринчи кунги баҳсларда, шунингдек, стол теннисчимиз Регина Ким Франция ҳамда Жанубий Корея вакиллари билан кечган ҳар икки баҳсда мос равишда 1:3 ва 0:3 ҳисобида имкониятни бой берди. 18 август куни Регина гуруҳдаги сўнгги учрашувни гуруҳ пешқадами америкалик Л.Зангга қарши ўтказади.
Академик эшкак эшиш бўйича 1000 метр масофага ўтказилган саралаш босқичида Юлдуз Кульгавая ўз гуруҳида сўнгги 6-ўринни эгаллаган бўлса, Шаҳбоз Абдужабборов гуруҳ босқичида марра чизиғига учинчи бўлиб етиб келди ва у ҳам ярим финал баҳсларига тўғридан-тўғри чиқа олмади. Энди ҳар икки спортчимиз 18 август куни ўтказиладиган навбатдаги саралаш баҳсларида ўз омадларини синаб кўрадилар.
Ўғил болалар ўртасида 100 метр масофага брасс усулида сузиш мусобақасида иштирок этган Андрей Правдивцев саралаш баҳсларида ўз гуруҳида биринчи бўлиб маррага етиб келган бўлсада, у қайд этган натижа (1:03.99 сония) умумий ҳисобда ярим финал босқичига чиқиши учун етарли бўлмади.
18 август куни мамлакатимиз спортчилари ўқ отиш, стол тенниси, сузиш, академик эшкак эшиш ва спорт гимнастикаси бўйича ўтказиладиган баҳсларда иштирок этадилар.
Биринчи кунги мусобақалар якунларига кўра, учтадан олтин ва бронза медалига сазовор бўлган хитойликлар умумжамоа ҳисобида пешқадамлик қилишмоқда. Биттадан олтин, кумуш ва бронза медалларини қўлга киритган Россия, АҚШ, Япония делегациялари кейинги ўринларда боришяпти.
Биринчи кун бўлиб ўтган мусобақаларда жами 26 давлат вакиллари совринли ўринларни эгаллашди. Иккитадан бронза медалига сазовор бўлган Ўзбекистон ҳамда Франция делегациялари 20-21-ўринларни банд этишмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
