Жорий мавсумда Наманганнинг «Навбаҳор» клуби сафида 3 нафар легионер тўп сурмоқда. Улардан бири молдовалик ярим ҳимоячи Сергей Георгиев. Миллий чемпионатимизда шу йилдан бошлаб ўйнаётган Молдова терма жамоаси хавбеги секин-аста олий лигамиз ўйинига мослашиб бормоқда. Сергейнинг майдонда ўзини аямай тўп суриши кўпчиликда яхши таассурот қолдирмоқда. Гарчи наманганликлар мағлубиятга учрашган бўлса-да (0:1), 7-тур доирасидаги Тошкентда «Пахтакор»га қарши кечган баҳсда ҳам молдовалик футболчи майдонда фаол ҳаракат қилди. Мухлисларга Сергей Георгиевни яхшироқ таништириш мақсадида XXIV миллий чемпионатимизнинг 8-тури доирасидаги «Навбаҳор» - «Насаф» учрашуви арафасида ундан интервью олдик.
- Сергей, 10 май куни клубингизни қийин ўйин кутиб турибди. Жамоа шу санада айни пайтда турнир жадвалини бошқариб турган «Насаф»ни қабул қилади. Мазкур учрашувга тайёргарлик қандай кетяпти?
- Барча ўйинларга бўлгани каби кечмоқда. Якшанба оқшомида майдонга ғалаба иштиёқида тушиб, мухлисларимизга қувонч улашишга интиламиз. Буни амалга ошириш учун барча имкониятларимизни ишга соламиз.
- Миллий чемпионатимизда биринчи марта тўп суряпсиз. Жорий мавсумнинг 7та тури ортда қолди ва ўша баҳслардан келиб чиққан ҳолда, олий лигамиз хусусида қандайдир хулосаларни чиқарса бўлади. Умуман олганда, ички чемпионатимиз хусусида нима дея оласиз?
- Ўзбекистон олий лигаси қизиқарли ва кучли экан. Шу сабабли, менда яхши таассурот қолдирмоқда. Умуман олганда, ички чемпионатинглар тўғрисида фикрим ижобий.
- Ўзбек футболи тўғрисида юртимизга келишингиздан олдин ҳам маълумотга эгамидингиз?
- Очиғини айтсам, юртингиз футболи борасида кам тушунчага эга эдим.
«Пахтакор» ва «Навбаҳор» клублари, Миржалол Қосимовни билардим, холос. Мамлакатингизга келганимдан кейин футболинглар тўғрисида кенгроқ маълумотга эга бўлиб, уни янада яхшироқ билдим.
- «Навбаҳор» таркибига қай тарзда қўшилдингиз?
- Шахсий футбол агентим бор ва у ушбу жамоадан таклиф тушаётганлиги хусусида айтди. Шундан сўнг, Ўзбекистонга келиб, «Навбаҳор» кўригида қатнашиб, клуб билан шартнома имзоладим.
- Шу кунгача «Навбаҳор»га рақиб бўлган жамоалардан қайсиниси сизда яхши таассурот қолдирди?
- Барча клубларнинг савияси бир хил даражада ва улардан бирортасини алоҳида ажратиб кўрсатолмайман. Барча жамоаларга қарши ўйнаса бўлади.
- «Навбаҳор» «Пахтакор»га қарши кечган баҳсда бошқача ўйин намойиш этди. Майдонда «лочинлар»нинг ҳар бир футболчиси, шу жумладан, сиз ҳам анча фаол тўп сурдинглар. Нима, мазкур учрашувга тайёргарлик ва иштиёқ бошқача бўлганмиди?
- Биз ҳар бир ўйинга бир хил тайёргарлик кўриб, майдонга ғалаба иштиёқида тушамиз. Шундай экан, битта учрашувга яхшироқ, иккинчисига ёмон тайёрланмаймиз. Шунчаки, «Пахтакор»га қарши кечган баҳсда очко олишни кўпроқ хоҳлагандик. Афсуски, бунинг уддасидан чиқа олмадик.
- Молдова ва Ўзбекистон чемпионатлари савиясини ўзаро таққослай оласизми?
- Менимча, ушбу мамлакатлар ички биринчиликлари ўртасида деярли фарқ йўқ. Ҳар 2 чемпионатнинг савияси тенг.
- Фаолиятингиз давомида кўплаб таниқли мутахассислар қўл остида машғулотлар олиб боргансиз. Ҳозирги устозингиз Бахтиёр Ашурматов борасидаги фикрингиз қандай?
- Бахтиёр Аъзамовичнинг собиқ футболчи бўлганлиги машғулотлар жараёнида билиниб туради. У машғулотларни кўтаринки руҳда олиб бориб, бўлажак ўйинларга иштиёқ уйғота олади. Жамоамиз аҳил ва иноқ. Умуман олганда, Бахтиёр Аъзамовични ёш ҳамда келажаги порлоқ мутахассислардан бири деб биламан.
- Миллий чемпионатимиздаги голларингиз ҳисобини қачон очасиз?
- Ўзим ҳам ўша куннинг тезроқ келишини орзиқиб кутяпман. Ўзбекистон олий лигасидаги голларим ҳисобини қанчалик тез очсам, шунча яхши (кулади). У ёғига балки голларим сони ҳам кўпайиб кетар?!
- Футболга қай тарзда кириб келгансиз?
- Ўн ёшимдан бошлаб, Молдованинг энг таниқли клубларидан бири ва кўп карра чемпиони Тирасполнинг «Шериф» академиясида таҳсил олганман. Кейинчалик ушбу жамоа таркибига қабул қилиндим. Футболчилик фаолиятимнинг асосий қисми «Шериф» билан боғлиқ. Қолган клубларда эса ижара асосида тўп сурганман.
- Миллионлар ўйинига қизиқишингизга ким сабабчи бўлган?
- Бунга оилавий муҳитимиз сабаб бўлган. Чунки, дадам ва акам ҳам футболчи бўлишган. Отам асосан ҳаваскор жамоаларда ўйнаган бўлса, акам профессионал ўйинчи бўлган. Шунинг учун бўлса керак, менда ҳам болалигимдан футболга қизиқиш уй-ғонган. Бу эса футболчи бўлишимга замин яратди.
- Сиз Молдова терма жамоаси аъзосисиз. Евро-2016 саралаш баҳсларида жамоангиз Австрия, Швеция ва Россия сингари «кўҳна қитъа»нинг кучли терма жамоалари, шунингдек, «чақилмас ёнғоқ» Черногория, сўнгги йилларда ўсишга эришаётган Лихтенштейн билан бирга «G» гуруҳидан жой олган. Бир сўз билан айтганда, гуруҳдаги рақиблар анча кучли. Бу борада нима дея оласиз?
- Ҳақиқатан ҳам, терма жамоамиз «ўлим гуруҳи»дан жой олди ва бизда 2016 йили Францияда ўтказиладиган Европа чемпионати йўлланмасини қўлга киритиш имконияти йўқ. Термамиз бош мураббийи Александр Владимирович Куртиян собиқ футболчи ва тажрибали мутахассис сифатида буни жуда яхши тушунади. Шундай бўлса-да, иложи борича ҳар бир учрашувда рақибга муносиб қаршилик кўрсатишга интиляпмиз. Албатта, бундай кучли жамоаларга қарши кечадиган баҳсларда тажрибамизни анча оширишга муваффақ бўламиз.
- Терма жамоангиз 2014 йилнинг 12 октябрида Москвада Европанинг кучли жамоаларидан ҳисобланмиш Россия билан дурангга имзо чеккан ҳолда (1:1), орадан бир ойча вақт ўтганидан кейин, аниқроғи, 15 ноябрда ўз майдонида кучсиз Лихтенштейнга имкониятни бой берди (0:1). Буни қандай изоҳлайсиз?
- Футболда кўп нарса омадга ҳам боғлиқ. Москвада ўзгача иштиёқда ўйнаганимиз боис, бир очкога эга бўлгандик. Лихтенштейнликлар билан бўлган баҳсда устунлик тўлиғича биз тарафда бўлса-да, юзага келган имкониятлардан самарали тарзда фойдалана олмадик. Меҳмонларнинг эса дарвозамиз томон йўллаган 2та зарбасидан бири гол билан якунланди. Натижада, мағлубиятга учрадик.
- Жорий йилнинг 27 март куни Кишинёвда бўлиб ўтган баҳсда Молдова терма жамоаси Швеция термасига қарши майдонга тушиб, имкониятни бой берди (0:2). Ўша учрашувда сиз захирадан майдонга тушиб, саноқли дақиқалар бўлса-да, жаҳоннинг машҳур футболчиларидан бири Златан Ибрагимовичга қарши тўп сурдингиз. Айтинг-чи, Ибрагимович мазкур ўйинда майдонда қандай жиҳатлари билан ажралиб турди?
- Нафақат Ибрагимович, балки бошқа таниқли ўйинчиларга қарши ҳам ўйнаганман. Златанга келадиган бўлсак, у ҳақиқатданам анча маҳоратли ва профессионал футболчи эканлигини бутун учрашув давомида намойиш этди. Айнан унинг «дубл»и эвазига швецияликлар ғалаба қозонишди.
- Ўзбекистон миллий терма жамоасининг ўйинларини кузатиб турасизми ва бош жамоамиз хусусида нима дея оласиз?
- Имконият туғилса, Ўзбекистон термаси ўйинларини томоша қилишга интиламан. Умуман олганда, термангиз ёмон эмас. Фурсатдан фойданиб, Ўзбекистон термасига ЖЧ-2018 саралаш баҳсларида омад ёр бўлиши ва Россиядаги мундиалда иштирок этишини тилайман. Ўзим ҳам 2018 йилги ЖЧда тўп суришни жудаям хоҳлайман.
- Футболдан ташқари, яна қайси спорт турига қизиқасиз?
- Ҳеч қайси спорт турини алоҳида ажратиб кўрсатолмайман.Телевизор орқали намойиш этиладиган барча спорт мусобақаларини қизиқиш билан кўраман.
- Футболдан бўш вақтингизни қандай ўтказасиз?
- Интернетга кираман, китоб ўқийман, кино кўраман.
- Сизга қандай жанрдаги фильмлар ёқади?
- Асосан россиялик киноижодкорлар томонидан суратга олинган уруш тўғрисидаги картиналарни томоша қиламан. Менга шундай фильмлар кўпроқ ёқади.
- Оилалимисиз?
- Ҳа, уйланганман ва бир нафар қизимиз бор.
- Оила аъзоларингиз ҳам Наманганга келишганми?
- Йўқ, рафиқам ва қизим уйда қолишган. На илож, футболчилик касбининг баъзан шундай машаққатлари ҳам бор. Баъзан оилангиздан анча вақт узоқда бўлишингиз, ўзга юртда тўп суришингизга ҳам тўғри келади.
- Шундай пайтларда футболчи бўлганингиздан афсусланасизми?
- Йўқ, аксинча шу касбни танлаганимдан хурсандман. Боиси, футболнинг орқасидан кўплаб юртларни кездим, дўстлар орттирдим, ютуқларга эришдим.
- «Навбаҳор» мухлислари анча талабчан ва жамоадан фақат ижобий натижани кутишади...
- Шундай бўлса-да, бунинг ёқимли томони ҳам бор. Боиси, ишқибозлар бизни нафақат ўз майдонимиз, балки сафарда кечаётган учрашувларда ҳам қўллаб-қувватлашмоқда. Албатта, ишқибозлар мадади остида тўп суришнинг гашти ўзгача. Бу бизга қўшимча куч-қувват бағишлайди. Ахир айнан мухлислар учун майдонга тушамиз-ку!
Мени ҳам клубимиз ишқибозлари кўча-кўйда таниб, саломлашишади, ҳол-аҳвол сўрашади, дастхат олишади, бирга суратга тушишади. Мухлисларнинг бундай муомалалари ёқимли ва ижобий ҳолат, албатта. Худо хоҳласа, уларни чиройли ўйинларимиз ва ғалабаларимиз билан хурсанд этамиз.
- Нима учун 91-рақамда тўп суряпсиз?
- «Шериф» клубида ушбу рақам остида ўйнардим. Шу сабабли, «Навбаҳор»да ҳам шу рақамли футболкани танладим. Бундан ташқари, айнан 1991 йилда таваллуд топганман. Шунинг учун бўлса керак, 91-рақамли футболкада тўп суришни афзал, деб биламан.
- Жорий мавсумда «Навбаҳор»нинг олдига қандай вазифа қўйилган?
- Ҳар бир ўйинда ғалаба қозониш вазифаси қўйилган. Шунда натижа ҳам ўз-ўзидан келади.
- Мухлисларга қандай тилакларингиз бор?
- Жамоамизни доимо қўллаб-қувватлаб туришсин, стадионни тўлдириб ўтиришсин. Биз улар учун ўйнаймиз! Бахтимизга ҳамиша соғ бўлишсин.
Маълумот учун
Сергей Георгиев
Туғилган санаси ва манзили: 1991 йил, 20 октябрь, Молдова, Кирсова шаҳри
Футбол билан 10 ёшидан шуғуллана бошлаган
Биринчи мураббийи: Виктор Литвиненко
«Шериф» футбол академиясида таҳсил олган
Амплуаси: ярим ҳимоячи
Ўйнаган жамоалари: «Шериф» (Тирасполь, Молдова) - 2008-2013 (91та ўйин, 13та гол), 2014-2015 (9та ўйин), «Тирасполь» (Тирасполь, Молдова) - 2013-2014 (4та ўйин, 2та гол), «Динамо-Авто» (Тирасполь, Молдова) - 2013-2014 (16та ўйин,1та гол) 2015 йилдан «Навбаҳор»да
Молдова ёшлар терма жамоаси (U-21) сафида 5та ўйинда майдонга тушиб, 1та гол урган.
2011 йилдан Молдова миллий терма жамоаси аъзоси
Эришган ютуқлари: тўрт карра Молдова чемпиони (2009-2010, 2012-2013), 2 карра Молдова кубоги соҳиби (2009-2010), 4 марта Молдова суперкубоги соҳиби (2003-2005, 2007), МДҲ чемпионлари кубоги соҳиби (2009)
Мухлислик қиладиган клуби: «Барселона» (Испания)
Ёқтирган футболчиси: Лионель Месси.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
