«Арсенал» Мадриддан меҳмондаги дуранг билан қайтмоқда. Натижани қониқарли деб аташ мумкин бўлса-да, «канонирлар»нинг ўйини ҳаддан ташқари ишончсиз чиқди ва жамоа ҳатто мағлубиятга лойиқ эди. Агар иккинчи бўлим бошидан бир нечта сейвларни амалга оширган дарвозабон Давид Райя бўлмаганида, лондонликлар анча катта муаммоларга дуч келишлари мумкин эди. Энг қизиғи, бу муаммоларни футболчиларнинг ўзлари сунъий равишда юзага келтиришди.
Хўш, Мадриддаги баҳсда «Арсенал»нинг қайси футболчилари жамоа ўйинини орқага тортди? Stadion.uz нашри Микель Артета шогирдларининг ўйинини баҳолаб чиқди (ўйин бошида – 6, якунда бўлиши мумкин бўлган максимал баҳо – 10).
«Атлетико»га қарши ўйинда «Арсенал»нинг энг ёмон 4 футболчиси:
Бен Уайт — 3,0. «Арсенал» мудофаасининг ўнг қанотида ҳақиқий «фалокат» юз берди. Адемола Лукман бу қанотдан жарима майдончасига худди ўз уйидагидек бемалол кириб борди. Уайтнинг эътиборсизлиги туфайли Лукман иккита яққол голли вазиятга эга бўлди ва дарвозага тўрт бор зарба берди.
Бундан ташқари, Маркос Льорентенинг узатмасини қўл билан тўхтатиб қолган Уайт ўз дарвозасига пенальти белгиланишига ҳам сабабчи бўлди.
Пьеро Инкапье — 3,0. Ҳимоянинг чап қанотида ҳам аҳвол мақтанарли бўлмади. Антуан Гризманн «уйғонган» пайтда Инкапье ёши катта французнинг ортидан улгуролмади. Гризманн бир марта дарвоза тўсинини пойлаган бўлса, яна бир хавфли зарбасини дарвозабон қайтарди.
Инкапье эса ўйин давомида бирорта ҳам тўп олиб қўйишни амалга ошира олмади.
Вильям Салиба — 3,0. «Арсенал» ҳимоясини Хулиан Альварес ҳам «қийнаб» ташлади. Аргентиналик ҳужумчи Салибадан анча тезкор ва ақллироқ ҳаракат қилди. Биринчи бўлимда Салибанинг хатосидан сўнг Альварес хавфли зарба йўллаган бўлса, иккинчи бўлимда ҳам унга қаршилик кўрсатадиган одам топилмади. Салиба рақибни шунчаки масофадан кузатиб турди ва фаол ҳимояланмади.
Габриэль Мартинелли — 3,0. Жамоанинг ҳужум чизиғи ҳам порламади. Агар Дьёкереш пенальти ишлаган, Эдегор ва Мадуэке вақти-вақти билан ҳаракат қилган бўлса, Мартинелли майдонда шунчаки «йўқолиб қолди». Артета уни нега 68 дақиқа давомида майдонда ушлаб тургани тушунарсиз. Габи 8 та яккакурашнинг 6 тасида мағлуб бўлди, икки марта дриблинг пайтида тўпни йўқотди ва бирорта ҳам хавфли вазият ярата олмади.
Матнда хатолик топсангиз, ўша хатони белгилаб, бизга жўнатинг (Ctrl + Enter).