Трансфер мавсуми бир қанча кутилмаган воқеаларга бой бўлиши табиий. Бир клубнинг футболчилардан бирига оғиз солиши оддий ҳолат, жамоанинг ўз ўйинчисини бошқа клубга таклиф қилиши эса бироз ноўринроқ, қайси маънодаги бу футболчи учун ўта хунук ҳолат. Аммо яқинда содир бўлган воқеа шунчалик шармандали эдики, юқоридаги ҳолат ҳеч нарса бўлмай қолди.
Гап айни дамда «Ливерпуль» клубига умуман керак бўлмай қолган ва жамоа раҳбарияти томонидан чиқиш эшиклари кўрсатилган Марио Балотелли ҳақида кетяпти. Маълумотларга қараганда, италиялик ҳужумчи Англияда қиладиган иши қолмаганидан кейин ўзига жамоа қидиришга тушган. Биз назарда тутган воқеа эса ана шу жараён билан боғлиқ, Марио Миланнинг «Интер» клубига ўзини сотиб олишни таклиф қилди ва рад жавобини олди. Ҳа, айни дамда ишлари унчалик яхши кетмаётган, ўтган мавсум омадсизликлар гирдобига тушиб қолган ва, албатта, яхши ўйинчига муҳтож бўлган жамоа Балотеллини ўз таркибига қўшиб олишни истамади. Бундан кўриниб турибдики, айни дамда Марио Европада кучлилар у ёқда турсин, ҳатто яхши футболчилар сирасига ҳам кирмай қолибди.
ОСИЁДАН ТАКЛИФ БОР, ЛЕКИН...
Тўғри, Марио жамоасиз қолиб кетмаслиги мумкин, чунки унга таклифлар йўқ эмас. Хусусан, Осиёнинг бир қатор клублари италиялик футболчига қизиқиш билдиришмоқда. Аммо Балотеллининг ўзи бу таклифларни рад этяпти. Бунинг сабаблари бор, албатта. Биринчидан, Осиё футболи Европа даражасида эмас, Осиёдаги мусобақалар Европадаги турнирларда ўйнашга ўрганиб қолган футболчига хуш келмаслиги табиий. Иккинчидан, айни дам Европада тўп сурадиган футболчилар ёши бир жойга бориб қолгандан кейингина Осиё ва АҚШга йўл олишмоқда. Балотелли эса ҳали ёш, эндигина 25 га кирди. Бу ёшда эса футболчи ривожланиш чўққисига чиқиши керак.
«ЮЛДУЗЛИК КАСАЛИ»НИНГ БАДАЛИ
Хўш, нега Марио бундай аҳволга тушиб қолди? Яқин-яқинда «Супер Марио» дея таъриф бериладиган футболчи нима учун ҳозирда кераксиз ўйинчига айланиб қолди?
Бу саволларга турлича жавоб қайтариш мумкин. Кимдир Марионинг тақдиридаги нохушликларни унинг аянчли ўтмиши билан боғлайди. Ҳаёт ташвишларига эрта дуч келган, болаликнинг қувноқ лаҳзаларани фақат тушида кўриб, уйғонганида эса ташвишлар-у машмашаларга дуч келган болакай аламини футболдан оляпти, жаҳлдорлигига ҳам айнан шу жиҳат сабабчи, дея тахмин қилишади баъзилар. Аммо бу сабаб бўла олмайди. Мариянинг майдон ва майдондан ташқаридаги ҳаракатларида кўпроқ аламзадалик эмас, манманлик акс этиб турарди. Унинг турли хурмача қилиқлари нафақат жаҳлдорлик, балки кибрлиликнинг ҳам оқибати эди.
КЎЗГА ТАШЛАНМАГАН ИҚТИДОР
Баъзан футболчини у ҳақдаги турли миш-мишларнинг ўзиёқ машҳур ўйинчига айлантириб қўяди. Балотелли ҳақида ҳам худди шундай дейиш мумкин. Негаки у фаолияти давомида қайси жамоаларда тўп сурган бўлса, мақташга арзигулик каромат кўрсата олмади. Шунчаки оддий ҳужумчи нима қилиши керак бўлса, шуни амалга оширди. Мавсум охирида уни алоҳида тилга олишмади, тўпурарлик борасида-ку гапирмаса ҳам бўлади. Тўғри, «Милан»нинг «Интер»и билан яхши натижаларни қўлга киритди, лекин бунда унинг эмас, кўпроқ итальян клубининг ўша вақтдаги мураббийи Жозе Моуриньюнинг хизматлари каттароқ. Португалиялик мутахассис Миланда олиб борган икки йиллик фаолияти давомида Мариодан супер ҳужумчи ясашга уриниб кўрди, лекин бунинг уддасидан чиқа олмади. Оқибатда Балотелли жамоасини алмаштиришга мажбур бўлди.
ОМАДСИЗЛИКЛАР ДАВОМ ЭТАДИ
Марио Балотеллининг кейинги клуби — «Манчестер Сити» ҳам ундан унчалик қониққани йўқ. Тўғри, баъзи-баъзида гол киритиб турган ҳужумчи мухлислар-у мураббийларнинг эътирофига сазовор бўлди, аммо кейинчалик нурсиз ўйинлари билан бу ютуқларини ҳам йўққа чиқаради. Аксига олиб, айнан шу ерда Марионинг беўхшов қилиғи — гол урганидан кейин футболкасидаги «Нега доим мен?» ёзувини кўз-кўз қилиши кўпчиликка хуш келмади. Бу ҳақда ўша вақтда «шаҳарликлар» устози ҳисобланган Роберто Манчинининг фикрини сўрашганида у: «Балотеллига кўп бора айтдим, аммо у бу қилиғини ташламади. Тўғриси, камдан-кам гол урадиган футболчига бундай қилиқ ярашмайди. Бунинг учун Роналду ёки Месси бўлиш керак, аммо улар ҳам бундай йўл тутишмайди». Манчинининг фикрларида жон бор эди, Марио ўз ўйинига жуда юқори баҳо берарди.
ЎЗБОШИМЧАЛИКЛАР
Машғулотлар пайтида италиялик футболчининг ўзбошимчаликлари ҳаддан ортарди. Хусусан, турли видео ва расмларда Марионинг бош мураббий кўрсатмаларини бажармаслигини, жамоадошлари машқ қилаётган бир пайтда шунчаки ётганини, умуман, маълум тартиб-қоидаларга риоя қилмаслигини кўриш мумкин эди. Бу эса ҳар қандай инсоннинг жаҳлини чиқарарди. Эҳтимол, шунинг учундир, Балотеллининг навбатдаги миссияси ҳам узоқ давом этмади. Роберто Манчини билан ёқалашиши ва бошқа кўнгилни хира қиладиган ҳаракатлари сабаб Марио «Милан»га сотиб юборилди. Бироқ бу сафар ҳам унинг боши муаммолардан чиқмай қолди. Шундоқ ҳам муаммолар гирдобида қолиб кетган «Милан» учун янги харид қилинган ва катта умид боғланган футболчининг нурсиз ўйини умуман кераксиз ҳолат эди. «Милан»да Марионинг фақат бир ҳаракати эслаш мумкин — Балотелли жамоани Кларенс Зеедорф бошқараётган пайтда рақиб дарвозасини узоқ масофадан ишғол қилганди. Ўшанда кўпчилик «Балотелли қайтди», деб ҳисоблади, лекин, афсуски, бундай бўлмади.
ТЕРМА ЖАМОАДАН ҚУВИЛИШ
Италия терма жамоасини қабул қилиб олган Антонио Конте терма таркибини ўзгартирди. Энди унга фақат жамоага фойда келтириши мумкин бўлган ўйинчилар керак эди. Балотелли эса бу таркибга сиғмай қолди. Антонио уни умуман кераксиз деб ҳисоблади. Бу эса эндигина 25 ёшга тўлган, илгари терма сафида тўп сурган, ҳали келажаги олдинда бўлган футболчи учун фожианинг ўзгинаси эди. Афсуски, бу ҳам Мариога сабоқ бўлмади. Аксинча, у омма эътиборини ўйини билан эмас, турли гаплари билан тортишда давом этди. Айниқса, унинг «Олтин тўп» соврини Мессига насиб этганида «Бу йил фақат Месси мендан яхшироқ ўйнади» ёки бу совринни Роналду қўлга киритганида «Бу мавсум фақат Криштиану мендан кучлироқ эди», деган жумлалари футбол мухлислари ва мутахассисларининг энсасини қотирарди, холос. Балотелли эса бундай гапларни гапиришдан тўхтай демасди.
ҚУЮШҚОНДАН ЧИҚИШ
Балотеллининг «Ливерпуль»га ўтиши кўпчилик учун кутилмаган ҳол бўлди. Чунки аксарият мухлислар Марио ўртамиёна жамоалардан бирига ўтса керак, деб ўйлаганди, боиси Марио сўнгги пайтлардаги ўйини билан «Ливерпуль»да ўйнашга нолойиқ эди. Лекин Брендан Рожерс Мариога яна бир карра имкон берди ва шу пайтга қадар унга ишонган мураббийлар каби хатога йўл қўйди. Аксига олиб, Марио «Ливерпуль»нинг тирик афсонасига айланиб улгурган Стивен Жеррардга қўл кўтарди, буни эса мухлислар ҳам, мураббийлар ҳам кечиришмади. Энди эса «Ливерпуль» футболчидан тезроқ қутулишни ўйламоқда.
Шуни алоҳида таъкидлаш керакки, Марио Балотелли учун ҳали ҳаммаси олдинда. У ёш ва кучга тўлган, маҳорати ва иқтидори етарлича. Фақат ҳозирда кўчада қолишига сабаб бўлган характерини ўзгартирса бўлгани. Ана шунда биз яна ўша супер Мариони кўра оламиз.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ал-Ҳилол
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
