Футбол ичида 20 йил - ташқи қиёфа ўша-ўша. Ҳа, ҳаётдаги каби футбол дунёсида ҳам йиллар ўтсада, ташқи кўриниш бўйича унча ўзгармаган одамлар топилади, албатта. Жон Терри, Франческо Тотти, Фабио Капелло... Тўғри, ҳар бир инсон улғайиб борар экан, организмдаги ўзгаришлар унинг қиёфасида ҳам акс этади. Аммо бу жараён ҳар кимда турлича бўлади: кимдир тезда «қарийди», бошқа бировда ўзгариш унча сезилмайди.
Жон Терри - «Темир Жон». Ҳа, Англияда Террига бежиз «Темир Жон» таърифини беришмаган. Мана, йиллар ортидан йиллар ўтяпти, иродаси букилмас ҳимоячи эса ҳамон Европанинг энг кучли жамоаларидан бири сафида жавлон урмоқда. Жон қаримасликнинг энг эффектли йўлини топгандай, гўё.
Франческо Тотти - «Рим императори». Орадан 16 аср ўтиб, Римда император мақомини яна расман таъсис этишди, ҳисоб. Бетакрор Тотти чорак асрки, пойтахт футболида ҳукмронлик қилмоқда. Хуллас, у бошқарув муддати масаласида қадим Римнинг кўплаб етакчиларидан ўзиб кетди. Бир қарашда, Франческо сира ўзгармайдигандек. Мангу шаҳарга мос келувчи «абадий» император.
Филиппо Инзаги - «Пиппогол». Инзаги самарали фаолияти давомида 7 марта жамоа алмаштирди. Хусусан, «Парма»да ҳам, «Ювентус» ва «Милан»да ҳам тўп сурди. Бу вақтда 2та ҳолат ўзгаришсиз қолди - «Пиппогол»нинг қиёфаси ва майдонда мудом очиқ зонага чиқиб бориши.
Хавьер Занетти - «Абадий нерадзурра». Занетти бир сафар шундай деганди: «Сочимга тегинадиган кишини асло ёқтирмайман. Зеро, бу шахсий ҳаётимнинг бир қисми». Ҳозир ҳам «Интер» афсонаси ва собиқ сардори бошида бирорта оқ толани кўрмайсиз. Озгина муболаға билан айтганда, Занеттининг икки даврда тушган суратини фақат эгнидаги либослар дизайнига қараб ажратиш мумкин.
Диего Симеоне - «Аргентина бульдоги». Симеоне - нафақат ташқи қиёфа бўйича, балки қалбан ҳам қаримаётман инсон. Диего 90-йилларда майдонда рақибларини сергак туришга мажбур этарди, энди эса унинг четида шогирдларини тинмай олға ундамоқда. Агар вақт машинаси ихтиро қилиниб, унинг ёрдамида Симеоне-мураббий ва Симеоне-футболчи ўрни алмаштириб қўйилса, кўпчилик буни сезмасди, ҳатто...
Пол Скоулз - «Абадий малла». Малласоч болакай «МЮ» машғулотида илк марта тўпга тегинганидаёқ шотландиялик буюк мураббий Алекс Фергюсон рўпарасида нореал иқтидор турганини тушунган экан. Кейинчалик Пол Скоулз нақ 20 йил давомида заргарона диагонал узатмаларни амалга оширишдан чарчамади ва неча-неча голкиперлар додини берди. Унинг ижросидаги такрорланмас зарбаларни бир эсланг...
Фабио Капелло - ўта бой мураббий. Дон Фабио қиёфаси ўзгармоқда, албатта. Ахир у 70 ёшни уриб қўйди. Аммо сочига ҳали оқ оралаганича йўқ. Бунинг сири нима? Омадли фаолият (20тадан кўп соврин ютган) ва манфаатли шартномалар (руслар келишувни муддатидан вақтли бекор қилишгани учун унга 15 млн. евро тўлашди)ми?
Ривалдо - «Жаноб бисиклет». Ривалдо футбол ўйнаш асносида ер юзини айланиб чиқди - Сан-Паулу, Барселона, Тошкент, Ангола... Муҳими, деярли ҳар жойда ёрқин из қолдирди. Айниқса, бисеклет (чалқанча усулда зарба) масаласида ном қозонди. Умуман, уни таниб олиш мушкулот туғдирмайди - йиллар ўтсада, қиёфаси ўша-ўша.
Тьерри Анри - эгилувчанлик рамзи. Анри 2012 йили Англияга қайтиб, «Арсенал» футболкасида яна гол ургач, «канонирлар» мухлислари гўёки, тарихни варақлагандек бўлишди. Тьерри кейинчалик соқолини олдириб ташлади ва ҳозир вақтида АПЛдаги энг яхши ҳимоячиларни ҳар томонга «ағдариб» юрган ўша ёш йигитчага кўпроқ ўхшайди...
Сергей Семак - олижаноб оилапарвар. Шунчаки, тасаввур қилинг, Сергей Семак ҳозирги соқолини олдириб ташласа ва сочини бироз ўстирса, нима бўлади? Деярли ҳеч нарса - ЦСКА учун голлар урган ҳолатига қайтади-қўяди. Айни пайтдаги ва Греция термасига қарши учрашувда тўпни ўз устидан ошириб, узатмани амалга оширган ўша Семак ўртасида эса фарқ йўқ, ҳисоби.
Юрий Сёмин - бош «темирйўлчи». Юрий Сёмин қачон қаерда пайдо бўлиш кераклигини жуда яхши билса керак. Мана, у 2016 йили яна «Локомотив»га қайтди. Яна ўша қиёфа, фақат ғоялар янги.
Роман Березовский - ўткир ва тетик ичимлик каби. Россия чемпионати тарихидаги бош фахрийлардан бири уйидаги шахсий шкафида қандайдир ёшартирувчи восита - сеҳрли эликсир сақласа керак. Ҳаттоки, ўткирроғини. Роман Березовскийнинг чорак аср давомида юқори савияда ўйнаш баробарида бу орада ташқи кўринишини деярли бир ҳолатда сақлаб қолганини бошқача таърифлаш мумкинми?
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
