Осиё Кубоги-2015да қатнашган миллий терма жамоамиз сафида энг ёрқин ўйин кўрсатган футболчи ҳақида исталган футбол ишқибозидан сўрасангиз, албатта, Сардор Рашидов деган жавобни олишингиз тайин.
Чиндан ҳам Сардор ортда қолган қитъа биринчилигида ўзини ҳар томонлама кўрсата олди ва бутун Осиёга қандай иқтидорга эга эканини намойиш қилди. Австралияда ўтган Осиё чемпионатининг терма жамоамиз иштирокидаги ҳар бир учрашувини томошабоплигини ошира олган ва асосийси ўша учрашувларда бош жамоамизнинг ижобий натижага эришишида ўзининг улкан хиссасини қўша олган Сардор ҳақида мазкур мусобқадан сўнг деярли бутун Осиёда гапира бошлашди. БАА терма жамоасида секин-аста етакчиликни қўлига олаётган Омар Абдулраҳмон билан бир қаторда ўзбекистонлик Сардор Рашидовнинг ҳам тез орада Европа миллий биринчиликларидан бирига йўл олиши мумкин экани ҳақида ОК-2015 якунига етгач қитъамиз футболи ҳақида ёзадиган деярли ҳар бир газета-ю журналда ўқиш мумкин эди.
Қитъа биринчилиги якунига етди ҳам. Футболчи ўз клубига қайтди ва янги мавсумга тайёргарлик жараёнида қатнашди. Ёш иқтидор эгаси учун чарчоқ чиқаришга фурсат бўлмади ҳам. Боиси у тўп сурадиган “Бунёдкор” учун мавсум жуда эрта бошланди. “Қалдирғочлар” Осиё чемпионлар лигаси плей-офф босқичида қатнашишди. “Ал Жазийра”га қарши кечган баҳсда Сардор жуда яхши ўйин намойиш этди ва жамоасининг мусобақанинг гуруҳ босқичига йўл олишига ўзининг муносиб хиссасини қўшди. Мазкур учрашувдан сўнг “Бунёдкор” мухлислари ҳам янги мавсумда Сардордан жамоанинг етакчисига айланиб, клубни совринлар сари бошлашни кута бошлашди.
Четдан қараганда ҳаммаси бир текисда кетаётган эди. Лекин миллий чемпионатимиз старт олди ва “Бунёдкор” ҳам ички биринчиликда, ҳам халқаро майдонда тез-тез учрашув ўтказа бошлади. Ўйиндан-ўйинга “очилиши” кутилган Сардор Рашидовнинг ҳаракатлари эса негадир ўз жозибасини йўқота бошлади. Иқтидорли ярим ҳимоячи ҳар қанча уринмасин, ўзи кутганидек ўйнай олмай қолди.
Натижада кўпчилик унинг “юлдузлик касали”га чалинганини ва шу сабабли ҳам ўйинида пасайиш кузатилганини гапира бошлади. Эмишки, Рашидов Осиё кубогидан сўнг ўзини юлдуз дея санай бошлади ва ОАВнинг мақтовидан унинг “боши айланиб” қолди.
Лекин вазиятга ўзгача назар билан қарайдиган бўлсак, гап бошқа ёқда. Тўғри, сўнгги пайтларда Сардор Рашидовнинг ўйинида чиндан пасайиш кузатилди. Сардор минглаб мухлислар ундан кутгани каби ўйнай олмаяпти. 21-рақамли футболчи ёмон ўйнаётгани ҳам йўқ. Лекин мухлислар ундан бунданда кўпроғини кутишади. У ўйиндан-ўйинга ўз ҳаракатларини “сайқаллаб” бориши, турдан-турга кучайиб бориб, кўпроқ голлар киритиши лозим. Лекин Сардорда бунинг акси кузатилмоқда.
Бунинг асосий сабаби эса – Сардор Рашидовнинг ҳеч қандай танаффусларсиз ўйнаб келаётганидир. Юқорида таъкидлаб ўтилганидек, ҳордиқ чиқаришга фурсати бўлмаган Сардор жисмонан толиқди. Ҳа, у чарчади. Ўтган йилги мавсум якунлангач, миллий терма билан Осиё кубогига отланган Сардор қитъа биринчилигидан қайтгач ҳам айтарли дам олгани йўқ. Жамоасининг муҳим учрашувларида иштирок этган Сардорнинг жисмонан чарчагани мана энди сезилмоқда. Бу эса футболчига тўлиқ куч билан ўйнашга имкон бераётгани йўқ. Шу боисдан ҳам охирги пайтларда “ўзбек Роналдуси”нинг ўйини ўзи ва мухлислари истаганидек чиқмаяпти. Лекин у асло “юлдзулик касали”га чалингани йўқ.
Яна шуни ҳам ишонч билан таъкидлаш мумкинки, Сардор ҳали яна ўз формасига қайтади. Бунинг учун унга бироз вақт керак, холос. Сўнгра ҳаммаси яна ўз изига тушиб кетади. Ҳали Ўзбекистондан порлай бошлаган янги “юлдуз” нафақат Осиё, балки Европага ҳам “нур сочади”.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
