Англия премьер-лигасининг навбатдаги мавсумида 8та тур ортда қолди. Айни пайт турнир жадвалидаги ҳолат сал эпақага келиб улгурди. Ҳарқалай, кучли учликда азалий грандлар («Манчестер Сити», «Арсенал» ва «МЮ») боришяпти. Уларни эса «Кристал Пэлас», «Лестер», «Вест Хэм» каби «иккинчи гуруҳ» вакиллари таъқиб этишяпти. Агар тўпурарлар пойгасига назар солсак, Жейми Варди, Каллум Уилсон, Риёд Маҳрез ва Одион Игало каби «нотаниш» футболчиларга кўзимиз тушади. Хусусан, пешқадамлик ҳозирча «Лестер»нинг муҳим голларига муаллифлик қилаётган Варди қўлида. Унинг ҳужумкор ҳаракатлардаги шериги Маҳрез ҳам юқори поғоналарда. Хуллас, қуйида айни пайт тўпурарлар мусобақасига ўзгача кескинлик олиб киришга уринаётган 4 нафар «нотаниш» йигит билан яқинроқ танишиб оламиз.
Одион Игало («Уотфорд») - 7та ўйин, 5та гол
Нигериялик ҳужумчи 2007 йили Европага кўчиб келган. Дастлаб Норвегиянинг «Люн» клуби сафига қўшилган Одион шимолий мамлакат биринчилигида 2 мавсум ўйнади. Шундан кейин ўз ихтиёрини Поццолар оиласи қўлига топширди. Тўғри, у «Удинезе»да унча кўп ўйнамади. «Гранада»да эса нақ 5 мавсум тўп сурди. Лекин футболчи учун улардан фақат биринчиси (сегундада) муваффақиятли ва самарали кечди. Ўтган мавсум старти арафасига келиб, Игало «Уотфорд» аъзосига айланди ва дарҳол росманасига «очилди». Ҳа, у доимо асосий таркибдан жой олгани йўқ, бироқ якунда Троя Дини билан ажойиб жуфтлик ҳосил қилиб, нақ 20та гол урди. Шу голлар ва Динининг 21та аниқ зарбаси «Уотфорд»га жуда қўл келиб, клуб ниҳоят, премьер-лигага чиқди. Мана, Игало элит лигада ҳам гол уришда давом этяпти. У хусусан, «Ньюкасл» билан ўйинда «дубл»га эришди, «Суонси», «Эвертон» ва «Борнмут» дарвозасини 1 мартадан ишғол қилди. Яқин-яқингача ҳам 26 ёшли ҳужумчининг асосий таркибдаги ўрни сўроқ остида эди, яъни нигериялик мустаҳкам жой олмаганди. Дейлик, «Уотфорд» трансферлар мавсумининг охирги куни колумбиялик машҳур Виктор Ибарбони харид қилиб, ҳужумда қўшимча вариантга эга бўлганди. Энди эса ойдинлашяптики, Игало яқин орада ўз ўрнини ҳеч кимга бўшатиб бермайди, чоғи.
Риёд Маҳрез («Лестер») - 5та ўйин, 5та гол (2та пенальтидан), 3та самарали «пас»
«Лестер» Маҳрезни Франция иккинчи дивизионидан топди. Ўшанда, яъни 1,5 йил олдин Риёднинг трансфери 500 минг евродан ҳам арзон эди. Энди эса нархи нақ 30 маротаба ошди. Тезкор вингер ажойиб техникага эга. У айниқса, чап оёғида яхши ўйнайди. Риёд одатда майдоннинг ўнг томонида ҳаракатланади. Тўғри, Клаудио Раньери яқинда уни марказда, ҳужумчи ортида ҳам синаб кўрди. Чунончи, жазоирлик йигит марказ орқали ҳужумга қўшилиб, қудратли зарбасидан фойдаланишни хуш кўради. Бунда унга юқори техникаси қўл келади. Яъни йўлида дуч келган рақибни бемалол алдаб ўтади. Жазоирлик футболчи ўтган мавсумдаёқ чакки таассурот қолдирмаган, аммо унга эффектлилик етишмаганди. Бошқача айтганда, омади ҳам унча юришмаганди. Якунда бутун чемпионат давомида 4та гол уриб, 3тасига ассистентлик қилиш билан чекланди. Яна бир қанча зарбалари йўлига дарвоза тўсини ёки устуни қалқон бўлди. Ҳозир эса, Маҳрезнинг ишлари жойида. Мана, 1,5 ой ичидаёқ ўтган мавсумдаги кўрсаткичларини яхшилади. Маҳрезнинг ўйинлари шундай ёрқин чиқяптики, уни «Арсенал» ва «Барселона» клубларига «юбора» бошлашди. Риёд Париж атрофидаги шаҳарчада туғилган ва ёшлигида шу қадар озғин бўлганки, кўплаб мураббийлар унга футболчи бўлиш илинжида беҳуда вақт сарфламаслиги ҳақида маслаҳат беришган. Бироқ йигитча вақт сарфлашдан чўчимади ва аввал кўча футболида тобланди, энди профессионал даражада ҳам ўзини кўрсата бошлади. У жисмоний қуввати камлигини айнан оригинал техникаси ҳисобига билинтирмаяпти. Айтганча, Маҳрезни Англияга, боз устига, чемпионшипга кўчиб ўтишидан ҳам қайтаришган экан. Аммо ўз фикрига эга футболчи қалбига қулоқ тутиб, бу йўлдан қайтмади ва кўринишидан, адашмаган, шекилли.
Каллум Уилсон («Борнмут») - 5та ўйин, 5та гол
Ўта ачинарли тарих: Уилсон яқиндагина жиддий жароҳатга йўлиқди ва энди ярим йил даволанишга мажбур. Шундай экан, унинг жорий мавсум яна гол уриши сўроқ остида. Албатта, бу «Борнмут» учун улкан йўқотиш. Чунончи, клубда айнан шу ҳужумчига катта умид боғлаётгандилар. Эҳтимол, Каллумнинг сафдан чиққани Англия терма жамоаси учун ҳам йўқотишдир. Ҳарқалай, Рой Хожсон уни энди чақирмоқчи бўлиб турганди. Айтиш жоиз, Уилсон худди Варди ва Маҳрез каби таъсирчан ҳаётий тажрибани бошдан ўтказган. У яқинда Guardian нашри мухбирлари билан суҳбат чоғи болалиги ҳақида ошкора гапириб берди: «6 нафар ака-ука, опа-сингиллар кичик бир хонадонда яшаганмиз. Бизни ёлғиз онам тарбиялаган. Хуллас, футбол билан шуғулланишимга вақт етишмасди. Ахир оилани боқишда онамга ёрдам беришим талаб этиларди. Қолаверса, бошида оғир жароҳатланганман». Унинг айтишича, ҳозирги хотини билан танишганидан сўнг ҳаёти бутунлай ўзгарган. Бунгача эса топгани озиқ-овқат сотиб олишдан ортмаган экан.
Жейми Варди («Лестер») - 8та ўйин, 7та гол, 1та самарали «пас»
Энг қуйида бошлаб, секин-аста юқорига кўтарилган ва премьер-лига баробарида Англия терма жамоасида ўйнаш даражасига етган яна бир футболчи. Жейми айниқса, янги мавсумни яхши бошлади. У ва Маҳрезнинг голлари ҳисобига «Лестер» эртакнамо стартни қайд этди. Маҳрез ёшлигида жуда ориқ ва нимжон бўлгани таъкидланди. Варди эса ўта кичик кўринарди. Айнан жуссаси туфайли уни «Шеффилд Уэнсдей»нинг асосий жамоасига қабул қилишмайди. Натижада ёш Жейми 8-9-дивизионларда футбол ўйнаш баробарида тиббий шиналар ишлаб чиқарувчи фабрикада меҳнат қилишдан ўзга чора тополмайди. Лекин профессионал даражада ўйнаш умидидан воз кечмайди. Қарангки, у ниятига етди ва айни пайт барчанинг ҳавасини келтириб, АПЛда бош тўпурар бўлиб турибди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
