Хабарингиз бор, Биринчи лигада "Шердор" жамоаси биринчи босқич якунларига кўра даврани тўртинчи поғонада якунлади.
Мавсум аввалида "Шердор" жамоаси бош мураббийи Сайфулло Шарипов билан уюштирган суҳбатимизда жамоа ҳақида маълумотлар олган эдик. Бугун эса мавсум ҳақида бош мураббий билан суҳбатлашдик.
— Сайфулло ака, мана мавсум якунланиб жамоангиз тўртинчи поғонани банд этган ҳолда кейинги босқичга йўл олди. Жамоа учун дастлабки мавсум ҳисобланади ва хулосалар қандай бўлди?
— Биринчи ўринда жамоа натижасида тўла бўлмасада қониққанимни айтиб ўтишим керак. Жамоамиз бундан ҳам юқорироқ натижага эришиши мумкин эди деб ўйлайман. Шунга қарамай бутун мавсумда жамоамиз шарафини ҳимоя қилган йигитларга раҳмат айтиб ўтаман. Жамоамиз биринчи марта Ўзбекистон биринчи лигасида иштирок этишига қарамай мазмунли ўйин кўрсатди ва ўзига муносиб ўринни банд этди. Кейинги босқичга йўл олиш жуда мураккаб бўлиб қолди. Масалан ҳозирда жамоалар ҳаммаси деярли бир хил савияда ва "Сурхон", "Зомин" жамоаларининг тушиб кетгани ҳам буни исботлаб турибди. Фақатгина биринчи турдаги "Регистон" ва ўз майдонимиздаги "Орол"га учралган мағлубиятларни салбий бўлди дейишим мумкин. Дастлабки мавсум учун шогирдларим натижасидан қониқдим.
— "Шердор" гарчи ўз гуруҳида тўртинчи бўлган бўлса ҳам жамоа тўп ўтказиб юбориш бўйича энг ёмон кўрсатгичлардан бирини кўрсатди. Бу нима билан боғлиқ?
— Биз мавсум аввалида жамоамиз учун икки нафар дарвозабонни "заявка" дан ўтказган эдик. Икки ўйиндан сўнг асосий дарвозабонимиз маълум сабабларга кўра жамоамизни тарк этди. Шундан сўнг биз фақат ёш дарвозабонимизга ишонишга мажбур бўлиб қолдик. Ҳали Биринчи лигада ўйин амалиёти бўлмаган дарвозабонимиз эса ёш бўлганлиги боис кўп тўп ўтказиб юборди. Ундан ташқари бизда дарвозабонни алмаштириш имкони ҳам мавжуд эмас эди. Шундан сўнг охирги турларга келибгина яна битта ёш дарвозабонни "заявка" дан ўтказишга мажбур бўлдик ва икки нафар ёш дарвозабон билан мавсумни ўтказдик. Менинг ўйлашимча айнан мана шу омил бизга катта муомо бўлди. Шу боисдан бўлса керак жамоамиз ҳамма ўйинда иккитадан , учтадан тўп ўтказиб юборди.
— Жамоанинг бошқа чизиқлари ишончли ўйин кўрсатгани боис натижа унчалик ёмон бўлмадими унда?
— Шундай деса ҳам бўлади. Ҳимоя ва ярим ҳимоямизда хурсанд бўлдим. Улардан доим кўнглим тўқ бўлди. Фақатгина ҳужумда баъзи муоммоларга дуч келиб қолдик. Ҳужумда ҳам захира ўйинчи йўқ бўлганлиги боис бошқа чизиқлардаги футболчиларни синаб кўришга мажбур бўлдим. Икки нафар ҳужумчимиз бўлиб улар захираси ҳаракат қилишига мажбур бўлди. Биттаси жароҳат олганда эса жамоамизда бошқа футболчини бу чизиқда синаб кўришимизга имконият бўлди.
— Жамоа таркиби иккинчи даврада ҳам сақланиб қоладими?
— Бу борада ҳали аниқ қарорга келмадик. Мавсум аввалида айтиб ўтганимдек, мақсадимиз "Динамо" га муносиб футболчилар етказиб беришни мақсад қилганмиз. Маълумки жамоамизда асосан "Динамо" ўринбосарларида ҳаракат қилган ёшлар ўйнамоқда. Шунинг учун биз бу футболчиларни Олий лига савиясидаги футболчи бўлишини таъминламоқчимиз. Таркибимиз тўлиқ маҳаллий ёшлардан иборат бўлади. Кейинги мавсум ҳам ҳудди шундай бўлишини айтишим мумкин. Агар жамоамиздаги баъзи футболчилар "Динамо" кўригидан муоффақиятли ўтса уларни ўрнини тўлдиришга тўғри келади.
Ҳозирча жамоамиз дарвозасига "Янгиер" дан Шуҳрат Муродовни жалб этдик ва кейинги давра учун шартнома имзоладик. Ундан ташқари "Янгиер" дан Шуҳрат Камолов ва Ислом Сафаровлар ҳам кўрикдан ўтмоқда. Булар ҳам ўзимизнинг маҳаллий футболчиларимиз ҳисобланиб "Янгиер" да ҳаракат қилиб келмоқда эди.
— "Шердор" нинг кейинги давра учун мақсадлари қандай бўлади?
— Асосий мақсадимиз бу даврада ҳам "Динамо" учун муносиб футболчиларни етказишда ҳаракат қилишдир. Биринчи лига жуда қаттиқ бўлади. Бунда футболчи тобланиб Олий лигага мос футболчилар бўлиб етишади. Иккинчи даврада ҳам ҳамма ўйинга фақат ғалаба учун майдонга тушиб мухлисларимизни хурсанд қиладиган ўйинлар намоиш этмоқчимиз.
— Иккинчи даврада икки минатақа бирлашади ва учрашувлар кескин бўлади. Сиз бу борада қандай фикрдасиз?
— Дарҳақиқат энди жуда маъсулиятли учрашувлар бошланди. Шахсан менинг фикримча "Ғарб" минтақаси "Шарқ" қа қараганда кучлироқ. Бунга сабаб жамоалар бутун бир вилоят шарафини ҳимоя қилади. Масалан "Орол", "Хоразм", "Зарафшон" каби жамоаларнинг Олийда жамоаси йўқлиги боис улар бор эътиборини Биринчи лигага қаратади.Кескинлик шундан ошади. Ундан ташқари "Шарқ" да кўпроқ техникага асосланса, "Ғарб" кучга ва жисмоний ҳолатга боғлиқ бўлмоқда.
— Тайёргарлик ва стадион борасида ҳам айтиб ўтсангиз?
— Тайёргаликни 15 июлдан бошлаб юборганмиз. "Динамо" билан назорат учрашувини ҳам ўтказиб олдик. Гарчи 2:0 ҳисобида мағлубиятга учраган бўлсак ҳам йигитлар яхши ҳаракат қилишди. Тайёргаликни ҳаммасини Самарқандда ўтказамиз. Бир нечта назорат учрашувларини ўтказмоқчимиз. Бу борада ҳали аниқ қарорларни қабул қилмадик. Стадион эса бу мавсум ҳам шаҳримиздаги ОЗТМ стадионида ўтказамиз. "Регистон" билан бу боради муоммо бўлмайди деб ўйлайман. Ҳар бир турни икки кунда ўтказмоқчимиз.
— Суҳбатингиз учун раҳмат.
Фаридбек Юсупов суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
