Эстония кубоги доирасидаги «Инфонет» - «Виртс» ўйини фантастик ҳисоб - 36:0 билан якунлангани ўтган ҳафта жуда кўп муҳокама қилинди. Лекин бундан 15 кунча муқаддам Австрияда кузатилган воқеа барибир, «ваҳималироқ» кўринмоқда. Мамлакат 8-дивизионида иштирок этувчи «Унтервальтерсдорф» клуби ҳал қилувчи баҳсда рақибини 42:2 ҳисобида «ер билан яксон қилди», бироқ турнир жадвалида 1-ўринни бой берди, барибир. Жамоанинг битта юқори лигага кўтарилиши учун «атиги» 9та гол етишмади...
Тўплар нисбатига эътибор
Умуман олганда, 7-дивизионнинг ягона йўлланмаси тақдири қандайдир «интрига»сиз ҳал этиб бўлинганди. Гарчи турнир жадвали пешқадамлари - «Брайтенфурт» ва «Унтервальтерсдорф» клублари охирги турга тенг миқдордаги очко ва ғалаба билан етиб келган бўлишсада, уларда тўплар нисбати турлича эди. Яъни биринчиси Қ90 кўрсаткичини ҳосил қилганди. Шундай экан, тўплар нисбати Қ43ни ташкил этаётган «Унтервальтерсдорф»да ҳеч қандай имконият қолмаганди, ҳисоб. Қисқаси, «Брайтенфурт» йигитлари ўз майдонларида ўтадиган охирги тур ўйинида 3 очко олишса кифоя қиларди. Ҳарқалай, 47та гол камомадини битта ўйинда, бошқача айтганда, 90 дақиқада тўғрилаш реал вазифа эмас. Ҳарқалай, шундай туюлди. Лекин воқеалар ривожи мутлақо ўзгача тус олди: вальтерсдорфликлар «Мёдлинг»га қарши уй учрашувининг 5-дақиқасидаёқ ҳисобни 3:0 кўринишига келтиришди. Шунинг баробарида бу орада пенальтидан фойдаланолмадилар ҳам. Қисқаси, танаффусга қадар мезбон жамоанинг устунлиги 19та голга етди. Бу вақтда «Унтервальтерсдорф»нинг асосий рақобатчиси - «Брайтенфурт» биринчи бўлимни анча кескинликда ўтказиб, рақиб дарвозасига атиги 1та гол урганди. Шу тариқа ўйин старти арафасидаги Қ47 устунлиги қандайдир 45 дақиқа ичида Қ29га тушиб қолди.
- Биз майдонда мардларча курашдик, бироқ чинакам шиддатли оқимга дуч келдик, - дея даҳшат билан гапирди ўйиндан сўнг «бурдалаб» ташланган «Мёдлинг»нинг 50 ёшли мураббийи Михаэль Канюка. - Бу худди Австрия АҚШга қарши урушга киришгандек гап... Айтиш жоиз, «Мёдлинг» қандайдир сабабга кўра, ўйинни 10 киши бўлиб бошлади. Боз устига, футболчилардан бири айнан шу мураббий эди. Қисқаси, Канюка ўша куни мажбурликдан майдонга тушди. Қолаверса, жамоа дарвозабони сал олдинроқ сафдан чиққанди, шунинг учун унинг ўрнини асли ҳужумчи ҳисобланган футболчи эгаллади. Ҳа, ўйин сценарийси олдиндан комедия жанрига мос келаётганди.
Ўйин келишилмаганми?
Танаффусдан сўнг мезбонлар янги куч билан меҳмонларни «калтаклаш»да давом этишди. Оддий ифода этганда, «Унтервальтерсдорф» футболчилари тўпни олиб қўйишлари ҳамон марказ бўйлаб олға бориб, навбатдаги голни уришди. Кейин тўпни дарҳол яна марказий доирага келтириб, рақибни ўйинни тезроқ давом эттиришга ундайверишди. Гўёки, ҳаммаси қайта-қайта такрорланаётгандек эди.
- Ўйин айтайлик, 65:2 ҳисобида тугаши ҳам ҳеч гап эмасди, - деди антиқа «комедия»ни бошқариб борган ҳакам Кенан Коу. - Лекин меҳмонлар дарвозабони камида 15та хавфли зарбани бартараф этди. «Мёдлинг» иккинчи бўлимда шунчалик журъат топдики, 2та самарали қарши ҳужум ташкил этишни ҳам уддалади. Аслида бу ҳолатларда меҳмонларнинг гол уришлари ортиқча қийинчилик туғдиргани йўқ. Зеро, мезбонлар бутун жамоа бўлиб, ҳужумга ўтиб кетишганди. Умуман, «Унтервальтерсдорф» 90 дақиқа давомида атиги 2 нафар ҳимоячига таянди. Якунда регбига хос натижа юзага келди - 42:2. Голлардан нақ 11таси чемпионатнинг энг яхши тўпурари Кустрин Фетахажа ҳисобига ёзилди.
- Ҳисоб 8:0га етганидан кейиноқ кимдир ўйинни видеотасмага тушириши лозимлигини айтдим, - дея ҳаммаси қоида доирасида бўлганини таъкидлади «Унтервальтерсдорф» мураббийи финал ҳуштаги янграганидан сўнг. - Энди эса бизни келишиб ўйнаганликда айблашади. Аслида майдонда соф кураш борди...
«Брайтенфурт» вакиллари эса бундай гапларга ишонишмаяпти ва ҳаммасини футбол судига ҳавола этмоқчилар.
- Вальтерсдорфда рўй берган воқеа - бутун Австрия футболи учун шармандалик, - дея айюҳаннос солди «Брайтенфурт» президенти Герхард Кубин. - Иккинчи бўлим давом этаётган пайт менга қўнғироқ қилиб, «Унтервальтерсдорф» ақлга сиғмайдиган 39:1 ҳисобида ютаётганини айтишди. Ўша пайт жоним бўғзимга келди, гўё. Агар рақиб биздан ўтиб кетганда, албатта, шикоят ёзардик.
Асосийси, мухлислар ўйин атрофида алоҳида текширув ишлари олиб бориб, ноодатий «комедия»нинг ҳар икки иштирокчисини жарима билан «сийлаш»ни сўрашмоқда. Бироқ лига раҳбариятининг қандайдир кескин чора қўллаш-қўлламаслиги аниқ эмас. Ҳа, 90 дақиқа давомида 42та гол уриш (қўйиб юбориш ҳам) - фантастика. Аммо шуниси борки, «Унтервальтерсдорф» 47та гол фарқи билан ғалаба қозониши керак эди, аммо Қ40 кўришинидаги устунлик билан чекланди. Қолаверса, «Мёдлинг» чиндан ҳам, ўта кучсиз: у 26та турда атиги 2 очко олди, тўплар нисбати эса 10:223 (!)ни ташкил этди...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
