Қайси футболчилар ўз жамоаларида халоскор ролини ижро этишмоқда? Халқаро мусобақалардаги муҳим ғалабалар кимларнинг саъй-ҳаракатлари эвазига қўлга киритилмоқда? Soccer.ru сентябрь ойи қаҳрамонларини эълон қилди.
Халк («Зенит»)
Питерликларнинг энг қиммат хариди жорий мавсумда аниқ ва чиройли зарбаларни амалга ошириш билан биргаликда, олдинги чизиқдаги жамоадошларига ёрдам беришни ҳам унутмаяпти. Юксак эътирофга лойиқ кўрилаётган Халк ҳақли равишда терма жамоадаги ўрнини қайтариб олди. Спорт формаси ҳам, кайфияти ҳам аъло даражада.
Роберт Левандовски («Бавария»)
Златаннинг тезлиги анча пасайиб қолганини сездингизми? Айниқса, Россия билан бўлган баҳсда бу яққол кўзга ташланди. Шу тариқа марказий ҳужумчи позициясини ундан польшалик касбдоши тортиб олди. Роберт ички мусобада ҳам, еврокубокларда ҳам фантастик сермаҳсуллик намойиш этмоқда.
Антуан Гризманн
(«Атлетико»)
Поль Погбанинг тарафдорлари кўп эканига шубҳа йўқ. Лекин яқин келажакда Франция терма жамоасига «Атлетико»даги универсал ўйинчи кўпроқ асқотса, ажабмас. Гарчи «матрасчилар» иккинчи турда мағлубиятга учраган бўлишсада, Антуаннинг нуфузига путур етмади. Кўпчиликнинг кўз ўнгида иқтидорли ҳужумчи атоқли жангчилар қаторига кўтарилмоқда.
Пьер-Эмерик Обамеянг («Боруссия» Д.)
Фаолиятини ўта омадсиз бошлаган ҳужумчи Дортмундда бор маҳоратини кўз-кўз қилмоқда. Жорий мавсумнинг дастлабки 7 беллашувида Обамеянг майдонни голсиз тарк этган йўқ - бундеслиганинг бу ажойиб рекорди соҳибини сезмасликнинг иложи йўқ.
Криштиану Роналду («Реал»)
Примеро баҳсларини камтарона ўтказаётган бўлсада, Роналду ҳамон Европанинг асосий мерганлари сафида боряпти. ЕЧЛнинг гуруҳ босқичида «Реал» ёки «ПСЖ»нинг ғолиб чиқиши ўзаро учрашувларда маълум бўлиши мумкин. Лекин Роналдунинг сермаҳсуллиги шубҳалардан холи.
Луис Суарес («Барселона»)
Жамоанинг ички чемпионатдаги иштироки аввалгидек ишонарли эмас. Қолаверса, ЕЧЛнинг амалдаги ғолиби халқаро ареналарда ҳам жиддий танқидларга учрамоқда. Боз устига, Месси сафдан чиқди. Энди Луис Суарес бош ролни ижро этишга мажбур. У ўзига билдирилган ишончи ЕЧЛнинг гуруҳ босқичида оқлаяпти. Ички биринчиликда ҳам шундай бўлишига шубҳа йўқ.
Дуглас Коста («Бавария»)
Мюнхен клубида Алькантара, Алонсо ва Мюллер ёрқин нур сочишмоқда. Умуман, жамоа қитъада энг барқарор ва салобатли ўйин кўрсатмоқда. Лекин гап алоҳида ижрочилар ҳақида кетаркан, Дугласни эътироф этмай иложи йўқ. У дунёдаги энг яхши ярим ҳимоячи даражасига кўтарилди.
Серж Орие («ПСЖ»)
Ибрагимович, Кавани ва Ди Мария - парижликларнинг асосий юлдузлари. Лекин улар олдинги чизиқ вакиллари. Бундан ташқари, мавсум стартидаги чинакам қаҳрамонликни айнан Серж намойиш этмоқда. Гол ураётган ҳам, хавфли вазиятларни вужудга келтираётган ҳам у.
Риёд Маҳрез («Лестер»)
АПЛда суперқаҳрамонликка номзодлар керагидан ҳам ортиқ. Аммо уларнинг кўпчилиги дастлабки беллашувларда ўзларини кўрсата олмадилар. «Лестер»нинг жазоирлик ўнг қанот ҳужумчиси ўта фойдали ва юксак савияни қайд этмоқда. Унинг жасорати доимий бўлмаслиги мумкин. Лекин бугунги ҳақиқатдан юз ўгиришни истамадик.
Нолито («Сельта»)
Испания чемпионатида «Реал» ва «Барселона» юлдузлари доимо диққат марказидалар. Лекин «Сельта»дек камтарин жамоа аъзоси ҳам кучли таассурот уйғотишга қодир экан. Жамоанинг юқори ўринларда бораётгани кўп жиҳатдан Нолитога боғлиқ. Афтидан, у каталонияликлар диққатини тортишни мақсад қилган кўринади. Нима бўлганда ҳам, Нолито сентябрь ойида примеронинг энг яхши футболчиси сифатида эътироф этилди. Бу жуда юқори баҳо.
С.Раҳмонов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
