Миллий терма жамоамиз ва Россиянинг «Краснодар» клуби ярим ҳимоячиси Одил Аҳмедов билан анчадан буён суҳбатлашишни режалаштириб юргандик. Лекин футболчининг кун тартиби қаттиқ режага асослангани учун бунинг сира иложи топилмай, интервью орқага сурилиб кетаверди. Охири ҳамюртимиз билан замонавий усулда, яъни интернет орқали суҳбатлашишга қарор қилдик...
Аввало Одил Аҳмедов ҳақидаги фактлар...
Одил Аҳмедов — футболчи, ярим ҳимоячи.
1987 йил 25 ноябрь куни Наманган шаҳрида туғилган.
2006 йилда “Пахтакор” жамоасида ўз профессионал карьерасини бошлаган. 2 марта клуб билан Ўзбекистон чемпиони бўлган.
3 марта Ўзбекистоннинг энг яхши футболчиси номига мушарраф бўлган.
2011 йилдан Махачқалъанинг “Анжи” жамоасида тўп сурган ва ўша йил якунларига кўра “Анжи”нинг энг яхши футболчиси бўлган.
2014 йилдан Россиянинг “Краснодар” клубида тўп суради.
Оилали, 2 нафар фарзанди бор.
— Аввало сизни учинчи марта “Йилнинг энг яхши футболчиси” номинациясида ғолиб бўлганингиз билан табриклаймиз.
— Раҳмат.
— Хурсандчилигингизни биринчи бўлиб ким билан бўлишдингиз?
— Тўғриси, ўша пайтда Ўзбекистонда бўлмаганим учун бу хабарни интернет орқали эшитдим. Менимча энг охирги бўлиб ўзим хабар топдим шекилли, шунинг учун хурсандчилигимни менга табрик йўллаганлар билан бўлишдим.
— “Анжи”да кўплаб дунё футболи юлдузлари тўп сурарди, “Краснодар”да ундайлар кам, бу жамоада ўзингизни қандай ҳис қиляпсиз?
— Тўғри, “Краснодар”да дунё юлдузлари кам лекин жамоавий ўйин яхши йўлга қўйилган. “Краснодар”да ишларим яхши, барча шароитлар қониқтиради. Айниқса оиламга маъқул. Иқлими юртимизникикга ўхшаб кетгани учунми худди уйда юргандек ҳис қиламан ўзимни.
— Англиянинг “Арсенал” ига ўтишингиз ҳақидаги гаплар роса болалаганди, лекин афсуски мухлисларингизнинг умиди пучга чиқди. Янги жамоангиз Европа Лигасида тўп суради, балки скаутларнинг эътиборига тушиб, Европанинг еткачи жамоаларидан такдиф тушса, ўтасизми?
— Аввало футболда ҳамма нарса биз ўйлагандек осон битиб кетавермайди. Қолаверса ўша пайтда “Анжи” жамоасига кўпроқ керак бўлганим учун ҳам кета олмаганман.«Краснодар»га ўтганимга эса ҳали кўп вақт бўлгани йўқ. Бу ерда ҳам жамоа билан ютуқларга эришишни, клуб мухлисларининг ишончини оқлашни истайман. Агар Европанинг машҳур клубларидан таклифлар бўлса, албатта хурсанд бўлардим.
— Кўпчилик сизни терма жамоадан кўра клубда яхши ўйнайди дейди, шунга муносабатингиз қанақа?
— Билмадим... Терма жамоада ҳам, клубда ҳам доим яхши ўйин намойиш этишга ҳаракат қиламан.
— Миллий футболимиз кейинги жаҳон чемпионатига чиқишига кўзингиз етадими?
— Жаҳон чемпионатига чиқиш учун қўлимиздан келган барча ишни қиламиз! Насиб қилса чиқамиз ҳам. Мухлислардан қарздормиз. Ўйлайманки, терма жамоамизни таъқиб этиб келган омадсизликлар ортда қолди.
— Ўзингизни ампулангиздаги қайси футбол юлдузига ҳавас қилгансиз?
— “Реал Мадрид”нинг афсонавий ўйинчиси Зейниддин Зиданга ҳавас қилганман.
— Бутун дунё эътиборидаги Месси ва Роналду баҳсида бу йил омад кимга кулиб боқади деб ўйлайсиз?
— Бу йил Месси Роналдуга қараганда анча яхши ўйин кўрсатяпти. Шу тарзда давом этса, менимча у яна бир бор “Олтин тўп”ни қўлга киритади.
— Футболчиларнинг карьераси қисқа. Футболдан кетганингиздан кейин сизни қайси амплуада кўрамиз?
— Ҳали узоқ йиллар футбол ўйнаш режам бор, шунинг учун футболдан кетгандан кейинги ҳаётим ҳақида ҳозирча ўйлаб кўрганим йўқ.
— Психологларнинг фикрича, нафақат футболчилар, балки футбол соҳасига қизиққанлар ҳам барча соҳаларда муваффақият қозонишга ҳаракат қиларкан... Омадингиз чопмаган пайтларда кўнглингиздан нималар кечади?
— Омадсизликни тезда унутиб, яна олдинга қадам босаман ва яна ютуқларга эришишга ҳаракат қиламан.
— Энди оилавий саволларга ўтсак, акангиз кино оламига алоқадор, уларнинг фильмдаги роллари сизга маъқулми?
— Менга-ку, маъқул. Лекин аввало кино мухлисларига маъқул бўлиши керак...
— Сизга ҳам фильмларда роль ижро этишни таклиф қилишганми?
— Қилишган. Лекин мен рози бўлмаганман. Чунки роль ўйнаш қўлимдан келмайди, ҳар бир ишни ўз профессионали бажаргани яхши. Чумчуқ сўйса ҳам, қассоб сўйсин деб бекорга айтишмайди.
— Фарзандларингизда ҳам футболга қизиқиш борми?
— Фарзандларим кўпроқ санъатга қизиқишади, амакисига ўхшагиси келади. Қайси соҳага қизиқишига қараб, барча шароитларни яратиб бераман. Чунки ўз вақтида ота-онам ҳам менга шундай имкониятларни муҳайё қилишган.
— Укангиз Азим Аҳмедов ҳам миллий терма жамоада тўп суряпти, уни қўллаб-қувватлаб турасизми?
—Узоқда бўлсам-да, қўнғироқ қилиб, керакли маслаҳатларни бериб тураман. Зарур пайтда танқид ҳам қиламан. Танқидимни тўғри қабул қилади. Ўзига яраша ютуқларга ҳам эришяпти. «Навбаҳор»нинг асосий таркибида. Шундай бўлса-да, ҳали камчиликлари кўп. Ўз устида мунтазам ишласа, келажакда ундан яхши футболчи чиқади деб ўйлайман.
— Машғулотлардан бўш вақтингизда тез-тез театр, концертларга бориб маданий ҳордиқ чиқаришингизни биламиз. Охирги марта қайси концерт ёки театрга кирдингиз? Ва, кўрган театрингиздан олган таассуротларингиз?
— Охирги марта оилам билан Муқимий театрида намойиш этилган “Антиқа совчилар” спектаклини томоша қилдик. Жонли ижрони томоша қилиш барибир завқли. Комедия жанридаги бу спектаклни томоша қилиб, ҳордиқ чиқардик.
— Суҳбатга вақт ажратганингиз учун раҳмат, сиздан янгидан-янги ютуқлар кутиб қоламиз.
— Раҳмат. Мухлислар ишончини оқлашга ҳаракат қиламиз.
Дилфуза Собирова суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
