Ўзбек футболи ҳамиша ўзининг кучли дарвозабонларига эга бўлган. Павел Бугало, Евгений Сафонов, Игнатий Нестеров... Бу рўйхатни истаганча давом эттириш мумкин. Хўш, келажакда уларнинг ўрнини эгаллашга муносиб посбонларга эгамизми? Бу саволга ҳеч иккиланмай ижобий жавоб қайтариш мумкин. Айнан шу омил Ўзбекистоннинг турли ёшдаги термаларида тўп сураётган, келажакда бош жамоамиз дарвозасини қўриқлаши мумкин бўлган айрим киперлардан иборат ўзига хос рейтинг тузишимизга туртки вазифасини ўтади.
5. Ҳожиакбар ЖЎРАЕВ
Туғилган санаси: 2000 йил 16 март
Жамоаси: «Пахтакор»
Хабарингиз бор, Темур Олимхўжаев бошчилигидаги ўсмирларимиз Фаластинда ўтказилган Осиё чемпионати саралаш босқичида иштирок этишди. Турнирдан ўрин олган ҳар учта учрашувни ўз фойдасига ҳал қилган жамоамиз рақиблар дарвозасини 19 марта ишғол қилиб, атиги икки марта тўп ўтказиб юборди. Бундай натижанинг қайд этилишида мазкур баҳсларда посбонлик вазифасини ўтаган Ҳожиакбар Жўраевнинг ҳиссаси катта. Эндигина 15 ёшни қаршилаган кипернинг ўйинлари келажакка умид кўзи билан қарашга ундамоқда.
4. Умид ҲАМРОЕВ
Туғилган санаси: 1997 йил 13 май
Жамоаси: «Пахтакор»
Худди шундай натижани Ўзбекистон ёшлар терма жамоаси (U-19) ҳам такрорлади. Фарқи шундаки, Жасур Абдураимов шогирдлари 14та гол уриб, дарвозалари дахлсизлигини сақлаб қолишга эришдилар. Бангладешда бўлиб ўтган саралаш босқичининг ҳар учта ўйинини асосий таркибда ўтказган Умид Ҳамроев мураббийлар ишончини оқлади. Тўғри, «Пахтакор»нинг юқорида номи келтирилган ёш тарбияланувчилари ҳали ўзларини қитъа чемпионатида кўрсатишлари лозим. Умид қиламизки, олдинда кутиб турган масъулиятли баҳсларда эътирофга бежиз лойиқ кўрилмаганликларини исботлашади.
3. Асилбек ОМОНОВ
Туғилган санаси: 1993 йил 1 сентябрь
Жамоаси: «Қўқон-1912»
Қатарда бўлиб ўтадиган Осиё чемпионатида олимпиячиларимиз дарвозасини қўриқлаш вазифаси катта эҳтимол билан айнан Асилбекка юкланади. Иккинчи давра ўйинларини Қўқонда ўтказаётган ёш кипернинг нималарга қодирлигидан ёшлар термасидаги барқарор ўйинлари орқали воқиф бўлганмиз. Омонов Рио Олимпиадаси йўлланмаси учун кечадиган баҳсларда маҳоратини намоён эта олса, яқин вақтлар ичида миллий терма жамоага ҳам жалб этилиши тайин. Бу борада чапдаст дарвозабонимизга зафар ёр бўлишини тилаймиз.
2. Дилшод ҲАМРОЕВ
Туғилган санаси: 1995 йил 11 июль
Жамоаси: «Қизилқум»
Дарвоқе, Олимпия терма жамоамиз дарвозасини қўриқлашга номзодлар рўйхатига ушбу голкипернинг ҳам номини қўшиш мумкин. Фақат Виктор Романовичнинг бу борадаги қарашлари бошқачароқ кўринади. Қитъа чемпионати арафасида ўтказиладиган навбатдаги йиғинга жалб этилган посбонлар орасида Дилшоднинг номига кўзимиз тушмади. Бу масалани муҳокама қилиш фикридан йироқмиз. Зеро, натижа учун мураббий жавобгар. Биз эса, Ҳамроевнинг ёшлар ўртасидаги Осиё чемпионати ҳамда кичик мундиалда кўрсатган ишончли ўйинлари сабабли унга мазкур рейтингнинг иккинчи ўрнини лойиқ кўрдик. Яқин вақтлар ичида биринчи поғонага чиқиш учун Дилшодда вақт ҳам, имконият ҳам, маҳорат ҳам етарли.
1. Элдор СУЮНОВ
Туғилган санаси: 1991 йил 12 апрель
Жамоаси: «Насаф»
Албатта, Элдорнинг тез орада бош жамоамизнинг асосий дарвозабонига айланиши мумкинлигига фақатгина пессимистик кайфиятдаги ишқибозларгина ишонмасликлари мумкин. Ўзбекистон миллий терма жамоаси бош мураббийлиги Самвел Бабаянга ишониб топширилгач, Суюнов мунтазам равишда таркибга жалб этиляпти. У ҳар қандай вазиятда Лобановнинг ўрнини эгаллашга шай. 24 ёшли кипернинг бугунги кунда «Насаф» ўйинларида порлашига кўникиб қолдик. Яқинда клуби билан Ўзбекистон кубогини қўлга киритган дарвозабон қандай салоҳиятга эга эканини бош жамоамизнинг ҳал қилувчи ўйинларида ҳам намойиш этишига шубҳа йўқ. Бу йўлда Элдорга омад ҳамроҳ бўлишига тилакдошмиз!
Ўткир УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ўзбекистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
