Шанба куни Бекобод шаҳридаги ёшлар марказида аёллар футболи бўйича 2014 йилги мавсумнинг вице-чемпиони, Ўзбекистон кубоги соҳиби бўлган “Металлург-вумен” жамоасини тақдирлаш маросими бўлиб ўтди.
Унда Ўзбекистон футбол федерацияси, Ўзбекистон аёллар футбол ассоциацияси, вилоят маданият ва спорт ишлари бошқармаси, Бекобод шаҳар ҳокимияти, Ўзбекистон металлургия комбинатининг масъул ходимлари, футбол фахрийлари ҳамда оммавий ахборот воситалари ходимлари иштирок этишди.
Даставвал сўзга чиққан Ўзбекистон металлургия комбинати директори Алик Нуритдинов “Металлург-вумен” жамоаси раҳбариятини, футболчи қизларни ажойиб натижа билан табриклади ва уларга Бекобод аҳли – футбол мухлислари номидан катта минннатдорчилик билдирди. Шунингдек сўзга чиққанлар – Бекобод шаҳар хотин-қизлар қўмитаси раиси Шоира Абдураҳмонова, Ўзбекистонда хизмат кўрсатган ёшлар мураббийи, футбол фахрийси Ахбор Имомхўжаев, мусобақа бош ҳаками Элмира Ғуломова, Ўзбекистон аёллар футболи ассоциацияси вакили Алишер Файзиев, “Спорт” газетаси бош муҳаррири Ойбек Юнусовлар “Металлург-вумен” жамоасининг бутун мавсум давомида чиройли, ҳужумкор, томошабинлар эътиборини тортувчи футбол намойиш этганлигини, бунда жамоа мураббийлари ва барча қизларнинг якдиллик билан ҳаракат қилишганлигини, улар қайд этган натижадан бекободлик ишқибозларнинг мамнунлигини, “Металлург-вумен” Ўзбекистон аёллар футболи тараққиётида ўчмас из қолдираётганлигини таъкидлашди.
Тадбир давомида “Металлург-вумен” жамоаси аъзоларига чемпионатнинг кумуш медаллари ва иккинчи даражали дипломлар, Ўзбекистон кубоги ва биринчи даражали дипломлар топширилди. Ўзбекистон металлургия комбинати ҳамда шаҳар ҳокимияти томонидан “Металлург-вумен” жамоасининг барча аъзоларига қимматбаҳо эсдалик совғалари топширилди. Барча номинациялар бўйича кучлилар аниқланиб, уларга махсус совринлар берилди.
Тадбирда сўзга чиққан “Металлург-вумен” жамоаси бош мураббийи Шерали Бобоқулов, жамоа сардори Альбина Беляловалар жамоани ҳар томонлама қўллаб-қувватлаб келаётганлиги учун Ўзбекистон металлургия комбинати раҳбариятига, Бекобод шаҳар ҳокимлигига ўз миннатдорчиликларини изҳор этишди. Мазкур ғалаба Ўзбекистон металлургия комбинатининг 70 йиллик тўйига муносиб тўёна эканлигини билдиришди.
Кеча шўҳ куй ва қўшиқларга уланиб кетди. Масъулиятли мавсумдан кейин футболчи қизлар тадбир давомида мириқиб ҳордиқ чиқаришди, кейинги мавсум режалари ҳақида фикр алмашишди.
2014 йилги мавсумда “Металлург-вумен” шарафини ҳимоя этган футболчилар ва мураббийлар таркиби билан яна бир бор таништирамиз:
Жамоа сардори– Альбина Белялова, ўйинчилар – Холида Дадабоева, Насиба Ҳожиева, Гуландом Боймаматова, Моҳинур Ҳожиқулова, Наталья Михайлова, Мавлуда Мунавварова, Нозима Камолтоева, Юлдуз Набиева, Нодира Мўйдинова, Наргиза Абдурасулова, Моҳигул Икромова, Ўғилой Илашева, Лутфинисо Ҳамидова, Умида Худойбоқова, Алина Демьяненко, Маҳлиё Абдурашидова, Шоҳсанам Абдулбоқиева, Алина Смирнова, Зарина Бобоева, Гулшан Шодиева. Жамоа шифокори – Умринисо Мамадалиева. Админстраторлар – Зуҳриддин Абдураҳмонов, Санжар Файзиев. Мураббийлар – Баҳром Умаров, Илҳом Ҳамзалиев. Катта мураббий – Аббос Абдуллаев. Бош мураббий – Шерали Бобоқулов. Жамоа бошлиғи – Норбек Йўлдошев.
Биз ҳам барча мухлислар номидан 2014 йилги мавсумни кўтаринки кайфиятда ўтказган, мамлакат вице-чемпиони бўлган, Ўзбекистон кубогини қўлга киритган ва энг асосийси аксарият ўйинчилари Ўзбекистон миллий, ёшлар ва ўсмирлар терма жамоаларига жалб этилган “Металлург-вумен” жамоасини, раҳбариятни, барча ўйинчиларни, техник ходимларни 2014 йилдаги ажойиб ютуқлар билан яна бир бор муборакбод этамиз. Уларга чиройли, ҳужумкор ўйинлари учун миннатдорчилик билдирамиз. Келгуси мавсумларда мазкур ғалабаларнинг бардавом бўлишини, янги чўққилар забт этилишини тилаб қоламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
