«Челси» бош мураббийи Жозе Моуриньо Англия Премьер-лигасининг 11-тури доирасида «Ливерпуль»га қарши ўйин олдидан жамоада юзага келган вазият ҳақида тўхталиб ўтди.
«Куртуа ва Иванович жамоага ёрдам бера олишмайди. Педро ва Диего Костанинг майдонга тушиши сўроқ остида турибди, лекин уларга умид қиляпмиз. Қолган ўйинчилар соғ-саломат.
Мен Юрген Клоппнинг яқин дўсти эмасман, футбол бундай нарсаларга изн бермайди. У инсон сифатида менаг ёқади. «Ливерпуль» яхши жамоа эди ва ҳозир ҳам шундай. Жамоани яхши мураббий бошқариб келаётганди, ҳозир эса янада яхши мураббий келди. Ҳеч нарса ўзгармади. Клопп янги тактик жиҳатларни қўшди. Клубга янги мураббий келганда, бу нормал ҳолат.
Мен Азарни пенальтидан гол ура олмагани учун танқид қилмайман. У «Сток Сити» ва «Динамо Киев»га қарши ўйинларда яхши ҳаракат қилди. Бунгача у бир нечта ўйинларни захира ўриндиғида ўтказганди. Бу нарса унга ёрдам беради деб ҳисобладим. У тўғри хулоса чиқарганидан хурсандман.
Рамиреснинг нималарга қодирлигини барча ҳам тушуна олмаяпти. У ҳар қандай мураббийга ёқади. У керакли пайтда ўйнашга тайёр бўлса, захирада ўтириш керак бўлган пайтда буни тўғри қабул қилади. У ҳақиқатан ҳам янги шартнома муносиб ўйинчи.
Ҳозирча Чемпионлар лигаси йўлланма берадиган ўринларни эгаллашга ваъда бера олмайман. "Ливерпуль" ўтган мавсумда ЕЧЛга чиқа олмаган бўлса-да, бу топ-клуб. «Манчестер Юнайтед» икки йил аввал ҳаттоки Европа лигасига ҳам чиқмаганди, аммо у ҳамон гигант-клуб. «Челси» ҳам катта клуб бўлиб қолади. Футбол шундай қурилган.
Юзага келган вазиятдан мен қандай чиқиб кетаман? Ишлайман», – дейди Моуриньо матбуот анжуманида.
Эслатиб ўтамиз, «Челси» – «Ливерпуль» учрашуви эртага, 31 октябрь куни Тошкент вақти билан 17:45да бошланади.
Матнда хатолик топсангиз, ўша хатони белгилаб, бизга жўнатинг (Ctrl + Enter).