Real Madrid

"Real Madrid"ning buyukligi faqat sovrinlar soni bilan o‘lchanmaydi. Klubning 120 yildan ortiq tarixi davomida "Santyago Bernabeu" maydonida futbol tarixini o‘zgartirgan o‘nlab buyuk o‘yinchilar to‘p surdi. Alfredo Di Stefanodan Krishtianu Ronaldugacha, Fransisko Xentodan Luka Modrichgacha bo‘lgan avlodlar "Real"ning g‘oliblik mentalitetini shakllantirdi.

Klub FIFA tomonidan XX asrning eng yaxshi futbol klubi deb e’tirof etilgan, Yevropa chempionlar kubogi/Chempionlar ligasida esa 15 marta g‘olib chiqqan. Bu tarixning ortida turli davrlarda "oq futbolka"ni afsonaviy darajaga olib chiqqan futbolchilar turibdi. (Real Madrid)

Alfredo Di Stefano — "Real" tarixini o‘zgartirgan futbolchi

"Real Madrid"da: 1953–1964
O‘yinlari: 396
Gollari: 308
Yevropa kubogi: 5 marta
"Oltin to‘p": 1957, 1959

Alfredo Di Stefano "Real Madrid" tarixidagi eng muhim shaxslardan biri hisoblanadi. Argentinalik futbolchi 1953 yilda Madridga kelganidan so‘ng klub nafaqat Ispaniya, balki butun Yevropa futbolidagi asosiy kuchga aylandi.

Di Stefanoning o‘ziga xosligi faqat gollarida emas edi. U hujumchi bo‘lishiga qaramay, maydonning deyarli barcha nuqtalarida harakat qilar, hujum tashkil qilar, to‘p uchun kurashar va jamoa o‘yinini boshqarardi.

U ishtirok etgan "Real" Yevropa chempionlar kubogining dastlabki besh mavsumida ketma-ket chempion bo‘ldi. Di Stefano esa ushbu besh finalning barchasida gol urdi.

"Real" safida 396 ta rasmiy uchrashuvda 308 gol urgan Di Stefano ikki marta "Oltin to‘p"ni qo‘lga kiritdi. 1989 yilda France Football unga tarixda yagona marta topshirilgan "Super Oltin to‘p" mukofotini berdi. Keyinchalik u klubning faxriy prezidenti ham bo‘ldi. (Real Madrid)

Fransisko Xento — olti karra Yevropa chempioni

"Real Madrid"da: 1953–1971
O‘yinlari: 600
Gollari: 182
Yevropa kubogi: 6 marta
La Liga: 12 marta

Fransisko Xento "Real" tarixidagi eng buyuk qanot futbolchilaridan biri. Favqulodda tezligi tufayli u "Kantabriya bo‘roni" laqabini olgan.

Xento Di Stefano, Pushkash, Kopa va Rial bilan birgalikda ketma-ket beshta Yevropa kubogini qo‘lga kiritgan afsonaviy jamoaning a’zosi edi.

1966 yilda esa Xento allaqachon yangilangan "Yé-yé" avlodining sardori sifatida oltinchi Yevropa kubogini boshi uzra ko‘tardi. Shu tariqa u Yevropa chempionlar kubogini olti marta yutgan tarixdagi birinchi futbolchi bo‘ldi.

Xento 18 mavsumda 600 ta rasmiy uchrashuv o‘tkazib, 182 gol urdi va 12 marta Ispaniya chempioni bo‘ldi. 2016 yilda u "Real Madrid"ning faxriy prezidenti etib saylangan. (Real Madrid)

Ferens Pushkash — "Bernabeu"dagi sehrli chap oyoq

"Real Madrid"da: 1958–1967
O‘yinlari: 262
Gollari: 242
Yevropa kubogi: 3 marta
La Liga: 5 marta

Ferens Pushkash "Real"ga kelganida 31 yoshda edi. Ayrimlar uning eng yaxshi yillari ortda qolgan deb hisoblashgan. Vengriyalik buyuk futbolchi esa bu fikrlarni maydonda butunlay yo‘qqa chiqardi.

Pushkash 262 ta o‘yinda 242 ta gol urdi. Uning kuchli chap oyog‘i, zarbalari va jarima maydonidagi mahorati "Bernabeu" muxlislarini maftun etdi.

1960 yilgi Yevropa chempionlar kubogi finali uning eng mashhur o‘yinlaridan biri bo‘ldi. "Real" Frankfurtning "Ayntraxt" klubini 7:3 hisobida yenggan o‘sha uchrashuvda Pushkash 4 ta gol urgan.

U "Real" bilan uch marta Yevropa kubogi va besh marta Ispaniya chempionligini qo‘lga kiritdi. Bugun FIFA yilning eng chiroyli goli uchun beriladigan mukofotni aynan Pushkash nomi bilan ataydi. (Real Madrid)

Amansio Amaro — "Galisiyalik sehrgar"

"Real Madrid"da: 1962–1976
O‘yinlari: 471
Gollari: 155
Yevropa kubogi: 1 marta
La Liga: 9 marta

Di Stefano avlodidan keyin "Real"ga yangi yetakchilar kerak edi. Ulardan biri Amansio Amaro bo‘ldi.

Tezligi, driblingi va texnik mahorati uchun Amansio "El Brujo" — "Sehrgar" laqabini olgan. U "Yé-yé" avlodining asosiy futbolchilaridan biri edi.

1966 yilgi Yevropa chempionlar kubogi finalida "Partizan" hisobni ochdi. Ammo Amansio ajoyib harakatdan so‘ng hisobni tenglashtirdi, Serena esa g‘alaba golini urdi — 2:1.

Amansio "Real" bilan 9 marta La Liga va 3 marta Ispaniya kubogini ham qo‘lga kiritdi. Keyinchalik murabbiy sifatida u "Kastilya"da Butragenyo, Sanchis, Michel va Martin Vaskes kabi futbolchilardan iborat mashhur avlodning shakllanishida katta rol o‘ynadi. (Real Madrid)

Pirri — "Real" xarakteri timsoli

"Real Madrid"da: 1964–1980
O‘yinlari: 561
Gollari: 172
Sovrinlari: 15 ta

Xose Martines Sanches — Pirri "Real Madrid"da fidoyilik ramzi sifatida qolgan.

U himoyachi, yarim himoyachi va zarurat tug‘ilganda hujumchi sifatida ham o‘ynay olardi. Shu bilan birga 561 o‘yinda 172 gol urgani uning qanchalik universal futbolchi bo‘lganini ko‘rsatadi.

Pirrining irodasi haqida ko‘plab tarixiy voqealar mavjud. U 1971 yil Kubok egalari kubogi finalida qo‘li jarohatlangan holda, 1975 yil Ispaniya kubogi finalida esa jag‘i singaniga qaramay maydonga tushgan.

U 1966 yilgi Yevropa kubogi, 10 ta La Liga va 4 ta Ispaniya kubogini qo‘lga kiritgan. Pirri klubning oliy mukofotlaridan biri — "Laureada"ni olgan birinchi futbolchi bo‘ldi.

2023 yildan buyon Pirri "Real Madrid"ning faxriy prezidenti hisoblanadi. (Real Madrid)

Santilyana — havodagi qirol

"Real Madrid"da: 1971–1988
O‘yinlari: 645
Gollari: 290

Karlos Alonso Gonsales futbol olamiga "Santilyana" nomi bilan tanildi.

Uning bo‘yi markaziy hujumchilar uchun favqulodda baland bo‘lmagan. Ammo sakrash qobiliyati tufayli Santilyana havodagi kurashlarda deyarli yengilmas edi.

17 mavsum davomida u "Real" uchun 645 ta uchrashuvda 290 gol urdi. Faoliyatini yakunlagan paytda klub tarixida faqat Di Stefano undan ko‘proq gol urgan edi.

Santilyana 9 marta Ispaniya chempioni, 4 marta Ispaniya kubogi va ikki marta UYEFA kubogi sohibi bo‘ldi. U ayniqsa "Bernabeu"dagi mashhur yevrokubok kambeklarining asosiy qahramonlaridan biri edi. (Real Madrid)

Xuanito — "Bernabeu"ning o‘lmas ruhi

"Real Madrid"da: 1977–1987
O‘yinlari: 401
Gollari: 121

Xuan Gomes Gonsales — Xuanito statistikadan ham kattaroq afsona.

Uning texnikasi, xarakteri, jangovorligi va "Real"ga bo‘lgan muhabbati madridistalar uchun alohida ahamiyatga ega.

Xuanito 401 uchrashuvda 121 gol urdi. U 5 marta La Liga, ikki marta Ispaniya kubogi va ikki marta UYEFA kubogini qo‘lga kiritdi.

1985/86 yilgi UYEFA kubogida "Real" "Borussiya Myonxengladbax"ga birinchi uchrashuvda 1:5 hisobida mag‘lub bo‘lganidan keyin "Bernabeu"da 4:0 hisobida g‘alaba qozonib, tarixiy kambekni amalga oshirgan. Xuanitoning o‘sha tungi ehtirosi "Real"ning taslim bo‘lmas xarakterining ramziga aylandi.

Xuanito 1992 yil 2 aprelda avtohalokatda 37 yoshida vafot etdi. Shundan buyon "Santyago Bernabeu"da o‘tadigan o‘yinlarning 7-daqiqasida muxlislar "Illa, illa, illa, Juanito maravilla!" deya uni xotirlaydilar. (Real Madrid)

Emilio Butragenyo — "La Quinta del Buitre" yetakchisi

"Real Madrid"da: 1984–1995
O‘yinlari: 463
Gollari: 171

1980-yillarda "Real" akademiyasidan ispan futboli tarixidagi eng mashhur avlodlardan biri yetishib chiqdi.

Butragenyo, Sanchis, Michel, Martin Vaskes va Pardesa birgalikda "La Quinta del Buitre" nomini oldi. Nom Butragenyoning "El Buitre" — "Kalxat" laqabidan kelib chiqqan.

Butragenyo 1984 yilda "Kadis"ga qarshi debyut uchrashuvida zaxiradan maydonga tushib, ikki gol urdi va yana bir golga uzatma berdi. "Real" 0:2 hisobida ortda borayotgan uchrashuvni 3:2 hisobida yutib ketdi.

U klub bilan ikki marta UYEFA kubogi va olti marta La Ligada g‘olib chiqdi. 463 ta rasmiy uchrashuvda 171 gol urdi. (Real Madrid)

Ugo Sanches — jarima maydonining meksikalik qiroli

"Real Madrid"da: 1985–1992
O‘yinlari: 282
Gollari: 208

Ugo Sanches "La Quinta del Buitre" avlodining akademiya tarbiyalanuvchisi emasdi, ammo uning gollari o‘sha jamoani yanada kuchli qildi.

Meksikalik hujumchi 282 uchrashuvda 208 gol urdi. U akrobatik zarbalari va gollardan keyingi mashhur saltosi bilan muxlislarni hayratga solardi.

Ugo "Real" bilan ketma-ket besh marta Ispaniya chempioni bo‘ldi. Madriddagi faoliyati davomida to‘rt marta La Liganing eng yaxshi to‘purari — "Pichichi" bo‘ldi.

1989/90 yilgi chempionatda u 38 ta gol urgan va ularning barchasini bir tegishda kiritgani uning hujumchilik mahoratini yanada mashhur qilgan. (Real Madrid)

Manolo Sanchis — ikki davrni birlashtirgan sardor

"Real Madrid"da: 1983–2001
O‘yinlari: 710

Manolo Sanchis "La Quinta del Buitre"ning eng uzoq vaqt "Real"da qolgan a’zosi bo‘ldi.

U klub akademiyasida o‘sdi va butun professional faoliyatini "Real Madrid"ga bag‘ishladi. 710 ta rasmiy uchrashuv bilan u klub tarixida eng ko‘p maydonga tushgan futbolchilar qatorida turadi.

Butragenyo avlodining Yevropa chempionlar kubogini yutish orzusi amalga oshmagan bo‘lsa-da, Sanchis bu maqsadga keyingi avlod bilan erishdi.

1998 yilda sardor sifatida "Yuventus" ustidan g‘alaba qozonib, klubning 32 yillik tanaffusdan keyingi yettinchi Yevropa kubogini boshi uzra ko‘tardi. 2000 yilda esa sakkizinchi Yevropa kubogini ham qo‘lga kiritdi. (Real Madrid)

Fernando Yerro — gol uradigan himoyachi

"Real Madrid"da: 1989–2003
O‘yinlari: 601
Gollari: 127

Fernando Yerro markaziy himoyachi uchun g‘ayrioddiy to‘purarlik ko‘rsatkichiga ega edi.

U "Real" safida 601 ta uchrashuvda 127 gol kiritdi. Yerro yarim himoyada ham, markaziy himoyada ham yuqori darajada o‘ynay olardi.

Uning kuchli zarbasi, standart vaziyatlardagi mahorati va havodagi ustunligi raqib darvozasi uchun doimiy xavf edi.

Yerro 1998, 2000 va 2002 yillarda Yevropa chempionlar ligasini qo‘lga kiritgan "Real"ning yetakchilaridan biri bo‘ldi. 1998 yilgi finalda u "Yuventus"ning asosiy yulduzi Alessandro Del Pyeroni neytrallashtirishda katta rol o‘ynadi. (Real Madrid)

Raul Gonsales — "Real"ning abadiy sardori

"Real Madrid"da: 1994–2010
O‘yinlari: 741
Gollari: 323

Raul "Real Madrid" akademiyasining eng buyuk mahsulotlaridan biri.

Qizig‘i, u dastlab "Atletiko" akademiyasida o‘ynagan. Keyin "Real" tizimiga qo‘shildi va 17 yoshida birinchi jamoada debyut qildi.

Raul 741 ta rasmiy uchrashuv bilan "Real Madrid" tarixida eng ko‘p o‘yin o‘tkazgan futbolchi bo‘lib qolmoqda.

U 323 gol urdi va uzoq vaqt klub tarixidagi eng yaxshi to‘purar bo‘ldi.

Raul 1998, 2000 va 2002 yillarda Chempionlar ligasini qo‘lga kiritdi. 2000 yil "Valensiya"ga va 2002 yil "Bayer"ga qarshi finallarda gol ham urdi.

Uning mehnatsevarligi, kamtarligi va maydonda oxirigacha kurashishi "Real" sardori qanday bo‘lishi kerakligining namunasiga aylangan. (Real Madrid)

Roberto Karlos — chap qanotdagi raketa

"Real Madrid"da: 1996–2007
O‘yinlari: 527
Gollari: 68
Yevropa kubogi: 3 marta

Roberto Karlos futbol tarixida qanot himoyachisi tushunchasini o‘zgartirgan o‘yinchilardan biri.

Braziliyalikning tezligi, hujumlarga qo‘shilishi va favqulodda kuchli chap oyog‘i uning vizit kartochkasi edi.

U 11 mavsum "Real" sharafini himoya qildi va 527 ta o‘yin o‘tkazdi. Uch marta Chempionlar ligasi g‘olibi bo‘ldi.

2002 yilgi Chempionlar ligasi finalida aynan Roberto Karlosning chap qanotdan oshirgan to‘pi Zidanning tarixiy goliga zamin yaratgan. (Real Madrid)

Zinedin Zidan — futbolchi va murabbiy sifatidagi afsona

Futbolchi sifatida: 2001–2006
O‘yinlari: 227
Gollari: 49
Bosh murabbiy: 2016–2018, 2019–2021

2001 yilda "Yuventus"dan jahon rekordiga yaqin summaga sotib olingan Zinedin Zidan "Galaktikos"ning bosh yulduzlaridan biri bo‘ldi.

Uning texnikasi, to‘p nazorati va maydonni ko‘ra bilishi futbolni san’at darajasiga olib chiqqan.

Zidanning "Real"dagi eng mashhur lahzasi 2002 yil Chempionlar ligasi finalida sodir bo‘ldi. Roberto Karlosning uzatmasidan keyin fransuz to‘pni yerga tushirmasdan chap oyog‘i bilan darvozaga yo‘lladi. "Bayer" darvozasiga urilgan bu gol futbol tarixidagi eng mashhur final gollaridan biriga aylandi.

Zidan futbolchi sifatida 227 o‘yinda 49 gol urib, 6 ta sovrin qo‘lga kiritdi.

Ammo uning "Real"dagi afsonasi shu bilan tugamadi. Bosh murabbiy sifatida Zidan 11 ta sovrin, jumladan 2016, 2017 va 2018 yillarda ketma-ket uchta Chempionlar ligasini qo‘lga kiritdi. (Real Madrid)

Iker Kasilyas — "San-Iker"

"Real Madrid"da: 1999–2015
O‘yinlari: 725
Sovrinlari: 19 ta

Iker Kasilyas "Real" akademiyasiga atigi 9 yoshida kelgan va keyinchalik klub tarixidagi eng buyuk darvozabonlardan biriga aylangan.

1999 yilda asosiy jamoada debyut qilgan Kasilyas 725 ta uchrashuvda maydonga tushdi.

2002 yil Chempionlar ligasi finalida "Bayer"ga qarshi so‘nggi daqiqalarda amalga oshirgan seyvlari "Real"ning to‘qqizinchi Yevropa kubogini qo‘lga kiritishida hal qiluvchi ahamiyatga ega bo‘ldi.

Keyinchalik u jamoa sardoriga aylandi va 2014 yil Lissabonda "Atletiko"ga qarshi finaldan keyin "La Desima" — o‘ninchi Yevropa kubogini boshi uzra ko‘tardi.

Kasilyas "Real" bilan 19 ta sovrin qo‘lga kiritgan. Ispaniya terma jamoasi sardori sifatida esa Jahon chempionati va ikki marta Yevropa chempionligini yutgan. (Real Madrid)

Krishtianu Ronaldu — klub tarixidagi eng yaxshi to‘purar

"Real Madrid"da: 2009–2018
O‘yinlari: 438
Gollari: 451
Chempionlar ligasi: 4 marta

Krishtianu Ronalduning "Real"dagi statistikasi futbol tarixidagi eng hayratlanarli ko‘rsatkichlardan biri.

Portugaliyalik superyulduz 2009 yilda "Manchester Yunayted"dan kelib, 9 mavsum davomida 438 ta rasmiy uchrashuvda 451 gol urdi.

Ya’ni u bir o‘yinga o‘rtacha bittadan ko‘proq gol kiritgan.

Krishtianu:

La Ligada — 312 gol;

Chempionlar ligasida — 105 gol;

Ispaniya kubogida — 22 gol;

boshqa musobaqalarda — 12 gol urgan.

U "Real" bilan to‘rt marta Chempionlar ligasini qo‘lga kiritdi va klubning 2014–2018 yillarda Yevropadagi hukmronligining asosiy timsoli bo‘ldi.

2013/14 yilgi Chempionlar ligasida Krishtianu 17 ta gol urib, bir mavsum uchun musobaqa rekordini o‘rnatdi.

U "Real" futbolchisi sifatida to‘rt marta "Oltin to‘p"ga sazovor bo‘ldi. (Real Madrid)

Serxio Ramos — 93-daqiqa qahramoni

"Real Madrid"da: 2005–2021
O‘yinlari: 671
Gollari: 101
Sovrinlari: 22 ta

Serxio Ramosning "Real" tarixidagi o‘rnini bitta raqam bilan ifodalash mumkin — 92:48.

2014 yil Chempionlar ligasi finalida "Atletiko" 1:0 hisobida oldinda borayotgan edi. O‘yinning 93-daqiqasida Luka Modrich burchakdan to‘p uzatdi, Ramos esa bosh bilan hisobni tenglashtirdi.

Qo‘shimcha vaqtda "Real" 4:1 hisobida g‘alaba qozonib, 12 yil kutilgan "La Desima"ni qo‘lga kiritdi.

Ramos 16 mavsumda 671 ta o‘yin o‘tkazib, himoyachi bo‘lishiga qaramay 101 gol urdi.

U 22 ta sovrin, jumladan to‘rtta Chempionlar ligasini qo‘lga kiritdi. Sardor sifatida 2016, 2017 va 2018 yillarda Yevropa kubogini ketma-ket uch marta boshi uzra ko‘tardi. (Real Madrid)

Marselo — chap qanotning braziliyalik sehrgari

"Real Madrid"da: 2006–2022
O‘yinlari: 546
Gollari: 38
Sovrinlari: 25 ta

Marselo 18 yoshida Madridga kelib, Roberto Karlosning munosib vorisiga aylandi.

U oddiy himoyachidan ko‘ra ko‘proq pleymeykerga o‘xshardi. Texnikasi, paslari va driblingi uni "Real" hujumlarining muhim qismiga aylantirdi.

2014 yil "Atletiko"ga qarshi "La Desima" finalida Marselo qo‘shimcha vaqtda gol urdi.

2022 yil Parijda esa u jamoa sardori sifatida "Real"ning 14-Yevropa kubogini boshi uzra ko‘tardi.

Marselo 546 ta uchrashuvda ishtirok etib, 25 ta sovrin, jumladan 5 ta Chempionlar ligasini qo‘lga kiritdi. (Real Madrid)

Karim Benzema — yordamchidan "Oltin to‘p" sohibigacha

"Real Madrid"da: 2009–2023
O‘yinlari: 648
Gollari: 354
Chempionlar ligasi: 5 marta
"Oltin to‘p": 2022

Karim Benzema "Real"da 14 mavsum o‘tkazdi.

Dastlab u Krishtianu Ronaldu atrofidagi hujum tizimining muhim qismi edi. Ronaldu ketganidan keyin esa Benzema jamoaning asosiy yetakchisiga aylandi.

2021/22 yilgi mavsum fransuz futbolchisining faoliyatidagi cho‘qqi bo‘ldi. U barcha musobaqalarda 44 gol urib, Chempionlar ligasida PSJ, "Chelsi" va "Manchester Siti"ga qarshi hal qiluvchi o‘yinlarni o‘tkazdi.

O‘sha mavsumda Benzema Chempionlar ligasida 15 gol bilan musobaqa to‘purari bo‘ldi va "Real" 14-Yevropa kubogini qo‘lga kiritdi.

Natijada Benzema 2022 yilgi "Oltin to‘p" sohibi bo‘ldi.

U klubni 648 uchrashuv, 354 gol va 25 ta sovrin bilan tark etdi. Krishtianu Ronaldudan keyin klub tarixidagi ikkinchi eng yaxshi to‘purar hisoblanadi. (Real Madrid)

Toni Kroos — paslar me’mori

"Real Madrid"da: 2014–2024
O‘yinlari: 465
Gollari: 28
Sovrinlari: 23 ta

Toni Kroos 2014 yil "Bavariya"dan keldi va juda qisqa vaqt ichida "Real" markaziy chizig‘ining boshqaruvchisiga aylandi.

Kroos, Kazemiro va Luka Modrichdan tashkil topgan uchlik futbol tarixidagi eng kuchli yarim himoya chiziqlaridan biri sifatida qoldi.

Nemis futbolchisining kuchli jihati tezlik yoki jismoniy ustunlik emas, balki futbolni boshqalardan bir necha soniya oldin "o‘qiy" olish qobiliyati edi.

U "Real"da o‘tkazgan 10 mavsumda 465 ta o‘yinda qatnashdi va 23 ta sovrin, jumladan 5 ta Chempionlar ligasini qo‘lga kiritdi.

2024 yil "Borussiya Dortmund"ga qarshi Chempionlar ligasi finali Kroosning klubdagi so‘nggi uchrashuvi bo‘ldi. U "Real"dagi faoliyatini 15-Yevropa kubogi bilan yakunladi. (Real Madrid)

Luka Modrich — 28 sovrinlik afsona

"Real Madrid"da: 2012–2025
O‘yinlari: 597
Gollari: 43
Sovrinlari: 28 ta
Yevropa kubogi: 6 marta
"Oltin to‘p": 2018

Luka Modrich 2012 yilda "Tottenxem"dan sotib olinganida bu transferning naqadar tarixiy bo‘lishini ko‘pchilik tasavvur ham qilmagan edi.

Xorvatiyalik futbolchi keyingi 13 mavsum davomida "Real" markaziy chizig‘ining yuragiga aylandi.

Modrichning tashqi tomon bilan bergan paslari, maydonni ko‘rishi, pressing ostidagi xotirjamligi va o‘yin tempini boshqarish mahorati uni o‘z avlodining eng yaxshi yarim himoyachilaridan biriga aylantirdi.

2018 yilda u Krishtianu Ronaldu va Lionel Messining uzoq yillik hukmronligini buzib, "Oltin to‘p"ni qo‘lga kiritdi.

Modrich "Real" safida 597 uchrashuv o‘tkazib, 43 gol urdi va 28 ta sovrin qo‘lga kiritdi. U 6 marta Yevropa kubogi sohibi bo‘ldi.

2025 yilda klubdan ketgan paytida Modrich "Real Madrid" tarixida eng ko‘p sovrin qo‘lga kiritgan futbolchi edi. (Real Madrid)

Afsonalarni birlashtiradigan bir xususiyat

Di Stefano, Xento va Pushkash Yevropani birinchi bor zabt etgan avlod edi.

Amansio va Pirri ulardan keyin "Real"ning g‘oliblik an’anasini davom ettirdi.

Santilyana va Xuanito "Bernabeu"dagi buyuk kambeklar ruhini yaratdi.

Butragenyo, Ugo Sanches va Sanchis 1980-yillarda Ispaniya futbolida hukmronlik qildi.

Raul, Yerro, Roberto Karlos va Zidan klubni Yevropa taxtiga qaytardi.

Kasilyas "Galaktikos" davri bilan yangi oltin avlod o‘rtasidagi ko‘prik bo‘ldi.

Krishtianu Ronaldu, Serxio Ramos, Marselo, Benzema, Kroos va Modrich esa "Real Madrid"ni XXI asrda yana Yevropaning mutlaq hukmron kuchiga aylantirgan avlodning timsollaridir.

Davrlar, murabbiylar va futbol uslubi o‘zgardi. Ammo "Real Madrid" afsonalarini birlashtirib turadigan asosiy xususiyat o‘zgarmadi — g‘alaba uchun oxirgi soniyagacha kurashish.

Shu sabab "Real Madrid" tarixida afsona bo‘lish uchun faqat ko‘p o‘yin o‘tkazish yoki ko‘p gol urishning o‘zi kifoya emas. Klub tarixini o‘zgartiradigan lahzalarni yaratish kerak.

Di Stefanoning besh finaldagi gollari, Xentoning oltinchi Yevropa kubogi, Xuanito davridagi kambeklar, Raulning sardorligi, Zidanning Glazgodagi volleyi, Kasilyasning seyvlari, Ramosning 93-daqiqadagi goli, Krishtianuning rekordlari va Modrichning uzoq yillik mahorati — bularning barchasi "Real Madrid"ni oddiy futbol klubidan jahon futboli tarixidagi alohida fenomenga aylantirgan voqealardir.