Дамир Кояшевич: «Локомотив» сафида Ўзбекистон чемпиони бўлишни ҳамда Чемпионлар лигасида ғолиб чиқишни хоҳлайман»
"Локомотив"нинг черногориялик ҳужумчиси Дамир Кояшевич яқинда "sports.uz" сайтига интервью берди. Футболчилик фаолиятини асосан Қозоғистонда ўтказган легионер тезда мухлислар меҳрини қозонди. Унинг дриблинги, алдамчи ҳаракатлари ва чап оёқда берадиган кучли зарбаси ишқибозларга маъқул келмоқда. Аммо шундай бўлдики, Кояшевич "Астана"ни тарк этиб, "Локомотив" футбол клубига келиб қўшилди. Яқинда эса "sports.uz" интернет-портали мухбири Мухтар Марданов бу футболчидан интервью олди.
- Дамир, Ўзбекистондаги илк таассуротлар қандай? Янги жамоангиз ҳақида нима дея оласиз?
- Таассуротлар фақат ижобий. Ўзбекистон худди Қозоғистон каби футбол мамлакати ҳисобланади. "Локомотив" - жуда сифатли ва аҳил жамоа. Стадионимиз чиройли, мухлисларга ҳам гап йўқ. Умуман олганда, муҳит худди Европадаги каби.
- Сиз мавсумга тайёргарликнинг деярли бутун қисмини ўтказиб юбордингиз. Бу ўз таъсирини ўтказмайдими?
- Ҳа, сиз ҳақсиз. Афсуски, йиғинларни ўтказиб юбордим, аммо ҳозир ўзимни жуда яхши ҳис қиляпман. Агар статистикага қарасангиз, бу менга умуман халақит бермаётганини кўрасиз (кулади). Жамоага ёрдам бера олишимга ишонаман.
- Қатарда "Ал Садд"дан учралган мағлубиятни қандай изоҳлайсиз?
- Қатардаги мағлубиятни ҳазм қилиш қийин бўлди. Бунинг учун мухлислардан узр сўраймиз. Лекин биз бу ўйинни унутган ҳолда олдинга қадам босяпмиз. Тез орада "Ал Садд" билан уйда ўйнаймиз ва улардан ўч олиш имкони бўлади. Уйдаги учрашувда чиройли футбол намойиш этган ҳолда ғалаба қозонишга ҳаракат қиламиз.
- Ўзбекистон ва Қозоғистон чемпионатини таққослаб берсангиз?
- Ўзбекистонда яхши футбол ўйналади, бу ерда футболчилар асосан техникага урғу беришади. Қозоғистонга келсак, у ерда легионерлар кўп ва ўйин ҳам бироз фарқ қилади.
- Миллий терма жамоангиз сафида майдонга тушиш режаси борми?
- Албатта. Олдин мени тез-тез Черногория термаси йиғинларига чақириб туришарди, аммо ҳозирга келиб вазият ўзгарди. Агар "Локомотив"да яхши ўйнаб, жамоага фойда келтира олсам, яна терма жамоага чақирилишим мумкин.
- Сизга қаерда тўп суриш ёқади? Қанотдами ё ҳужумдами?
- Мен учун унчалик фарқи йўқ. Мураббий қаерга қўйса, ўша жойда ўйнашга тайёрман. Лекин ўзимга қолса, ҳужумчи ортида ва ўнг қанотда тўп тепишни ёқтираман. Чунки айнан шу жойда ўзимни қулай ҳис қиламан.
- Жарима тўпларини яхши тепасиз. Шунингдек, Руслан Корян ҳам бу борада чакки эмас. Ўйин пайтида жарима зарбасини ким амалга оширишини қандай ҳал қиласизлар?
- Тўғри айтдингиз, Руслан ҳам жарима зарбаларини яхши тепади. Ким тепишини қандай ҳал қиламиз? Бу жуда осон: ким ўзини яхши ҳис қилаётган бўлса ўша тўп олдига келади.
- Лақабингиз "Пикси" экан? Бу нимани англатади?
- Кичкиналигимда Югославия терма жамоасида Драган Стойкович ўйнарди ва унинг лақаби "Пикси" эди. У мамлакатдаги энг яхши ўйинчи эди. Отам ҳам уни ёқтирарди. Бир кун уйда тўп тепиб юрганимда отам олдимга келиб, "Сен янги Пикси бўласан" деди. Шундан бери танишларим мени "Пикси" деб чақиришади. Бу эса менга ёқади.
- "Локомотив" мухлисларига тилакларингиз?
- Шуни айтишим мумкин, ҳали ҳаммаси яхши бўлади, чунки бизда яхши жамоа бор. Жамоам ҳар доим ғалаба қозониши учун бор кучим билан ҳаракат қиламан. Ўйлайманки, мухлислар доим биз билан бирга бўлишади. "Локомотив" сафида Ўзбекистон чемпиони бўлишни ҳамда Чемпионлар лигасида ғолиб чиқишни хоҳлайман.
Манба: lokomotiv.uz
Киритилди: 18:27, 01.04.2015. Ўқилди: 4737 марта. Фикрлар: 9 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
