Европа Чемпионлар лигаси ўзининг қизғин палласига кириб бормоқда. Хусусан, гуруҳ босқичининг иккинчи тур учрашувлари якунланган бир пайтда кутилмаган натижалар ҳам кузатилди. Бир томондан, иккинчи турга келиб қайси клубнинг имкониятлари қандайлиги бир қадар ойдинлашди ҳам. Қуйида чемпионликка даъвогарлик қилиши мумкин бўлган жамоаларнинг имкониятлари ҳақида сўз юритамиз.
“Реал” Мадрид. Амалдаги Европа чемпионидан кўпчилик совуқ анъанани бузишни, яъни чемпионликни муносиб ҳимоя қилишни кутяпти. “Қироллик клуби” гарчи таркиб жиҳатдан анча ўзгарган бўлса-да, аммо сезиларли даражада кучайган дейиш нотўғри. Афтидан, “Реал”да ижрочилар сони камайиб қолгандек. Бу “Лудогорец” билан бўлган ўйинда яққол сезилди. Ахир “Лудогорец”ни ҳурмат қилган ҳолда айтиш керакки, Карло Анчелотти шогирдларининг номи деярли таниш бўлмаган жамоа устидан кичик ҳисобда амаллаб ғалаба қозониши мағлубият билан тенг. Балки, бу янги футболчиларнинг клубга мослашиб улгурмаганлари билан боғлиқдир. Нима бўлганда ҳам, Мадриднинг биринчи рақамли жамоаси ўйинидаги беқарорликни бартараф этмаса, ғолиб бўлиши анча қийинлашади.
“Бавария”. Ҳар бир халқаро мусобақада ғолиблик учун асосий даъвогар бўлган Мюнхен клубининг ҳозирча ишлари жойида. Фақат немис жамоасининг ўйинида бироз сусткашлик, мужмаллик пайдо бўлгандек. Тўпни кўп олиб қолиш, аниқ, кучли зарбаларнинг камайиб кетиши Гвардиола ҳал қилиши керак бўлган муаммолар сирасига киради. Аниқроқ қилиб айтганда, Пеп миясидан “Барселона” тактикаси қолдиқларини чиқариб ташлаши керак.
“Барселона”. Каталониялик мухлислар аллақачон янги мураббий Луис Энрикедан нолишни бошлашди. Чунки ўтган мавсумда Ибрагимовичи бор “ПСЖ”ни мағлуб этган жамоа бу сафар Ибрасиз “ПСЖ”га ютқазди. Бунинг сабаби битта — тўп билан ҳаддан ташқари кўп муомала қилиш асносида дарвоза томон зарба бериш кераклигини унутиб қўйиш. Миллий чемпионат доирасида “Малага”га қарши кечган матчда ҳам шунга ўхшаш ҳолат кузатилганди, устунликка эга бўлган “Барселона” рақиб дарвозаси томон бирорта ҳам аниқ зарба йўллай олмаганди. Эҳтимол, Суарес ўйнай бошласа, ҳаммаси изига тушар, аммо Каталония клуби Суаресга муҳтож бўлганчалик кучсиз эмас. Таркибда Луисдан-да тажрибалироқ, маҳоратлироқ футболчилар бор. Демак, ҳамма гап Энрикеда. Шу ўринда яна бир гап, афтидан, Марк Андре Тер-Стеген жамоага тўлиқ кўникиб улгурмаган кўринади. Ишқилиб, шундай бўлсин. Борди-ю, Стегеннинг бори шу бўлса, унда “Барселона” дарвозабон масаласини яна бир бор ўйлаб кўриши керак. Чунки клуб, одатда, жуда кучли рақибларга қарши ўйнайди, ЕЧЛда ҳам шундай. Қани, Энрике бу ёғига нима ўйлаб топаркин?
“Челси”. Ҳар доим нималарнидир ўйлаб юрадиган Жозе Моуринью бу сафар ҳам ана шу одатига содиқ қолгани аниқ. “Атлетико”нинг донорлик хизматидан фойдаланилгач, жамоанинг қони анча юришиб кетди. “Челси” ўтган мавсумдагидан кучлироқ кўринмоқда. Таққослаш учун айтиш керак, Диего Косто Торресдан фойдалироқ ҳаракат қиляпти. Бироқ икки тур доирасида кечган ўйинлардан тўлиқ ижобий хулоса чиқариш мушкул. “Спортинг”ни кичик ҳисобда мағлуб этган ва “Шальке 04” билан дуранг ўйнаган жамоани, одатда, чемпионликка даъвогар деб ҳисоблаш бироз мушкулроқ. Аммо бу футбол, бу “Челси”. Муҳими, жамоанинг ўйини ижобий томонга ўзгарди, демак, кейинги турларда Моуринью шогирдларидан нималардир умид қилса бўлади. Жамоани қандай ўзгартиришни эса Жозенинг ўзи яхши билади.
“Ливерпуль”. ЕЧЛга қайтиб, кўплаб ишқибозларини хурсанд қилган инглиз жамоасининг натижаларини кўнгилдагидек деб бўлмайди. “Барселона”дан фарқли ўлароқ, “Ливерпуль” Суаресга боғланиб қолганди. Луиснинг ўрнига келган Балотелли эса ҳозирча ҳеч нарса қила олгани йўқ. Бунинг сабаби битта, Марио ўзига тўп етказиб берилгандагина, жамоадошлари уни қулай вазиятга чиқара олгандагина гол уриши мумкин. Суарес эса керак бўлса, тўпни ўзи тортиб оларди, вазиятни ҳам ўзи яратарди, майдонда жуда фаол ҳаракат қиларди ва, албатта, вазиятлардан деярли тўлиқ фойдаланарди. Марионинг ана шу жиҳатдан тажрибасизлиги жамоа ўйинида яхшигина кемтикликка сабаб бўлди. “Базель” билан кечган ўйинда ана шу кемтиклик ўз сўзини айтди. Эҳтимол, Брендан Рожерс ҳужумдаги бу камчиликни тўлдириш йўлини топар? Буни вақт кўрсатади.
“Рома”. “Қари билганни пари билмас” деган гап айни ҳақиқат. Буни итальян жамоаси яққол исботлаяпти. Боиси, “Рома” ёши ўтиб бораётган бўлса-да, Тоттига жавоб беришни истамаяпти. Бунинг самараси ўлароқ, Франческо жамоанинг ажойиб ҳужумларини гол билан якунлашда ўзини кўрсатмоқда. Умуман олганда, “Рома”да ажойиб жамоавий ўйин шакллангани бу галги матчларда яққол сезилди. “ЦСКА”нинг йирик ҳисобда мағлуб этилиши, “Манчестер Сити”га қарши кечган матчда эришилган дуранг сўзимизни яна бир карра исботлайди. ЕЧЛга эндигина қайтган бўлса-да, Рим клубидан бошқа жамоаларникига нисбатан яхшироқ натижаларни кутиш мумкин.
“Атлетико” Мадрид. Бу клубнинг бошқа жамоалардан фарқи шундаки, “Атлетико”нинг барча футболчиси исталган чизиқда ўйнай олади. Бу клубда сўнгги пайтларда ҳимоячи, ҳужумчи деган тушунчалар ўз аҳамиятини йўқотиб бораётгандек. Чунки Диего Коста кетганидан сўнг “Қани, ким энди тўпурарлик мақомини қўлга киритаркан?”, “Костасиз жамоа голлар ура олармикин?” деган саволлар пайдо бўлганди. Энди бутун жамоа гол урмоқда. Ҳам кескинлик, ҳам тажрибани муносиб тарзда мужассамлаштира олган Симеоне жамоаси бир футболчига асосланиб қолмаганини такрор ва такрор исботламоқда. “Юветус”га қарши кечган ўйинда ҳам, аслида, мадридликлар йирик ҳисобда ғалаба қозонишлари мумкин эди, аммо Буффоннинг маҳорати бунга имкон бермади. Хулоса ўрнида айтиш мумкинки, “Атлетико” бу сафар ҳам финалгача етиб борса, ажабланмаймиз.
“Боруссия” ва “Арсенал”. Бир гуруҳдан жой олган бу икки клуб кучлилар сафига киритилиши тайин. Айниқса, Лондон жамоаси таркибини кучайтиргач, анча рақобатбардош клубга айланди. Шу билан бирга, Дэнни Уэлбек ҳам “Арсенал”да қайта порлайдиганга ўхшайди. Эҳтимол, бу сафар Арсен Венгер мусобақани бошини баланд кўтарган ҳолда якунлар.
Юрген Клопп шогирдларини ҳам рўйхатдан четга чиқариб бўлмайди. Ахир “Арсенал”ни яққол устунлик билан мағлуб этиш ҳар қандай жамоанинг ҳам қўлидан келавермайди.
ЕЧЛда биз тилга олмаган бошқа кўплаб кучли жамоалар ҳам бор. Аслида, бу мусобақада кучсиз клубнинг ўзи йўқ. Ҳар бир жамоа, албатта, ғалаба қозонишни мақсад қилган ва шунинг учун майдонга тушади. Умид қиламизки, ЕЧЛ мухлисларга янада қизиқарли ва кутилмаган лаҳзаларни ҳадя этади. Ишқибозларга эса футболдан узоқлашмасликни маслаҳат берамиз.
Низомжон Исломов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
