Криштиану Роналду Ла Лиганинг 8-тур учрашувлари доирасида “Леванте”га қарши кечган ўйинда (3:0) тўп киритишга муваффақ бўлди ва мазкур гол Роналдуга “Реал” тарихидаги расман энг яхши тўпурар бўлиш имконини тақдим этди.
У ўз ҳисобидаги голлари сони 324тага етказди. Бу орқали Роналду “Реал” афсонаси Раулни (323 та гол) қувиб ўтди.
Қайд этиш керакки, "Реал"нинг ҳисобларига кўра, Роналду 1 октябрь куниёқ ўзининг 324 голини уриб бўлганди, лекин бу натижа Ла лига томонидан ҳисобланмаган. Мадридликлар 2011 йилдаги ўйинда Пепе ҳисобига ёзилган голни Роналду голлари қаторига қўшишган.
10. Амаро Амансио – 155та гол
![](http://xabardor.uz/upload/userfiles/images/96ded99250cc0a7278d364add60eb0cd.jpg)
"Колдун" лақабли Амаро Амансио 1962 йилдан 1976 йилгача "Реал" жамоасида тўп сурган. У 155та голини "қаймоқранглилар" сафида ўтказилган 471та ўйин давомида урган. Амансио 2 марта Испания чемпионатининг энг яхши тўпурари сифатида тан олинган. Ушбу ҳужумчи "Қироллик клуби" сафида 1966 йилда Чемпионлар Кубогида ғалаба қозонган. У "Реал" билан 9 марта Испания чемпиони бўлган. У кейинчалик жамоада мураббий сифатида ҳам ишлаганди.
9. Эмилио Бутрагеньо – 171та гол
![](http://xabardor.uz/upload/userfiles/images/5e0398429e73c2d789d0822b87396cdf.jpg)
Бутрагеньо айни вақтда "Реал"нинг жамоатчилик билан алоқалар бўлими директори ҳисобланади. "Калхат" лақабли бу футболчи 1982 йилдан 1995 йилгача "Реал" таркибида ўтказилган 463та ўйинда 171 марта ўз голини нишонлаган. У 1991 йилги мавсумда чемпионатнинг энг яхши тўпурари бўлган.
У жамоа билан 6 марта Испания чемпиони бўлган, 2 марта УЕФА Кубогини боши узра кўтарган.
8. Пирри – 171та гол
![](http://xabardor.uz/upload/userfiles/images/9d53c5317ee1dfcb1c96ece462de32ea.jpg)
"Пирри" лақабли Хосе Мартинес Санчес ўзининг бутун фаолиятини "Реал"га бағишлаган. Ярим ҳимоячи амплуасида ҳаракат қилган футболчи 1964 йилда илк марта мадридликлар сафида майдонга тушганди. У сардор даражасигача эришган ва жамоани 1980 йилда тарк этган. У ўз натижаси (171та гол) учун 561та ўйинда қатнашган.
Амансио билан бир даврда ўйнаган Пирри "Реал" билан 10 марта Испания чемпиони бўлган ва 1965-66 йиллар мавсумида Чемпионлар Кубогига эга чиққан. У ўз вақтида мамлакатнинг энг кучли футболчиси сифатида тан олинар эди.
7. Франсиско Хенто – 179та гол
![](http://xabardor.uz/upload/userfiles/images/31bdbe6b337b3df70da595b716047b77.jpg)
Франсиско «Пако» Хенто "Реал"да деярли 20 йил футбол ўйнаган. У 1952 йилда жамоадаги дебютини ўтказган, 1970 йилга келиб фаолиятини якунлаган. У "қаймоқранглилар" сафида 599та ўйин ўтказиб, 179та гол урган. Хенто жамоа билан 12та чемпионлик совринини ютган, 1956-1966 йиллар оралиғида 6 марта Чемпионлар Кубогини қўлга киритган. У ўз фаолиятини якунлагач, "Реал"нинг фарм-клуби "Кастилья"да мураббий сифатида ишлаган.
6. Уго Санчес – 208та гол
![](http://xabardor.uz/upload/userfiles/images/c65738dce0b325cad7c044cc1801f323.jpg)
Мексикалик ҳужумчи Уго Санчес 1985 йилдан 1992 йилгача "Реал" сафида ҳаракат қилган. У жамоага Мадриднинг бошқа бир клуби "Атлетико" сафидан келиб қўшилган. У "Реал" сафида 282та ўйинда қатнашиб, 208та голга муаллифлик қилганди. У жамоа билан 5 марта ички чемпионат ғолиби, 2 марта Испания Кубоги ва 2 марта УЕФА Кубоги ғолиби бўлган.
Мексикалик голеадор 5 марта Испания чемпионатининг энг яхши тўпурари бўлган, 1990 йилда Христо Стоичков билан биргаликда "Олтин бутса"га эга чиққанди.
5. Ференц Пушкаш – 242та гол
![](http://xabardor.uz/upload/userfiles/images/a22e18791012911ea90af7fb5144a68d.jpg)
Афсонавий венгриялик ҳужумчи Ференц Пушкаш "Реал" билан шартнома имзолаганида 30 йшда эди. У Венгрияни 1956 йилда амалга оширилган инқилоб туфайли тарк этишга мажбур бўлганди. У дастлабки мавсумда майдонга тушмайди ва 1958 йилдагина дебют қилади. 1967 йилгача Мадридда қолган футболчи жамоа билан 262та ўйинда майдонга тушиб, 242та гол урган. У 5 марта Испания чемпиони, 3 марта Чемпионлар кубоги соҳиби бўлган. Пушкаш 4 марта Испания чемпионатидаги энг яхши голеадор сифатида қайд этилган. У 1959-60 йиллар мавсумида Чемпионлар Кубоги финалида "Айнтрахт" жамоасига қарши ўйинда (7:3) покерга эришган.
4. Карлос Сантильяна – 289та гол
![](http://xabardor.uz/upload/userfiles/images/99896c098db0a8b43778b8eff4ec104c.jpg)
Асл исми Карлос Алонсо Гонсалес бўлган, Сантильяна лақаби билан танилган бу футболчи жамоа афсоналаридан бири Франсиско Хенто фаолиятини якунлагач, унинг издошига айланди. У 1971-1988 йиллар давомида "Реал"да ҳаракат қилиб, 645та ўйинда 289та гол уришга муваффақ бўлган. У 9 марта Испания чемпиони, 2 марта Чемпионлар кубоги соҳибига айланган. У 1985 йилда ЧК финалида "Видеотон" дарвозасига, 1 йил ўтиб эса яна финалда "Кёльн" дарвозасига гол уриб, ғалабани таъминлаган.
3. Альфредо Ди Стефано – 307та гол
![](http://xabardor.uz/upload/userfiles/images/e28c7e917902a17c04287cb0628f9b7b.jpg)
Ди Стефано Буэнос-Айресда туғилган, футболчилик фаолиятини «Ривер Плейт»да бошлаган, кейинроқ Колумбиядаги «Мильонариос» жамоаси орқали «Реал» сафига келиб қўшилган.
Ўз фаолияти давомида Аргентина, Колумбия ва Испания терма жамоалари сафида иштирок этган футболчи 1953-1964 йиллар давомида "Реал" учун ўйнаган. У Мадриддаги 396 ўйинда 307та гол урган. Ди Стефано 8 марта Испания чемпионатида ғолиб бўлган, 5 марта ички чемпионатда энг яхши тўпурар бўлган, 2 марта Чемпионлар кубогида ғалаба қозонган.
У фаолиятини якунлагач, "Реал"да ишлаган, кейинроқ жамоанинг фахрий президентига айланган.
2. Рауль – 323та гол
![](http://xabardor.uz/upload/userfiles/images/a1b75d31243dde1577ab3df7cc80489b.jpg)
Узоқ йиллардан буён "Реал"нинг энг яхши тўпурари бўлиб турган Рауль Гонсалес Бланко эндиликда иккинчи ўринда.
Ёш Рауль жамоадаги илк ўйинини 1994 йилда ўтказган ва 33 ёшида жамоани тарк этган. У 2010 йилда Германиянинг "Шальке" жамоаси билан шартнома имзолаган, кейинроқ Қатарнинг "Аль-Садд" жамоасида фаолиятини давом эттирган, унинг ҳозирги жамоаси МЛСдаги "Нью-Йорк Космос" бўлиб турибди.
У "Реал" сафида жами 741та ўйинда иштирок этиб, 323та гол урган. Рауль "Реал" билан 6 марта Испания чемпионлигини нишонлаган, 3 марта ЕЧЛ ғолиби бўлган (1998, 2000 ва 2002 йй), 2 мартадан ички чемпионат ва еврокубоклар тўпурари бўлган.
"Роналду 6 йил ичида ҳар мавсумда ўртача 50та гол урди. Ахир 1 мавсумда 20та гол уриш ҳам қийин иш. Мен ўз натижаларимдан мамнунман, лекин Роналду мендан олдинга ўтиб олди ва у ҳали ўйнашда давом этади. Унинг голлари "Реал"га ғалабалар келтиришда давом этади", дея ўзини қувиб ўтган Роналду ҳақида фикр билдирди Рауль.
1. Криштиану Роналду – 324та гол
![](http://xabardor.uz/upload/userfiles/images/ceee30eb49fd42d6937e894a1a3aceab.jpg)
Португалиялик ҳужумчи 2009 йилда "МЮ"дан "Реал"га келиб қўшилганди. Уни Флорентина Перес 93,4 млн евро эвазига трансфер қилган. Роналду шу вақтгача урган 324 голини уриш учун 310та ўйин ўтказган.
У шу вақтгача "Реал" билан 1 марта Испания чемпиони, 2 марта Испания кубоги соҳиби ва 1 марта ЕЧЛ ғолибига айланди. У 3 марта Испания чемпионатининг энг яхши тўпурари бўлган.
Матнда хатолик топсангиз, ўша хатони белгилаб, бизга жўнатинг (Ctrl + Enter).