2 август куни олий лигада иккинчи давра ўйинлари бошланади.
"Пахтакор" 16-турда Олмалиққа сафар уюштиради. Биринчи даврани 6-поғонада якунлаган Игорь Шквирин шогирдлари Чемпионлар лигасида иштирок этиш ҳуқуқини берадиган ўринлардан бирига даъвогарлик қилишмоқда. Жамоа 15 баҳсда 28 очко тўплаган.
Иккинчи давра арафасида "Олмалиқ" белоруссиялик дарвозабон Валерий Фомичёв, ҳимоячи Саидкомил Акбаров ва Обид Жўрабоев, ҳужумчи Алишер Шоғуломов билан шартнома имзолади.
Жамоалар олий лигада 15 бор тўқнаш келишган. "Пахтакор" ушбу рақибни 10 марта мағлуб этган. 2та ўйинда дуранг натижа қайд этилган. "Олмалиқ" 3 марта ғалаба қозонган. Жамоамиз 23, рақиб 8 тўп киритган. Биринчи турда Тошкентда ўтган баҳсда Пиримов ва Сергеевнинг голлари эвазига 1:1 ҳисоби кузатилган.
Олмалиқда бўлиб ўтган 7 ўйинда мезбонлар 2 бор ғалаба қозона олган. Бешта ўйинда эса "Пахтакор" зафар қучган.
Ёшлар таркиблари 1 август, шанба куни "Металлург" стадионида соат 17:45да ўйинни бошлашади. Асосий жамоалар эса 2 август, якшанба куни ОКМК стадионида соат 19:30да старт олади. Учрашувни Вадим Агишев бошчилигидаги ҳакамлар гуруҳи бошқариб боради.
"ОЛМАЛИҚ" - "ПАХТАКОР"
Ҳакамлар: Вадим Агишев (Тошкент), Маъмур Саидқосимов (Тошкент), Олим Абдувасилов (Тошкент), Олим Туйчибоев (Тошкент).
Назоратчи: Артём Арутюнов (Тошкент)
Матнда хатолик топсангиз, ўша хатони белгилаб, бизга жўнатинг (Ctrl + Enter).