Ҳафта давомида Британ нашрлари муқовасини энг кўп безаган инсон сэр Алекс Фергюсон бўлди. Спортни ёритадиган ҳар қайси нашр борки, Фергюсоннинг "Ман. Сити" бош мураббийи Роберто Манчини ҳамда жамоа ярим ҳимоячиси Виера билан матбуот орқали олиб борган сўз жангига бутун эътборини қаратди, кўплаб саҳифаларини ажратди.
Ҳаммаси Патрик Виера берган интервьюсидан бошланди. У "Манчестер Юнайтед" ўз ветерани Пол Скоулзни яна таркибга қайтарганини "Имконсизликдан қилинган иш" деб атади. Унинг фикрича "Юнайтед" чемпионлик бахсида "Ман Сити"га қарши курашишнинг Скоулзни қайтаришдан бошқа йўлини топа олмаган.
Табиийки, бундай вазиятда сэр Алекснинг жим туришини кутиб бўлмасди.
"Майли, агар сўнги 20 йилликнинг энг яхши британиялик ярим ҳимоячини таркибга қайтариш "имконсизлик", деб аталса, биз буни тўғри қабул қиламиз. Розимиз. Лекин бу ҳақида гапирган футболчининг жамоаси таркибида "Челси"га қарши ўйинда ким ўйнади? Роберто Манчини томонидан "бу клубда у ҳеч қачон ўйнамайди", деб айтилган, олти ой умуман футбол ўйнамаган ва Аргентинада дам олиш билангина машғул бўлган футболчи — Карлос Тевез ўйнади. Хўш, "Имконсизлик" деган сўзнинг маносига ушбу ҳолат кўпроқ тўғри келмайдими. Аслида ким имконсизликдан қарорлар чиқаряпти?". Фергюсоннинг жавоби ҳудди шундай бўлди.
Фергюсон Тевезни қайтишини имконсизлик деб атаганида ҳақмиди? Менимча йўқ. У бу гапларни ўзининг ҳақ эканлигини исботлаш учун гапирдими. Менимча йўқ. Энди Ушбу иккита "йўқ"нинг сабабини тушунтираман.
Фергюсон Тевезнинг қайтишини "имконсизликдан қилинган юриш" деб атаганида ноҳақ эди. Тевез қилган ишига яраша жазо олгани ҳақида илгари ёзгандим. Унга ачиниш керак эмас. Лекин у кечирим сўраб бўлди. Керагича жазо олди. Унинг қайтарилиши мураббий томонидан чиқарилган тўғри қарор. Чунки Карлитос юқори савияли ҳужумчи. У исталган вақтда жамоанинг ўйинини кучайтиришга қодир. Ҳатто ярим йил футбол ўйнамаган бўлса-да, "Челси"га қарши ўйинда ўзини кўрсата олди. Унинг тўп узатишидан сўнг Насри ғалаба тўпини киритди. Энг муҳим ўйинлардан бирининг энг муҳим палласида! Бундай савиялаги футболчидан шунчаки кечиб юбориш — нотўғри. Юзга жахл қилиб, бурунни кесиб ташлаш керак эмас. Ҳа, Роберто вақтида юзи ҳақида ўйламади. Уни ҳеч қачон ўйнатмаслиги ҳақида гапириши керак эмасди. Лекин у кечирим сўраганидан кейин унинг қайтарилиши, иложсизлик эмас. Оддий ҳол. Фергюсон ноҳақ.
Энди иккинчи масала. Фергюсон бу гапларни ким ҳақ, қим ноҳақ эканлигига ойдинлик киритиш учун айтдими ёки бунда бошқа мақсад кўзда тутилганмиди?
Фергюсон ёш бола эмас. Футбол оламига ҳам кеча келиб қодгани йўқ. Наҳотки биргина Манчинининг "бошқа ўйнамайди" деган гапи учун, Тевезни ростдан ҳам "Ман Сити" таркибида бошқа кўриниш бермаслигига ишонган бўлса? Унчалик эмасдир? Унда нега бу даҳанаки жангни авж олдиряпти? Мана шу энг асосий савол.
Манчестернинг икки клуби ҳозир чемпионлик учун кураш олиб боряпти. Чемпионат тугашига ҳам кўп вақт қолгани йўқ. Табиийки, бутун оммавий ахборот воситаларининг эътибори ушбу қарама-қаршиликка, пойгага қаратилади. Ҳар бир футболчи, ҳар бир ўйин, эпизодларгача назардан қочирилмайди. Бу эса футболчиларга жуда катта босим юклайди. Ишонинг, Англияда футболчиларни оммавий ахборот воситаларидан изоляция қилиш имконсиз. Бизда мумкиндир. У ерда эмас.
Энди эса мақоланинг биринчи гапини яна бир бор ўқиб кўринг. Тушндингиз, а? Фергюсон ўз фаолияти давомида Венгер, Бенитес, Киган каби мураббийлар билан сўз жангларини олиб борган. Қайси мавсумда чемпионликни ким билан талашган бўлса ўша жамоа мураббийи билан. Кўряпсизми? У кучли психолог. У бутун эътиборни ўзига қаратиш йўли билан, шогирдалрини мавсуининг энг муҳим палласида босимнининг бир қисмидан бўлса-да, ҳалос қилишга уриняпти. Бор гап шу.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
