Феъл-атвори португалиялик Жозе Моуриньо каби кишиларни бизда нима деб аташади? Унинг характерини бир сўз билан ифодалаш мумкинми, ўзи? Фикримизча, Моуриньо «арининг уясига чўп тиқиш»ни ёқтирадиган кимсалар тоифасидан. Бўлмаса, кераксиз вақтда кераксиз жойда жанжал кўтаришнинг нима кераги бор эди? Келинг, яхшиси ҳаммасини бир бошдан бошлайлик...
Англия чемпионати. Биринчи тур. «Челси» - «Суонси». Учрашувнинг 52-дақиқасида мезбонлар посбони Тибо Куртуа ўз жарима майдони чегарасида қўполлик ишлатиб, Бафетимби Гомиснинг йиқилишига сабабчи бўлди ва ҳақли тарзда майдондан четлатилди. Ҳакам «қизил» билан чекланиб қолмай, пенальти белгилади. Уни «жабрдийда»нинг ўзи амалга ошириб, мувозанатни тиклади - 2:2. Ўйиндан сўнг «Челси» четлатишга боғлиқ вазият юзасидан апелляция берди, аммо у қондирилмади. Бироқ ҳозир гап бунда эмас: ўйиндаги энг қизиқарли ҳолат 84-дақиқада, телекамералар нигоҳидан четроқда рўй берди. Худди шу дақиқада «Челси» етакчиси Эден Азар рақиб жарима майдонига яқинлашаётиб, Гилфи Сигурдссондан ўтиб кетмоқчи бўлди. Лекин исландиялик футболчи «Челси» хавбегининг белидан тутиб қолиб, уни йиқитди. Вазият «Челси» учун ўта таҳликали бўлгани боис (илк турдаёқ очко йўқотишни Моуриньо хоҳлармиди? Боз устига, «Суонси»га қарши ўйинда-я?!), Азар тезда майдонга қайтишга мажбур эди. Чунки «Челси» шундоқ ҳам майдонда бир киши кам бўлиб қолганди. Шундай бир пайтда Йон Фирн ва Ева Карнейролардан иборат «Челси» шифокорлари ҳакамдан рухсат олиб, майдонга чопиб чиқишди ва бельгиялик футболчини четга олиб чиқиб, ёрдам кўрсата бошлашди. Бу - одатдаги ҳолат, шундай эмасми? Жозе Моуриньо эса бундай деб ўйламаяпти.
«Очиғи, мен тиббиёт ходимларимизнинг ҳаракатларидан норозиман. Чунки сен захира ўриндиғида ўтирган шифокор ёки матбуот котиби бўлсанг ҳам аввало футболни тушунишинг шарт. Бундай жонкуярлик ярамайди. Шифокорлар эса футболчининг соғлиғи чиндан ҳам хавф остида бўлгандагина майдонга чиқишлари лозим. Аминманки, Азар ўша вазиятда жиддий жароҳат олмаганди ва бир неча сониядан сўнг ўйинни давом эттирарди. Керагидан ортиқ эътибор туфайли мен майдонда саккиз ўйинчи билан қолиб кетдим. Ваҳоланки, вазият ўта қалтис эди», - деди мутахассис ўйиндан кейинги матбуот анжуманида.
Эҳ, бу гибралтарлик мафтункор хоним-эй! Нима учун бунгачалик куючаклик қилди-а?! Ёки у ўзининг касбига содиқлигини, «Челси»да шунчаки, маош олмаётганини кўрсатиб қўймоқчи бўлдимикан? Ундай десак, бунақа ҳолатда исталган клуб шифокори ҳам худди шундай йўл тутган бўларди-да! Айтайлик, Ева футболчига эътибор бермай жойида ўтираверганда, Азарнинг жароҳати эса жиддийроқ бўлиб чиққанда нима бўларди? Шубҳасиз, жамоа камида уч ҳафтага етакчи футболчисидан айриларди. Моуриньонинг жазаваси эса бундан баттар бўлардики, асло кам бўлмасди.
Айтганча, «Беназир» нега айнан Карнейрога заҳрини сочди? Ахир, биринчи бўлиб майдонга терапевт Йон Фирн югуриб чиқдику! Жавоб аниқ: Йон эркак киши ва у билан бўладиган жанжал умуман шов-шувли чиқмайди. Ева билан эса исталганча тортишиш мумкин. Зеро, айни кунда футбол оламидан ундан кўра машҳурроқ аёл йўқ ҳисоби.
Энди Моуриньонинг эътирозидан кейинги кичик «театр саҳнаси»га эътибор қаратамиз. Мураббийнинг ғазабланишидан сўнг унинг олдига биринчи бўлиб Карнейро қайтиб келди ва овозини анчагина баландлатиб жавоб қайтарди. Португалиялик мутахассис эса ҳиссиётларини жиловлай олмай, ўз тилида filha de puta (бу жумланинг маъноси ўта ҳақоратли бўлгани учун таржима қилмасликни лозим топдик) деб юборди. Агар шу воқеа бундан 10 йиллар илгари бўлганида ҳам, ҳеч ким ортиқча эътибор қаратмасди. Лекин испан нашрлари (аниқроғи, Marca) дарҳол вазиятни оммага эълон қилиб юборди. Уларга нима, нашр нусхалари кўпроқ сотилса, бўлди-да! Дарвоқе, шу пайтда келиб чиқиши британиялик бўлган иккинчи шифокор ортиқча ҳиссиётларга берилмай, жаҳлга минган Моуриньонинг кўзига кўринмай қўя қолди.
Ким билади дейсиз, худди шу сабаб бўлди-ю, клуб раҳбарияти Карнейрони маълум даражада ўз вазифасидан четлатди. «Маълум даражада» деганимизни шундай тушуниш керакки, Ева бундан буён ҳам «Челси» ходими бўлиб қолаверади, аммо у энди машғулотлар, ўйинлар ва футболчилар жойлашадиган меҳмонхоналарда кўринмаслиги шарт. Фирнга эса бу чекловлар дахл қилмайди.
Мазкур шов-шувли тақиқдан кейин Азар дарҳол чиқиш қилиб, ўзи тушиб қолган вазият унчалик қўрқинчли бўлмасада, Ева фақат ўз зиммасидаги вазифани бажарганини таъкидлади. Қизиғи, ҳатто шу изоҳ ҳам «Челси» «босс» ларига кор қилмади. Бироқ «босслар»нинг «босси» бўлмиш Роман Абрамовичга Моуриньонинг ҳаракатлари сира ёқмади. Энди бу келажакдаги муносабатларга қандай таъсир кўрсатади - яқинда билиб оламиз.
Албатта, Карнейро кутилмаган воқеадан сўнг янада машҳурлашиб кетганидан хурсанд деб айта олмаймиз. Лекин Моуриньо ҳавридан тушгандан сўнг доктор билан яккама-якка гаплашиб, ундан бир оғиз узр сўраб қўйса, асакаси кетмасди.
Ҳозир Карнейрони Facebook тармоғида минг-минглаб кишилар қўллаб-қувватлашмоқда. Ева эса уларга миннатдорчилик билдириш билан овора. Унинг тарафини олаётганлар сафида футбол шифокорлари Ассосиацияси раҳбари Имонн Сэлмон ҳам бор. Унинг фикрича, инсон соғлиғи ҳар қандай ўйин, мусобақа ва ҳисобдан устун туради. Албатта, у буткул ҳақ. ФИФА бош шифокори Иржи Дворжак ҳам Моуриньони танқид қилиб, Карнейро ўзи масъул бўлган бурчни амалга оширди деб ҳисоблашини эълон қилди. Шунингдек, у сўзлари орасида «мураббийлар тиббиёт соҳасига аралашмай, ўз тактикалари ҳақида ўйлашсин», деб қўшимча қилишни ҳам унутмади.
«Бизнинг фикримизча, Карнейронинг «Челси» иштирокидаги ўйинлардан четлатилиши - ўта ноҳақлик. Чунки ўша вазиятда тиббиёт ходимларини майдонга бош ҳакам чақирганди. Агар Ева ва Йон бундан бош тортишганида, улар мижозлар олдидаги бурчларига амал қилмаган бўлишарди. Ҳозир Евага жуда оғир. Зеро, у ўз вазифасини сидқидилдан бажаргани учунгина ОАВнинг ҳаддан зиёд эътиборига тушиб қолди ва ҳаттоки касбини ўзгартириш ҳақида ўйламоқда. Биз буни тиббиётга нисбатан ҳақорат деб ҳисоблаймиз. Ўз навбатида, АПЛ шифокорлари уюшмаси Карнейрони тўла қўллаб-қувватлашини маълум қиламан. Эслатиб ўтишим лозим, футболчининг саломатлиги ҳар қандай натижадан устун туради. Кейинги ўн йилликда премьер-лигада спортчиларга тиббий хизмат кўрсатиш улкан ривожланишга эришди. Аммо содир бўлган бу воқеа мазкур йўналишда ҳали амалга ошиши лозим бўлган ишлар кўплигини кўрсатиб берди. Биз истардикки, врачларнинг ўрни премьер-лигада кейинчалик муносиб баҳоланиши керак ва уларга ҳеч бир клуб ортиқча тазйиқ ўтказмаслиги лозим», - деди АПЛ врачлари уюшмаси бошлиғи Марк Жиллетт.
Шу билан бирга, Моуриньонинг тарафдорлари ҳам йўқ эмас. Масалан, яқин ўтмишнинг энг машҳур футболчиларидан бири бўлган Гари Линекер BBC телеканалида кўриниш бериб, одатдагидек, ёдда қоладиган ибораларни тилга олди: - «Челси»да шифокорлик вазифасини эгаллайдиган одам албатта, футболни чуқур тушуниши шарт. Тиббий билимлар эса иккинчи даражада!». Қизиқ, Линекернинг бу баёноти можарога янги саҳифа очиб бермасмикан?!
41 ёшга кирган, аммо ҳали-ҳамон латофатли Карнейро хоним эса воқеалар ривожидан тушиб қолиб, таътил олади ва нохушликни унутиш учун бирор кўнгилочар масканда ҳордиқ чиқаради деб ўйласангиз, янглишасиз. Айни пайтда Ева ўзини ҳақорат қилишларига йўл қўйиб берган «Челси» клубини судга бериб, товон ундириш пайида юрибди. Бунинг учун унга кимлар ёрдам беришмоқчи денг? Шаҳзода Чарлининг ҳуқуқларини ҳимоя қилиш билан шуғулланувчи бир гуруҳ машҳур адвокатлар! Кўриниб турибдики, тез орада Роман Абрамовичнинг сочларида оқлар кўпайиб кетса, ҳайрон бўлмаймиз. Буларнинг барига эса ўзбошимча мураббий сабабчи бўлади.
Хуллас, бу масала ҳали-бери тўхтаб қолмайди. Чунки Моуриньо иштирокидаги аксарият можаролар «Эскирмайдиган мавзу» тоифасига киради. Қани кўрайликчи, еврофутболдаги энг шов-шувли жанжалларнинг бири қандай якун топаркин?! Айтганча, тез орада Фулхэм-Роуд кўчаларидаги фаррошлар ҳам ерга супурги текказишдан олдин икки-уч марта яхшилаб ўйлаб олишса, ажабмас. Чунки «Овқат еб оғзи куйган қатиқни ҳам пуфлаб ичади». Айтинг-айтинг, тақдирнинг ҳазили билан бундай «қайноқ овқат» еган одам Моуриньонинг ўзи бўлиб чиқмасин...
Манба: Chempionat.com
И.РАҲИМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
