Биласиз, футбол бўйича Олий Лига баҳслари секин-аста ўзининг айни авж палласига кириб бормоқда. Мана ҳозирга келиб 9 та тур учрашувлари ортда қолди.
Биз мавсум аввалида клубларимизнинг Олий Лига-2016ни қандай либосларда ўтказиши ҳақида маълумот берган эдик. Ана энди жамоаларнинг қайси фирма либосларидан фойдаланаётганликлари билан фотосуратлар ёрдамида таништириб ўтамиз.
“Пахтакор” – Adidas
Мамлакатимизнинг амалдаги чемпиони – “Пахтакор” янги мавсумни ҳам ўз анъанасига содиқ қолган ҳолда Adidas фирмаси либосларидан фойдаланмоқда. Маълум бўлишича, ушбу икки томон 2003 йилдан буён ўзаро ҳамкорлик қилиб келмоқда.
“Шерлар”нинг асосий либоси ранги сариқ. Жамоа уй учрашувларини айнан сариқ рангли либосда ўтказмоқда. Сафар учрашувлари учун эса оқ рангли либос тайёрланган.
“Локомотив” – Joma
Жорий йилги мавсумни анча кўтаринки руҳда ўтказаётган “Локомотив” эса сўнгги йилларда Joma билан ишлаб келмоқда. Жамоа ўтган мавсумда ҳам Жома либосларидан фойдаланганди. Бу йил либослар Jomaдан буюртма қилинди.
Уй учрашувлари “Локо”нинг анъанавий ранги саналувчи қизил рангли либосда ўтказилмоқда. Сафар ўйинларида эса оқ рангдаги формаларда футболчилар майдонга чиқишмоқда.
“Насаф” – Adidas
Қаршининг “Насаф” жамоаси ҳам мана 6 йилдирки, Adidas билан ҳамкорлик қилиб келяпти. Бу йил томонлар ўзгача кўринишда либос тайёрлашди. Унга кўра, “Насаф” янги мавсумни оқ рангли либосда ўтказмоқда.
Мазкур форма анча нафис кўринишда ишланганини таъкидлаш жоиз. Сафар учрашувлари учун эса кўк рангдаги форма танланди.
“Бунёдкор” – Jako
Тошкентнинг “Бунёдкор” клуби ҳам янги мавсум учун жуда чиройли кўринишдаги либос тайёрлади. Жамоа 2012 йилдан буён Германиянинг Jako фирмаси билан яхши алоқаларни йўлга қўйган. Ҳар мавсум аввалида либослар Германиянинг ўзидан келтирилади. Бу мавсумда ҳам жуда нафис ишланган либослар олиб келинди.
“Қалдирғочлар”нинг асосий либоси оқ рангда бўлса, сафар ўйинларида жамоа кўк рангдаги формада майдонга чиқиб келмоқда.
“Андижон” – Macron
“Анджон” жамоаси бу йил ҳам Италиянинг Macron фирмаси либосларидан фойдаланмоқда. Ўтган йили ушбу фирма “Бургутлар” учун анчагина чиройли форма тайёрлаб берганди. Бу йил ҳам ҳамкорлик давом эттириладиган бўлди.
Асосий либос – доимгидек оч кўк рангда, сафар ўйинлари учун қора рангдаги формадан фойдаланилмоқда.
“Навбаҳор” – Jako
Олдинроқ хабар берганимиздек, Наманганнинг “Навбаҳор” клуби бу йил теҳник ҳамкорини ўзгартирди. Жамоа ўтган йили Joma билан ҳамкорлик қилганди. Лекин бу йил жамоа Германиянинг Jako фирмаси либосларидан фойдаланмоқда.
Жамоанинг асосий либоси ранги доимгидек сариқ. Шунингдек, сафар учрашувлари кўк рангдаги либосда ўтказилмоқда.
“Машъал” – Patrick
Муборакнинг “Машъал” клуби жорий мавсумда ҳам Patrick фирмаси либосларидан фойдаланмоқда. Жамоа ўтган йили ҳам Patrick билан ҳамкорлик қилганди.
Асосий либос ранги қора-кўк. Сафар учрашувларида эса “газчилар” оқ рангдаги формаларда майдонга чиқиб келишяпти.
“Шўртан” – Joma
Ғузорнинг “Шўртан” клуби ҳам Joma либосларидан фойдаланишни афзал билди. Жамоа ўтган мавсумда ҳам мазкур фирма билан ҳамкорлик қилганди. Ҳар икки томонни ҳам ҳамкорлик қониқтирган кўринади, бу йил ҳам томонлар биргаликда ишлашга қарор қилишди.
“Оқ бўрилар”нинг асосий либослари оқ рангда. Сафар ўйинлари эса тўқ кўк рангдаги формада ўтказилмоқда.
“Сўғдиёна” – Joma
Жиззахнинг “Сўғдиёна” жамоаси янги мавсумда ҳам Joma билан ҳамкорликни давом эттирди. Биласиз, ўтган йили ҳам “Сўғдиёна” Joma либосларидан фойдаланганди. Бу йил ҳам жамоа футболчилари шу фирма либосларида майдонга тушиб келишяпти.
Асосий либос ранги – кўк, сафар ўйинлари учун кулрангдаги форма тайёрланган.
“Олмалиқ” – Adidas
“Олмалиқ” жамоаси эса ўз анъанасига содиқ қолган ҳолда Adidas либосларидан фойдаланмоқда.
Жамоа янги мавсум учун қуйидагича либосларни тайёрлади. Улар кўк ва оқ рангда бўлиб, кўк рангдан асосий форма сифатида фойдаланиляпти. Сафар ўйинларида эса оқ рангли либосда майдонга чиқилмоқда.
“Металлург” – Joma
Бекободнинг “Металлург” жамоаси сўнгги йилларда Joma билан яқиндан алоқани йўлга қўйди. Жамоа жорий мавсумни ҳам айнан шу фирма тайёрлаган либосларда ўтказмоқда.
Асосий либос ранги кўк. Сафар ўйинларида эса бекободликлар оқ рангдаги формалардан фойдаланишмоқда.
“Қўқон-1912” – Joma
Қўқоннинг “Қўқон-1912” жамоаси худди ўтган йилдаги каби Joma либосларида майдонга тушиб келмоқда.
Асосий либос ранги – оқ. Кўк рангдаги либос эса захира форма деб белгиланган.
“Нефтчи” – Joma
Биласиз, Фарғонанинг “Нефтчи” жамоаси сўнгги йилларда Joma билан ишлаб келмоқда. Жамоа жорий мавсумни ҳам айнан Joma фирмаси томонидан тайёрланган либосларда ўтказмоқда.
Бу йил жамоа оқ ва яшил рангдаги формаларда майдонга чиқмоқда. Оқ рангли либос асосий форма сифатида белгиланди. Сафар ўйинларида эса яшил рангдаги формадан фойдаланилмоқда.
“Бухоро” – Macron
“Бухоро” жамоаси ўтган йили Joma билан ишлаганди. Лекин бу йилдан жамоа теҳник ҳамкорини ўзгартирди. Унга кўра, бухорликлар энди Италиянинг Macron фирмаси либосларида майдонга чиқишмоқда. Ушбу фирма “Бухоро” учун оқ ва кўк рангдаги формалар тайёрлаб берди.
Оқ рангдаги либосдан бухороликлар уй учрашувларида фойдаланиб келишмоқда. Сафар учрашувларида эса футболчилар кўк рангли формада майдонга чиқишмоқда.
“Қизилқум” – Joma
Навоийнинг “Қизилқум” жамоаси ўтган йилги мавсумда Joma билан ҳамкорлик қилганди. Томонлар бу мавсумда ҳам ҳамкорликни давом эттиришни лозим топишди. Шу сабабли бу йил ҳам “олтин изловчилар” айнан Joma либосларидан фойдаланишмоқда.
Жамоа уй ўйинларида қизил-оқ либосдан фойдаланмоқда. Кулранг-қизил рангдаги либосда эса навоийликлар асосан сафар учрашувларида майдонга чиқиб келишмоқда.
“Обод” – Nike
Олий Лиганинг дебютант жамоаси саналадиган Тошкентнинг “Обод” клуби Nike фирмаси билан ҳамкорлик қилмоқда.
Ушбу жаҳонга машҳур бренд “Обод” футболчилари учун кўк ва оқ рангларда либослар тайёрлаб берган. Тошкентликлар уй ўйинларида кўпинча кўк, сафар учрашувларида эса оқ рангдаги формалардан фойдаланиб келишмоқда.
Олий Лига-2016га оид қизиқарли маълумотлар тақдим этишда давом этамиз. SPORTS.uzдан узоқлашманг!
Зоҳирбек Акрамхонов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
