«Қироллик клуби»нинг португалиялик суперфорварди Криштиану Роналду тўғрисида бугун жаҳон ОАВлари шунчалик кўп ва хўп ёзишяптики, қайси бири ҳақиқат эканлигини ҳам билмай қоласан киши. Шу жиҳатдан олиб қараганда, Мадридда чоп этиладиган Маrcа ва АS спорт нашрларининг мавзуга оид чиқишларида жон бордай туюлади.
ҚИММАТГА ТУШГАН ҲАЗИЛЛАР
Жаҳонга танилган йиллари давомида португалиялик форвард у ҳақда фақат илиқ сўзлар айтилмаслигини аллақачон англаб етиши керак эди. Жумладан, қазғоққа қарши қўлланиладиган шампунни реклама қилганида, уни мазах қилганлар топилди. Янги автомобили устига кимдир сут тўкиб юборганида эса роса хохолашди. «Атлетико»дан қабул қилиб олинган қақшатқич зарба (0:4)дан кейин туғилган кун нишонлаши эса Криштиануга қимматга тушди. Вақт ўтгани сайин ҳаммаси унутилиб кетаёзган эди-ю, аммо мавсум охирида Херар Пике ўз микроблогида ёзган сўзлари билан оловга ёғ сачратгандай бўлди: «Биз дунёдаги энг яхши жамоамиз! Ҳаммага раҳмат. Кевин Рольданга эса алоҳида ташаккур». «Барса» ҳимоячиси бу билан ўша кунги туғилган кун оқшомида куйлаган колумбиялик қўшиқчига имо қилиб қўйгандай бўлди. АSнинг таъкидлашича, Роналдуни бу сўзлар эмас, Мадрид клуби раҳбариятининг жамоа юлдузи ҳимояси учун бармоғини ҳам қимирлатиб қўймаганлиги хафа қилган. Шу билан бирга, португалиялик футболчи «Реал»нинг муваффақиятсизликларида фақат у асосий айбдорга айланиб қолаётганидан чарчаган.
ДЎСТЛАР
Икер Касильяс ва Серхио Рамос португалиялик юлдузнинг «Реал»даги энг яқин дўстлари саналишади, аммо бугунга келиб уларнинг ҳам ишларини яхши деб бўлмайди. Ҳимоячи клуб билан шартномани узайтириш тўғрисида ҳеч келишолмаётган бўлса (мазкур жараённинг бориши ҳақида эса кенг жамоатчилик аллақачон бохабар бўлиб улгурган), мадридликларнинг кўп йиллик сардори ўз ўрнини Давид де Хеага бўшатиши учун унга очиқ эшикни кўрсатиб қўйишмоқчи. Роналду дўстларини ҳимоя қилиш учун Флорентино Перес билан гаплашиб олишга бир неча бор уринди, аммо бундан ҳеч қандай натижа чиқмади. Юқоридаги футболчилар Криштианудан бир неча ёшгина катта эканликларини ҳисобга оладиган бўлсак, Рони уларнинг тақдирида ўзининг келажагини кўраётган бўлса не ажаб.
ДОН КАРЛО ВА СИНЬОР РАФА
Икки мавсум давомида «Реал» етакчиси ва Карло Анчелотти ўзаро илиқ муносабатда бўлганликлари ҳеч кимга сир эмас. Улар тез-тез жамоадаги ишлар ҳақида дилдан суҳбат қуришлари хусусида гап-сўзлар юрарди. Дон Карло истеъфога чиқарилганида эса Dоп ВаLоп нашри форварднинг ўзи ҳам италиялик мутахассис ортидан бугун-эрта клубни тарк этиши тўғрисида ёзди. Яна айтишларига қараганда, Роналду жамоанинг ҳозирги мураббийи Рафа Бенитес фаолиятидан у туманли диёрда ишлаб юрган кезларидаёқ норози бўлган. Испаниялик мутахассис янги лавозимга тайинлангунга қадар эса мадридликларни унинг номзодига қарши қайрашга уринган.
ШИФОКОРЛАР
Маrcа нашрининг маълумотларига кўра, «Реал» тиббиётчилар штаби раҳбари Хесус Ольмо жамоанинг барча ёши катта футболчилари орасида салбий фикр уйғотган. Унинг реабилитация ва жароҳатдан кейинги тикланиш жараёнига қаратилган услублари ҳаммага ҳам бирдай тўғри келавермайди. Шунга қарамай, футболчиларнинг шикоятлари ҳавога учиб кетди ва Ольмо билан шартнома яна бир мавсумга узайтирилди.
РАШК
Яқин-атрофда Месси бўлмаган тақдирда, фақатгина у бутун курраи заминда энг ёрқин юлдуз эканлигига Роналдунинг ишончи комил. Аммо Бенитес тузатиб бўлмас хатога йўл қўйди яъни, у португалияликни ҳужум марказига, Гарет Бейлни эса қанотга қўймоқчилигини таъкидлади. Бу каби ўзгартишлар форварднинг режаларига умуман кирмаган бўлса ҳам керак, аниқроғи у испаниялик мураббийдан бу масалада ўзаро мулоқотни кутгани аниқ. Суҳбат эса бўлмади, бироқ мадридликлар устози шахсан Кардиффга - Криштианунинг уэльслик ҳамкори билан гаплашиб олиш учун йўл олди. АSнинг ёзишича, бу даражадаги менсимасликни мадридликлар етакчиси асло кўтара олмади ва синьор Пересга навбатдаги шикоятни жўнатди.
РОНАЛДУ ҚАНЧА МАОШ ОЛАДИ?
Мundо Dероrtivо ва Dоn Ваlоn маълумотларига кўра, «Реал»нинг энг кўп маош оладиган футболчиси айнан Криштиану Роналду ҳисобланади. Барча солиқларни чиқариб ташлаганда, у йилига 17 миллион евро эгасига айланмоқда. Жамоада эгаллаб турган ўрнидан норози бўлган ҳимоячи Серхио Рамосга эса «бор-йўғи» 5,5 млн. тўлашмоқда. Фахрий футболчи Икер Касильяс маоши 7,5 миллионга тенг.
Манба «СЭ»,
У.УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).