Футболчилик даврида тажрибали ҳимоячи сифатида танилган Шавкат Раимқулов бугунги кунда мураббийлик фаолиятини олиб боряпти.
Ўтган йили бутсаларини михга илган Раимқуловнинг катта футболдаги сўнгги жамоаси «Локомотив-БФК» бўлди. Ҳозирда у Тошкент вилояти иккинчи лигаси вакили бўлган «Оҳангарон» клубида бош мураббийлик қилмоқда.
Маълумот учун, бугунги суҳбатдошимиз ўз вақтида «Трактор», «Навбаҳор», «Андижон», «Бунёдкор», «Насаф», «Шўртан», «Оқ-тепа» каби жа-моаларда ҳам тўп сурган.
- Шавкат, ҳозир нималар билан бандсиз? Футболдан узоқлашиб кетмадингизми?
- Йўқ, албатта. Футболдан шунчаки кетиб бўлмайди. Чунки спортнинг бу тури ҳаётим мазмунига айланган. Шу кунгача нимага эришган бўлсам, ҳаммаси миллионлар ўйини ортидан: дўст орттирдим, турмуш қурдим. Озми-кўпми, мухлисга эга бўлдим. «Бунёдкор», «Насаф» каби мамлакатимизнинг етакчи клублари сафида ўйнадим.
Бугунги кунда Тошкент вилояти чемпионати, яъни иккинчи лигада ишлаяпман. Аниқроғи, «Оҳангарон» жамоаси бош мураббийиман. Бундан ташқари, шу клубимиз ўйнайдиган стадион директори лавозимида ҳам ишлаяпман.
- Футболчилик фаолиятингиздаги сўнгги жамоа қайси эди? Умуман, бутсани михга илиш осон бўлмагандир?
- Худди шундай. Севимли касбдан кетиш қийин. Буни футболчилар жуда яхши билишади. Лекин ҳар бир нарсанинг бошланиши бўлганидек, якуни ҳам бор. Ўз вақтида ёшларга жойни бўшатиб бериш керак. Олий лигадаги сўнгги жамоам «Бухоро» бўлди. Фаолиятимни эса «Локомотив-БФК» клубида якунладим. Юқорида айтганимдек, футболдан узоқлашиб кетганим йўқ. Бугунги кунда ўзимни мураббий сифатида синаб кўряпман.
Ҳозирдан айтишим мумкин, бу осон касб эмас экан. Ўйинчилик давримда майдонда асосий эътиборни ҳимояга, рақиб футболчиларини ўтказиб юбормасликка қаратардим. Мураббий эса клубдаги барча нарсага, хусусан, натижага жавобгар бўлар экан.
Бежизга ғалаба футболчиники, мағлубият мураббийники, дейишмайди. Лекин жуда ҳам қизиқ соҳа. Футболчилик давримда маҳоратли мураббийлар қўл остида ўйнадим. Улардан олган билим ва кўникмаларимни ҳозир футболчиларга беришга ҳаракат қиляпман.
- Турли йилларда «Бунёдкор», «Насаф» каби юртимизнинг гранд клублари сафида ўйнадингиз. Ортга назар ташлаб, футболчилик фаолиятингиздан кўнглингиз тўляптими? Ёки ушалмай қолган орзуларингиз борми?
- Очиғини айтаман, футболчилик фаолиятимдан кўнглим тўлмаган. Бунинг ўзига яраша сабаблари бор. Уларни бирма-бир санаб, достон қилиш ниятим йўқ. Жуда кўп жароҳатларга учрадим.
Ҳимоячининг бошқа чизиқ вакилларига қараганда шикастланиш эҳтимоли юқори бўлади. Лекин умумий олганда, ўйинчилик даврим ёмон ўтмади. Фаолиятим 2000 йили Ангреннинг «Семурғ» клубида бошланган. 2001 йили шу жамоа таркибида 22та ўйинда майдонга тушдим. 2002 йили Навоийнинг «Зарафшон» клубига ўтдим. Кейинги мавсум «Трактор»га таклиф қилишди.
- «Бунёдкор»га ким чақирганди?
- «Андижон» жамоасида ўйнаб юрган кезларим «Бунёдкор»дан таклиф бўлганди. Шахсан Миржалол Қосимовнинг ўзи қизиқиш билдирганди. Ундан бир йил аввал Амет Мемет ҳам «қалдирғочлар» сафига чақирганди. Аммо ўшанда маълум сабабларга кўра «Андижон»да ўйнагандим. «Бунёдкор» билан бирга МДҲ кубогида иштирок этганман.
- «Оҳангарон» жамоасида қандай пайдо бўлдингиз? Ким таклиф қилди?
- Ўзим оҳангаронликман. Футболчилик фаолиятим якунланганидан ке-йин раҳбарият томонидан таклиф бўлди. Ўзим туғилиб-ўсган шаҳар жамоасига ёрдам беришни мақсад қилиб юргандим. Чорлов бўлиши ҳамоно ортиқча иккиланмай розилик бердим. Шу орқали қайсидир маънода ўз бурчимни бажарсам керак, деб ўйладим.
- Жамоангизнинг якунланган чемпионатдаги иштирокидан кўнглингиз тўлдими? Реал ҳолатда бу ижобий натижами?
- «Оҳангарон» иккинчи лигада 4-ўрин билан кифояланди. Бу албатта, ижобий натижа эмас. Янада юқорироқ поғонани эгаллашимиз мумкин эди. Муаммолар ва бошқа сабаблар туфайли шу билан чекландик.
- Жамоа олдига биринчи лигага чиқиш вазифаси қўйилганмиди?
- Бундай вазифа йўқ эди. Клубда молиявий муаммолар бор. Яхши ҳомий бўлмаса, катта натижаларга эришиш қийин. Агар келаси мавсум учун ҳомий топа олсак, албатта, жамоани биринчи лигага олиб чиқишга ҳаракат қиламиз. Тошкент вилояти иккинчи лигасида «Аҳмад Яссавий» клуби биринчи ўринни эгаллади ва энди вилоятимиз номидан «пулька» баҳсларида иштирок этади.
- Олий лигани ҳам кузатиб кел-япсизми?
- Албатта. Биринчи галда ўзим ўйнаган клубларнинг ўйинларини томоша қиламан. Турнир жадвалидаги ҳолатлари билан қизиқаман. Жорий йил олий лига баҳслари бошқача ўтяпти. Рақобат жуда кучли. «Бухоро», «Қўқон-1912» жамоалари чин маънода кашфиётга айланишди.
Ўйлайманки, мавсум охиригача интрига сақланиб қолади. «Локомотив» таъқибчиларидан сезиларли фарқ билан ўзиб кетганига қарамай, ҳали чемпион номи маълум дейишга эрта. Ҳар қандай ҳолат рўй бериши мумкин.Чемпионат кучайса, бундан биринчи галда миллий термамиз манфаатдор бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ўзбекистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
