Олий Лиганинг сўнгги турида «Динамо» «Олмалиқ»ни қабул қилиб, ўйиннинг сўнгги сонияларида муҳим ғалабани қўлдан чиқарди ва натижада турнир жадвалининг сўнгги ўринига тушиб кетди. Жамоа муваффақиятсизликка учрагач, клуб бош мураббийи Баҳром Ҳакимов мухлислардан узр сўради.
«Олмалиқ» билан ўйиннинг биз учун нақадар муҳимлигини ҳаммамиз яхши тушуниб тургандик. Футболчилар масъулиятни ҳис қилган ҳолда ўйнашди. Жамоамиз ёмон ҳаракат қилгани йўқ. Ҳисобда олдинда бораётганимизда ҳам имкониятларга эга бўлдик. Ҳаммаси ўз қўлимизда эди. Афсуски, ўйин тугаётган сўнгги сонияларда ўз дарвозамиздан тўп ўтказиб юбордик. Очиғи, бу биз учун жуда аламли ва қаттиқ зарба бўлди. Ҳимоядаги хато қимматга тушди. Аксарият ёш ўйинчиларга тажриба етишмади. Агарда 1:0 ҳисобини сақлаб қола олганимизда Олий Лигада қолган бўлардик. Аслида “Олмалиқ” ҳам яхши жамоа. Уларга шу куни очко зарур бўлмасада, фақат ғалабани кўзлашганди. Улар ҳар қандай рақибга жиддий қаршилик туғдира олади» - дейди мураббий.
«Динамо» клубида иккинчи давра бошланишига бир неча кун қолганида иш бошладим. Биз ўтказган ўйинларимизда ўзимизни кўрсатишга уриндик. Таркибни йиғиб, футболчиларнинг жисмоний ҳолатини яхшилашга ҳаракат қилдик, йигитлар ҳам борини майдонда бериб, вазиятни ўнглашга интилишди. Бунинг учун ҳарчанд ҳаракат қилсак-да, барибир мақсадимизга эриша олмадик. Жуда кўп ўйинларда ғалаба қозона туриб, омадсизликка юз тутдик. Бу жуда ачинарли бўлди. Менинг клубдаги кейинги тақдирим қандай кечишини клуб раҳбарияти ҳал қилади. Агар истеъфога чиқаришса, тўғри қабул қиламан - истеъфо ҳар қандай мураббийнинг қисматида бор, бундан ҳеч ким қочиб қутула олмайди. Бизни қўллаб-қувватлаган барча ишқибозларга катта раҳмат. Минг афсуски, биз уларнинг ишончини оқлай олмадик. Мухлисларимиздан ва клуб раҳбариятидан узр сўрайман. Биз ҳам «Динамо»нинг Олий Лигада қолишига ишонгандик. Футболчиларга эътирозим йўқ, уларга кўрсатган ўйинлари учун миннатдорчилик билдираман» - дея фикрини якунлади Баҳром Ҳакимов.
Матнда хатолик топсангиз, ўша хатони белгилаб, бизга жўнатинг (Ctrl + Enter).