Англия премьер-лигасининг сўнгги мавсумлари бир жиҳати билан кўпчиликнинг эътиборини тортмоқда. Гап шундаки, элитанинг янги вакиллари олий дивизиондаги ўринларини сақлаб қолишолмасада, фаолиятининг асосий қисмини омадсиз ўтказган маҳоратли ҳужумчиларнинг барқарорликка эришишларига замин ҳозирлашмоқда.
Бу ҳолат чемпионат баҳсларида асосан хорижий футболчилар хизматидан фойдаланишга ўрганган «Арсенал» менежери Арсен Венгерни ҳам бир муддат ўйлантириб қўйди. Франциялик мутахассисни «Саутгемптон»даги ёрқин иштироки орқали миллий терма жамоадан чақирув олган Рики Ламбертнинг ўйинлари ҳайратга солди. «Балки шу пайтгача энг зарур жиҳатни эътибордан четда қолдиргандирмиз. Улкан иқтидор эгаларини қуйи дивизионлардан ҳам топса бўлар?»
Бу айни ҳақиқат. Ўтган мавсумнинг ўзи Англия термасига икки нафар дебютантни тарбиялаб берди. «КПР» тўпурари Чарли Остин премьер-лигада 20тага яқин гол урди, ҳужумкор Жейми Варди эса «Лестер»нинг элитада мўъжизавий тарзда сақлаб қолинишида асосий роллардан бирини ўйнади. Шу ўринда «Бёрнли» аъзоси Данни Ингзни ҳам унутмаслик керак. Тўғри, ушбу футболчи Англия термасида дебют қилишга улгурмади. Шунга қарамай, довруғи достон «Ливерпуль» сафига қўшилишни уддалади.
«Вест Хэм»ни меҳмонда таслим этишни қойиллатган «Борнмут» эса элитага чиқиш йўлида аниқ қаҳрамонлардан фойдаланмади. Менежер Эдди Хауни шу тоифага қўшмасак, албатта. «Олчалар»нинг юқори суръатда илдамлашлари жамоанинг ёш устози ҳамда хорижий раҳбарларнинг бевосита иштирокида рўй бермоқда. Янги давр «Борнмут»и чемпионшип учун камтарона саналган 3 миллион фунтни ўтган йилнинг ёзидаёқ расмийлаштирди.
Агар «Дин Корт»да юлдузлар тизими тузилганда, Каллум Уилсон ўзини сайёҳлар шаҳрининг Жорж Клунисидек ҳис этиши мумкин эди. Ўтган мавсумда рақиблар дарвозасини 20 марта ишғол этганининг ўзи унинг қандай салоҳиятга эга эканини кўрсатяпти. Аммо ушбу футболчи премьер-лигада ўтмишдошларидан фарқли ўлароқ, жумбоқ сифатида кўриниш берди. Уилсон чемпионшипда бир мавсум ўйнади. Айнан шу йили «Борнмут» жамоавий ўйин борасида бошқа жамоаларга ўрнак вазифасини ўтади. Муваффақиятли онларнинг асосий сабабчиси сифатида фақат мураббий Хауни кўрсатиш мумкин. Бироқ рақиб ишқибозларини биринчи нав-батда, «олчалар»нинг айнан 23 ёшли форварди хавотирга солган бўлса ажабмас.
Уилсон янги даражага кўтарилишга қатъий киришди. Ҳаттоки, «Энфилд»да «Ливерпул»га муаммо туғдириш ниятини оммавий тарзда ошкор этди. Бироқ «Борнмут» ҳарчанд уринмасин, «мерсисайдликлар»га қарши баҳсда гол ура олмади. Ҳакамнинг беихтиёр кўмаги ҳисобни рақиб томонга оғдирди. Кейинги турда Хау шогирдлари «Вест Хэм» майдонида ҳақиқий ирода ва матонат қандай бўлишини барчага намойиш этишди. Биринчи таймда иккита тўп фарқи билан олдинда бораётган «Борнмут» кейинги дақиқаларда бу устунликни бой берди. Аммо мазкур баҳсни кузатганлар шу куни 3 очко «олчалар»га насиб этишини чин дилдан ҳис этишарди. Жамоа менежери ҳамиша ҳамжиҳатликнинг биринчи ўринга қўйилишини таъкидлайди, аммо Лондондаги баҳс Каллумга аталганди, десак муболаға бўлмас. Ушбу ҳужумчи мавсумдаги дастлабки «хет-трик» муаллифига айланди.
Уилсон чиройли голларни урди. Гарчи «Вест Хэм» бош мураббийи Славен Билич ўйиндан кейинги матбуот анжуманида шогирдларининг қўпол хатоларга йўл қўйишганини таъкидласада, бунинг асосий сабабчиси Каллум эканини ёддан чиқармаслик зарур. У жарима майдончасига худди Серхио Агуэро сингари ёриб кирар, Диего Коста каби корпусдан унумли фойдаланарди. Уилсон қатъиятли футболчи эканини аввал ҳам намойиш этган: туғма тезлик ва вазиятни ҳис эта олиш салоҳияти унинг премьер-лига даражасида ҳар қандай рақибга муаммо туғдира олишига ишора.
Бу ҳақда фақат «Борнмут»нинг ўтган мавсумдаги ўйинларини кузатганлар аниқ фикр билдиришлари мумкин. «Олчалар»нинг чемпионат мобайнида 16 марта пенальти ишлашгани танқидчиларнинг норозилигига сабаб бўлди. Ҳакамларнинг ҳотамтойлигига биргина футболчини айбдор сифатида кўрсатишди - 11 метрли жарима зарбалари асосан Уилсонга қарши ишлатилган қўполликлар туфайли белгиланган. Шу омил мухлисларнинг ғашига теккани бор гап. Аммо Каллумни симуляция ишлатганликда айблаш ноўрин. Шунчаки «Борнмут» форварди худди Диего Коста сингари ҳар бир вазиятни олдиндан ҳис этишнинг ҳадисини олган. Кеч қолаётган рақиб ҳимоячисининг фол ишлатишга мойиллигини сезгани заҳоти зарба беришга шошилмайди. Пенальтидан гол уриш имконияти ҳар доим юқори. Ўзига бўлган ишончнинг асосий жиҳати ҳам шунда. Ҳар бир ишқибоз ҳужумчининг зарба беришини кутади, лекин Уилсон прагматик қарашларининг асосли эканини исботлади. «Вест Хэм»га қарши баҳсдаги ёрқин ўйини бунинг яққол далили.
Каллум фаолиятининг беш йилини қийин дамларни бошдан кечираётган «Ковентри» сафида ўтказди. Қуйи дивизион жамоаси таркибидан ўрин олиш осон кечмади. Ҳаттоки бир йил аввалги мавсумда клуб уни трансферга қўйиш ҳақида ўйлади. Айнан шу қарор Уилсоннинг отни қамчилашига сабаб бўлди. Ишга бошқачароқ ёндошиш ва асосан, голлари билан бош мураббий Стивен Пресслининг фикрини ўзгартиришга эришди.
Уилсон худди тезкор Варди сингари тўрт йил аввал конференция даражасидаги клуб - «Тамворт» шарафини ҳимоя қиларди. Ўтган йилнинг куз ойида у ёшлар терма жамоасида дебютини нишонлади. Асосийси, бошқа шериклари қатори ривожланишида Хаунинг хизматлари беқиёс эканидан хабардор. Каллумнинг «Борнмут»га ўтиши сўроқ остида қолган бир паллада айнан мураббийнинг фикри инобатга олинди. Эдди ушбу ҳужумчининг ўз жамоасидаги шиддаткор ўйинга киришиб кетишига ишонарди. Уилсон эса «Борнмут» менежерининг машғулотларнинг ўзида нималар қилишидан хабардор эди. «Хау йўлга қўйган қоидалардан бири - жамоанинг ҳар бир аъзоси машғулотларни ҳал қилувчи баҳсдек қабул қилиб, унга худди шундай тайёргарлик кўриши шарт эди. Бу эса руҳий ҳолатни бир маромда ушлаб туришда қўл келади», - деди Каллум. «Энфилд»да юлдузларни астойдил тер тўкишга мажбур қилган «олчалар»нинг барча аъзоси буни доимо ҳис этиб турадилар.
Қишда Уилсонга премьер-лиганинг қатор клублари қизиқиш билдиришди. Улар орасида жиззаки «Тоттенхэм» ҳам бор эди. Мазкур ҳолат «Борнмут» мураббийига ҳам тааллуқли. Жавоб эса оддий: йўқ! Хау ҳозирги жамоа билан олдинга қадам ташлаш мумкинлиги, четдан келаётган таклифлар шуҳрат қозонишнинг ягона йўли эмаслигига шогирдларини ишонтириш пайида. «Бошқа жамоалардан қизиқиш бўлаётгани ёқимли, албатта. Бу яхши иштирок этаётганим, шу маромда давом этишим кераклигини англатади», - деди Уилсон ҳолатни шарҳлар экан. Эдди Хаудан ҳам худди шундай жавоб янграши муқаррар. Қуйи дивизиондан чиққан яна бир форвард мавсумдаги дастлабки «хет-трик» муаллифига айланди. Ушбу шон-шуҳрат онлари ўзига хос тарзда қабул қилинади. Зеро, жарима майдончасининг прагматик қаҳрамони иштирок этадиган клуб бошқа жамоалардан ўзига хослиги билан фарқланади.
Манба: Football.ua,
Ў. УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
