Арда ТУРАН:«Мен 14-рақамни танлаганман, чунки отам шуни хоҳлаган»
Баҳо:
+1; -0
«Барселона» жамоасининг ашаддий мухлислари айни дамда бир қатор футболчиларнинг ўз клублари сафида майдонга тушишини интизорлик билан кутишмоқда. Айниқса, ёзда Мадриднинг «Атлетико» клубидан харид қилинган Арда Туран Каталония клуби ишқибозларининг севимли ўйинчисига айланиб улгурди. Чунки у Мадридда тўп суриб юрган кезларидаёқ иқтидорли ўйинчи эканини исботлай олганди. Туран деярли ярим йил давомида янги клуби сафида майдонга тушгани йўқ. Шунингдек, бошқа клублардан тушган таклифларни ҳам қабул қилмади. Хўш, унда ярим йил мобайнида нималар билан машғул бўлди? Бугунги саҳифамизда шу мавзуга тўхталиб ўтамиз.
МАШҒУЛОТЛАРДА...
Арда Туран ўтган йилнинг июль ойида Каталониянинг «Барселона» клуби сафига ўтганди, аммо ФИФАнинг чеклови туфайли каталонияликлар Турандан фойдалана олишмади. Лекин буни қарангки, бу Ардани заррача ташвишга солгани йўқ. У «Барселона»да қолишни афзал кўрди. Ҳатто «Галатасарой» клуби қишда туркиялик футболчини ижарага олмоқчи ҳам бўлди, аммо Туран «Барселона» машғулотларида қатнашиб юришни афзал кўрди. Ўзи эса бу қарорини қуйидагича изоҳлади: «Мен тезроқ янги жамоадошларим билан тил топишиб олишим керак».
РАД ЭТИЛГАН ФУТБОЛЧИ
«Барселона» УЕФАнинг жазосидан қутулиб қолиш учун ҳар қанақасига уриниб кўрди. Ўша пайтда Алькантара жиддий жароҳат олгач, «Барселона» раҳбарияти Туранни янги мавсум қайдномасига киритиш учун рухсат сўради ва бу масалага Туркия футбол федерациясининг аралашишини ҳам хоҳлади. Аммо УЕФА ҳеч қандай илтимосномани қабул қилмади, Арда рад жавобини олди.
«РАҚАМИМНИ ОЛАҚОЛ, АРДА»
«Мен Туркия терма жамоасида «14» рақамида ўйнайман, чунки отам Йоханн Кройфнинг ашаддий мухлиси бўлган. Айнан у истагани учун мен шу рақамни танлаганман. Мадриднинг «Атлетико»сида эса 10-рақамда тўп сурганман. Шунинг учун «Барселона» билан шартнома имзолаганимдан кейин Месси ёнимга келиб, агар хоҳласам 10-рақамни менга беришини айтди, аммо мен буни истамадим», — дейди Туран интервьюларидан бирида.
ЮТУҚ ВА ЗАФАРЛАР
Бу орада «Барселона» Турансиз Европа суперкубогида «Севилья»ни 5: 4 ҳисобида мағлубиятга учратди. Туран эса жамоадошлари билан кубок ва медални ушлаган ҳолда суратга тушишга ҳақли эди, холос.
ЙИЛ ФУТБОЛЧИСИ
«Барселона» сафида тўп тепмаётган бўлса-да, Арда Туран терма жамоа сафида анчагина ютуқларни қўлга киритди. Хусусан, у 2015 йилда мамлакатнинг энг ҳурматли кишиси номини қўлга киритди. Мукофотни Ардага машҳур туркиялик баскетболчи Ҳидоят Туркўғли топширди.
ЖУРНАЛ МУҚОВАСИ УЧУН...
Йил ўйинчиси деб топилгач, Туран билан ҳамкорлик қилишни истайдиган журналлар сони кўпайди. Хусусан, «GQ» журнали Туран учун махсус тадбир ташкил қилди. Футболчи журналнинг муқоваси учун расмга тушди. Бу йилнинг энг кучли ўйинчиси учун омаднинг бошланиши эди.
АЛВЕСНИ ЕНГГАН ФУТБОЛЧИ
Машҳур футбол ўйинлари кўплаб футболчилар ҳаётининг ажралмас қисмига айланиб улгурган. Хусусан, «Барселона» футболчилари ҳам бундай ўйинларни кўп ўйнашади. Қизиғи, Туран футбол ўйинларида жамоадошларидан бир поғона устун турар экан. Жумладан, ўйинлардан бирида у Алвесни, Браво эса Неймарни, Тер Штеген Альбани мағлубиятга учратган. Туран жамоаси Алвеснинг клуби дарвозасига жавобсиз тўртта тўп йўллаган экан.
БАЗМУ ЖАМШИДЛАР ОШУФТАСИ
Арда Туран турли базму жамшидларни хуш кўради. У ҳеч қандай байрамни қолдирмайди. Шу боисданми, Арда футбол оламининг ҳақиқий ғайрат тимсоли ҳисобланади. Мадридда турли кечаларнинг доимий мижозига айланган футболчи Каталонияда ҳам бу одатини канда қилгани йўқ.
РЕКЛАМА РОЛИКЛАРИДА...
Каталонияга кўчиб ўтгач, Тураннинг иши кўпайгандан-кўпайди. Айниқса, турли реклама компанияларидан тушган таклифлар Ардада бир дақиқа бўлсин бўш вақт қолдираётгани йўқ. Айниқса, «Барселона» баскетбол клуби аъзоси Наварро ва Туран кўплаб реклама брендларининг доимий мижозига айланган. Таъкидлаш жоизки, ўз навбатида, бу Арда Тураннинг даромадларини ҳам бир қадар оширган.
ЭНГ КУЧЛИ ФУТБОЛЧИЛАР РЎЙХАТИДА
Энг кучли юзта футболчи рўйхатида «Барселона»дан жами 9 нафар ўйинчи ўрин олди. Арда Туран 62-ўринни забт этди. Шунингдек, рўйхатдан Альба (57), Пике (35), Бускетс (21), Иньеста (15), Ракитич (12), Суарес (5) ва Неймар (3) ўрин олди. Тўққизинчи футболчи ким эканини аллақачон билган бўлсангиз керак, бу — Лионель Месси. Уни алоҳида таъкидлаб кўрсатишимизнинг сабаби шундаки, Лео бу жадвалнинг биринчи поғонасини забт этди.
ТЕРМА ЖАМОАДАГИ ҒАЛАБАЛАР
Арда Тураннинг ўтган йилги асосий муваффақиятларидан бири Туркия терма жамоасининг шу йили Францияда ўтказиладиган Европа чемпионатига йўлланма олгани бўлди. Терма жамоа охирги бешта ўйиннинг тўрттасида ғалаба қозонди ва тўғридан-тўғри йўлланмани қўлга киритди. Қайд этиш керакки, жамоа бу йўлда Голландияни ортда қолдирди. Қаҳрамонимиз эса жами иккита голга муаллифлик қилди ва 5 та голли узатмани амалга оширди.
МЎМАЙ ДАРОМАД
Арда Туран йилига 11, 7 миллион евро ишлаб топади. Бу суммани ишлаш учун у футболдан ташқари турли реклама роликларида ҳам суратга тушишга мажбур. Шуниси қизиқки, футболсиз ўтган охирги 5 ой мобайнида Туран аллақачон 4, 8 миллион евро ишлаб улгурди.
«МЕН ЧЕМПИОН БЎЛМОҚЧИМАН!»
«Барселона»га шунчаки келганим йўқ. Мен кўплаб ютуқларни қўлга киритмоқчиман. «Атлетико»да ҳам ҳаммаси жойида эди, лекин «Барселона» бу «Барселона». Айни дамда машғулотларда боримни бериб ҳаракат қиляпман. Умид қиламанки, биз бу мавсумни ҳам фантастик тарзда якунлаймиз», дейди Арда Туран.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Mazmun.uz — барчаси футбол учун
