Беларусь терма жамоаси Евро-2016 турнирининг саралаш босқичида ўз олдига қўйган вазифани уддалай олмади. Шунга қарамай, гуруҳдаги Испания, Словакия ва Украина сингари кучли рақибларга қарши муносиб ўйин кўрсатди. Жамоа бош мураббийи бу билан чекланмоқчи эмас. Ҳар ҳолда, навбатдаги мусобақа - ЖЧ-2018 саралашини ижобий якунлаш ниятида.
- Айтинг-чи, ташқи кўринишингиз сиз учун муҳимми?
- Асосийси - жамоанинг қиёфаси. Ўзимга келсак, рисоладагидек бўлишимни рафиқам мунтазам назорат қилиб туради. Менга қолса, бунга ортиқча аҳамият бермайман. Албатта, касбдошларимнинг қандай кийинишаётганига бефарқ эмасман. Менимча, ҳар бир эркак сифатли костюм-шим, сифатли пойабзал, сифатли соат, шинам автомобиль ва меҳрибон рафиқага эга бўлиши керак.
- Турмуш ўртоғингизнинг ишингизга аралашишига изн берасизми?
- Аёлим футбол қоидаларини яхши тушунсада, ишимга аралашмайди. Тўғри, ғалаба қозонсак - қувонади, мағлуб бўлсак - азият чекади. Дарвоқе, яқинларим Испания ҳамда Украинага қарши уй учрашувларимизни бевосита стадионда кузатишди. Ҳар икки учрашувда ҳам имконият бой берилди... Буни қаранг - оила аъзоларимнинг 2та ташрифи ва 2та мағлубият. Бу ҳақда ўйлаб кўриш керак. Лекин мен барибир, турли ирим-сиримларга ишонмайман. Киевнинг «Динамо»сида ўйнаган кезларим ЕЧЛ доирасидаги баҳсда жамоадошларим билан сочимизни тўлиқ олдирган ҳолда майдонга тушгандик. Аммо бу уриниш наф бермаган. Фақат айримларнинг қиёфаси кулгили ҳолга келиб қолган, холос.
- Фаолиятингизга раҳбарият қандай баҳо беряпти?
- Сешанба куни Сафарьян билан бафуржа суҳбатлашдик. Амалда жамоа кўзланган очколарни жамғарди. Тўғри, охирги ўйинда Македонияни енга олмадик. Жисмоний ҳолатимизнинг кўнгилдагидек эмаслиги панд берди. Словакиядаги ғалабадан кейин жамоамизга иштиёқ етишмаслигидан хавотирланаётгандим. Бироқ ҳаммаси талаб даражасида бўлди. Шунчаки, футболчиларимизда чарчоқ аломатлари сезилди, холос. Иштирокимиздан раҳбариятнинг боши осмонга етди, деган фикрдан йироқман. Лекин жамоадаги тараққиётни кўришаётгани аниқ. Дастлаб жамоа 12 имкониятдан 1 очко олди. Мураббийлар штабида ўзгаришлар рўй берганидан кейин эса 18 имкониятдан 10 очко тўпланди. Натижа чакки эмас. Агар дастлабки ўйинларда 5 очко олганимизда, йўлланмалардан бири учун курашиш имкони туғиларди. Қисқаси, Сафарьяннинг баҳоси ижобийлик касб этди.
- Сиз имзолаган 3 йиллик шартномада барвақт истеъфога чиқиш варианти ҳам борми?
- Иш бошлаш арафасида шундай дегандим: «Мабодо нимадир қовушмаса, ўйинчиларни бир мақсад йўлида бирлаштира олмасам, жамоа ишончига киролмасам, буни тан олган ҳолда берилган имконият учун барчага миннатдорчилик билдириб, жамоани тарк этаман». Аминманки, футболчилар кўнглига йўл топа билдим. Улар терма жамоа йиғинига мамнуният ила ташриф буюрмоқдалар.
- Ўзингиз қандай фикрдасиз? Балки термадаги айрим жиҳатлардан кўнглингиз тўлмаётгандир?
- Биз учун энг муҳими - руҳият. Жамоа аҳил ва ҳамжиҳат бўлиши шарт. Кейинги саралаш босқичида олдимизга муайян вазифа қўйиш ниятидан йироқман. Шундоқ ҳам буни белгилаб берадиганлар етарли. Биринчи навбатда қилишимиз керак бўлган иш - жамоа савиясининг ўйиндан-ўйинга шаклланиб боришини таъминлаш. Словакия ва Македонияги қарши ўйинлар арафасида шогирдларим билан мазкур масала юзасидан бафуржа гаплашдим. Жилинада намойиш этган ўйинимиз янги даврнинг бошланғич нуқтасига айланмоғи даркор. Мен ўйинчилардан ўзлари ва жамоага бўлган ишончни талаб қиламан. Александр Глеб сингари «Бу галги саралашда ҳам ҳеч нарсага эриша олмаймиз» қабилида фикр юритувчилар, аниқроғи, тушкун кайфиятдаги футболчиларни жамоадан узоқ тутишга интиламан. Бизга интизомли, фидойи жангчилар керак.
- Глебни терма жамоага жалб этасизми?
- Агар у талаб даражасидаги савияни намойиш этиб, пессимистик фикрларидан воз кечса, эҳтимол чақирарман. Саша Европада улкан тажриба тўплаган футболчи. Бироқ кучли бешликда тўп сурган бирор футболчининг ўз терма жамоасига ишонч билдирмаганини эслолмайман. Хоҳламасанг, уйингда ўтиравер. Менга ижобий натижаларга ишонадиган футболчилар лозим.
- Ҳеч бўлмаганда, умидвор футболчилар, денг. Ўта омадсиз қуръадан сўнг муваффақиятга ишониш - ўз-ўзини алдашга тенг эмасми?
- Ҳа, қуръада омадимиз чопмагани - ҳақиқат. Лекин иккинчи томондан, кучли рақибларга қарши мухлислар тўла стадионда тўп суриш жамоа учун жуда фойдадан холи эмас.
- Чиндан ҳам, ҳайҳотдек стадиондаги 1545 нафар мухлис қанчалик далда бера оларди?
- Бу - бошқа мавзу. Навбатдаги саралаш ҳақида гапирсам, бор куч-маҳоратимизни ишга солган ҳолда ўйнаймиз. Шунчаки, расмиятчилик учун эмас, чинакамига курашамиз.
- Глебга нисбатан қандай муносабатдасиз?
- Икки хил Глебни биламан: иштиёқли ва иштиёқсиз. Улар бир-биридан кескин фарқ қилади. Биринчиси Македония, Россия ва Испания билан ўйинларда чинакам етакчига айланди. Иккинчиси эса, БАТЭ билан шартнома имзолади-ю, сўнди. Нотўғри фикр юритаётган бўлсам, узр сўрашга тайёрман. Саша терма жамоада ўйнашни истайди. Лекин вазифасига ёндашиши кўнгилдагидек эмас. Ўзим футбол ўйнаганман, шу боис унинг ҳолатини яхши тушунаман: функционал жиҳатдан тайёр бўлмаган футболчига улкан тажриба ҳам ёрдам бера олмайди. Истак доимо мавжуд. Аммо уни амалга ошириш учун астойдил елиб-югуриш керак.
- Футболчилик даврида шундай ҳолатга тушганмисиз?
- Йўқ, Лобановский жамоасида бунақаси умуман кузатилмаган. Йиғинда ўзингни кўрсатсанг - ўйнайсан. Акс ҳолда, «Динамо»га муносиб бўлиш учун бошқа жамоада 3-4 ой тайёргарлик кўришга мажбурсан.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
