Қаршининг “Севинч” жамоаси бу йилги олий лига аёллар жамоалари ўртасидаги XXI Ўзбекистон чемпионатида мавсум тугашига уч тур қолганда муддатидан аввал чемпионликни қўлга киритди.
Ушбу жамоанинг нафақат Қашқадарё вилоятида балки Ўзбекистонда аёллар ўртасидаги футболни ривожлантиришда ўз ўрни бор. Хўш ушбу чемпион жамоа ҳақида биз нималарни биламиз? Қуйидаги мақола шу ҳақда бўлади.
ЖАМОАНИНГ ТАШКИЛ БЎЛИШИ
Маълумки, Ўзбекистонда футбол бўйича аёллар ўртасидаги чемпионат 1997 йилдан бошланган. Илк марта Самарқандда ташкил этилган мазкур чемпионатда олтита жамоа иштирок этди. Булар – “Андижанка” (Андижон), “Қирқ қиз”(Нукус), “Медея гўзал” (Фарғона), “Ситора-Прага” (Самарқанд), “Ёшлик” (Жиззах) ва Қаршининг “Шифокор-Қалдирғоч”.
Вилоятда дастлаб Қарши тиббиёт билим юрти талабаларидан вилоят аёллар терма жамоаси ташкил этилади. Жамоа сафига “Санам” тикувчилик фабрикасида меҳнат қилаётган қизлардан ҳам танлаб олинади. Аввалига жамоа “Қалдирғоч” кейин эса “Шифокор” номи билан юритилади. Чунки жамоанинг аксарият футболчилари тиббиёт билим юртидан эди. Илк чемпионатнинг дастлабки босқичида қашқадарёлик қизлар деярли барча рақибларига йирик ҳисобларда имкониятни бой беради, биргина “Ёшлик” жамоаси билан дуранг ўйнайди. Афсуски, қашқадарёликлар иккинчи босқич учрашувларини ўтказиш учун Андижонга боришолмайди.
Шу йилнинг ноябр ойида илк бор Ўзбекистон Кубоги ҳам ташкил этилади. Мусобақа икки минтақада олиб борилади. Қува шаҳрида ўтказилган учрашувларда маҳаллий “Медея Гўзал” жамоаси пешқадамлик қилган бўлса, иккинчи минтақага Қарши шаҳри мезбонлик қилади. Бу ерда омад “Қирқ қиз” футболчиларига кулиб боқади, “Шифокор-Қалдирғоч” эса гуруҳда иккинчи ўринни эгаллайди.
Кейинги икки мавсумда “Шифокор-Қалдирғоч”, “Аланга” номи остида қатнашган қаршиликлар ҳар иккала мавсумда ҳам чемпионат якунига қадар етиб боришмайди.
2000 йили Қаршида аёллар футболи бўйича 4-чемпионатнинг биринчи босқичи ташкиллаштирилди. Унда мезбонлар “Аланга”, “Андижанка”, “Гулбаҳор” (Наманган), “Хумо” (Ангрен), “Навоий Азот”, “Семурғ” (Бухоро) жамоалари баҳсларга киришишади. Майдон эгалари гарчи кучли жамоалар – “Андижанка” ва “Гулбаҳор” футболчи қизларига ютқазган бўлсаларда, “Хумо”ни йирик ҳисобда, “Семурғ” ва “Навоий Азот”ни кичик ҳисобларда енгиб, мавқеини кўтариб олади.
Бироқ мусобақа ташкилотчилари унда иштирок этувчиларнинг ёши 15 ёшдан юқори бўлиши лозимлигини таъкидлашиб, иккинчи турдан “Аланга” ва “Хумо” жамоаларига баҳсларни давом эттиришга рухсат беришмайди.
2001 ва 2002 йилги аёллар футболи чемпионатларида қаршиликлардан жамоа иштирок этмайди.
Ўша пайтларда “Шўртангазкимё мажмуаси” директори вазифасида ишлаган Алишер Султоновнинг ташаббуси билан 2003 йилнинг июн ойида “Севинч” аёллар профессионал футбол клубига асос солинади, футболчиларга ойлик маош ва мукофот пулларини ўз вақтида тўлаш билан бирга клуб қошидаги икки ёшдаги тайёрлов гуруҳи қизлари ва болаларини ҳам имкон қадар рағбатлантиришни йўлга қўйилади, учинчидан эса, таркибга тажрибали футболчилар таклиф этилади. ўтган йиллар мобайнида “Гулбаҳор”да ўйнаган Гулнора Аъзамова, Элмира Ғўломова, Камола Усмоновалар фаолиятини Қаршида давом эттира бошлашади. Мураббийлар Абдураҳмон Юмангулов ва Владислав Ханлар бош мақсад сари интила бошлайдилар.
2004 йил қаршилик қизларнинг, аниқроғи, “Севинч”нинг зафарли юриши бошланганлиги билан тарихда қолди. Агар шу пайтгача юртимизда аёллар футболига асос солган пойтахтлик қизлар, кейинроқ катта саҳнага чиққан “Андижанка” ва охирги йилларда чемпионлик ва Кубокни ўзиники қилаётган “Гулбаҳор” жамоалари аёллар футболини белгилаётган бўлса, энди уларнинг сафига “Севинч” қўшилади.
“СЕВИНЧ” ЖАМОАСИ ЮТУҚЛАРИ
“Севинч” шу пайтгача ўн карра Ўзбекистон чемпиони, саккиз карра Ўзбекистон Кубоги соҳибасидир. Мини футбол буйича 11 марта чемпион, Мини футбол буйича Ўзбекистон Кубогини 9 марта қўлга киритган.
Айни пайтда амалдаги Ўзбекистон чемпиони ҳамдир.
“Севинч” нинг Ўзбекистон чемпионатида илк дебюти ҳам 2003 йили бўлиб ўтган, шу йили улар чемпионатнинг бронза медалини қўлга киритишади ва бу шубҳасиз катта ютуқ эди. 2004 йили эса кумуш медалларни қўлга киритди.
Келгуси 2005 йилги чемпионатда эса “Севинч” ПФК ўз тарихида биринчи марта мамлакатимизнинг чемпионига айланишди ва олтин медалларга сазовор бўлишди.
2005 йил ҳам “Севинч” жамоаси қизлари ҳаётида ўчмас из қолдирди десак муболаға бўлмайди, чунки шу йили “Севинч” жамоаси аёллар футбол жамоалари ўртасидаги мини-футбол бўйича чемпионатда ҳам чемпионликни, ҳам мамлакат кубогини қўлга киритишади ва мини-футбол бўйича Ўзбекистон терма жамоаси таркибида, Таиландда бўлиб утган Осиё ўйинларидаги мини-футбол бўйича мусобақаларда қатнашиб, ғалабага эришади.
2006 йили “Севинч” қизлари ўзларини мамлакатимизда етакчи футбол клуби эканлигини яна бир марта исботлашади. Улар мамлакат чемпиони бўлишиб, аёллар ўртасидаги мини-футбол бўйича ҳам чемпион бўлишган ва мамлакат кубоги соҳибаси ҳам бўлишган.
2007 ва 2008 йиллар мавсумида эса “Севинч” жамоаси ўзига хос рекорд ўрнатади яъни мамлакатимиздаги барча совринларни қўлга киритишган, шунингдек улар пляж футболи совринларига ҳам эгалик қилишган.
2009 йил айниқса “Севинч” қизлари учун совринлар йиғиш бўйича сермаҳсул бўлди. Қизлар бир қатор халқаро мусобақаларда юртимиз шарафини муносиб ҳимоя қилишди. Жумладан, Россияда ташкил этилган мини футбол бўйича аёллар ўртасидаги “Истринская жемчужина” халқаро мусобақасида бош совринни. Иорданияда бўлиб ўтган мини футбол бўйича “Омон-76” кубоги мусобақаларида қатнашиб юртимизга ғалаба билан қайтиб келишади. Бундан ташқари худди шу йили, Қарши шаҳрида бўлиб ўтган Халқаро “Karshi Cup-2009” турнирида рақибларига ҳеч қандай имкон қолдирмасдан бош совринни қўлга киритишади.
Ўша йили ички чемпионатимизда “Севинч” қизлари мамлакат кубогини қўлга киритиша олмаган лекин бунинг ўрнига, улар Болгарияда бўлиб ўтган яна бир нуфузли мусобақа – Европа Кубоги совринини қўлга киритишиб қайтишади, шундай қилиб, Ўзбекистонда аёллар футболи қай даражада ривожланаётганини исботлаб беришган.
2010 йили “Севинч” қизлари 2007 йилда қўлга киритган барча рекордларини такрорлашади яъни мамлакатимиздаги барча совринларни соҳибаларига айланишиб, Ўзбекистон терма жамоаси таркибида, БАА да ташкил этилган XIV Араб ўйинлари мусобақалари доирасидаги аёллар ўртасида бўлиб ўтган мини-футбол мусобақалари ғолиблигини ҳам нишонлашган.
2010 йил апрел ва сентябрь ойларида эса “Омон-76” ва “Karshi Cup-2010” халқаро турнирларининг кумуш медалига сазовор бўлишган. Футзал бўйича Европа кубоги мусобақаларида эса фахрли учинчи ўринни эгаллашиб, бронза медалини қўлга киритишган.
2011 йилдан кетма-кет ҳозиргача “Севинч” қизлари аёллар ўртасидаги Ўзбекистон чемпионати шоҳсупасини ҳеч қайси жамоага бермай келмоқда.
“Севинч” қизлари 2009 ва 2014 йиллардан ташқари саккиз марта аёллар ўртасидаги катта футболда Ўзбекистон Кубогини қулга киритишган.
Мамлакатимизда кейинги пайтларда соҳил футболи ҳам ривожлана бошланди. Ушбу футбол тури бўйича ҳам бизда 2007 йилдан қатор мусобақалар ўтказилиб келинмоқда. “Севинч” қизлари ушбу футбол турида ҳам етакчилик ролини ўйнашмоқда. Улар 7 карра чемпионликни ва шунча Ўзбекистон Кубогини қўлга киритишган.
Жамоа 2015 йилнинг бошида ўтказилган мини футбол бўйича XI Ўзбекистон чемпионатининг бош совринини ва мини футбол бўйича IX Ўзбекистон Кубогини ҳам эгаллашди.
Юқорида айтиб ўтганимиздек “Севинч” жамоаси жорий мавсумда ўн биринчи марта Ўзбекистон чемпиони бўлди. 15 ноябр якшанба куни Олмалиқ шаҳрида ўтказиладиган XIV Ўзбекистон Кубоги финалида жамоа зафар қучса, бу йилги мавсумдаги футбол бўйича аёллар ўртасидаги барча чемпионатларнинг ҳамма совринини қўлга киритган жамоага айланади.
ЎРИНБОСАРЛАРГА ЭЪТИБОР
Айни пайтда “Севинч” ПФКнинг базаси ҳисобланган “Геолог” спорт ва соғломлаштириш марказидаги тайёрлов гуруҳларида 100дан ошиқ ёш қизчалар малакали мутахислардан футбол сирларини ўрганиб келишмоқда. Тайёрлов гуруҳига ҳоҳлаган ота-она ўз фарзандини олиб келиши мумкин, фақат соғлиги талабга жавоб берса бўлди. Улар орасидан дастлаб мамлактимиз биринчилигида иштирок этадиган жамоага танлаб олинади ва кейинчалик асосий жамоа сафига қўшилади. Ёш футболчи қизларга Гулнора Тўраева, Елена Белова, Садоқат Рўзиева ва Камола Усманова каби мураббийлар машғулотлар ўтказиб келишмоқда. Кўриниб турибдики жамоага келгусида футболчилар тайёрлаб бериш тўғри йўлга қўйилган.
ОАВларда чоп этилган материаллар асосида тайёрланди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
