Саудия Арабистонининг “Ан-Наср“ клубида тўп сураётган португалиялик ҳужумчи Криштиану Роналду Forbes журнали талқинига кўра дунёнинг энг кўп маош олувчи спортчилари рейтингида биринчи ўринни эгаллади. Рейтинг нашрнинг расмий сайтида эълон қилинди.
Қайд этилишича, Роналду кетма-кет тўртинчи йил ва фаолияти давомида олтинчи бор сердаромад спортчилар рейтингида пешқадамлик қилмоқда. У сўнгги 12 ой ичида солиқлар ва агентлик тўловларигача бўлган миқдорни ҳисоблаганда тахминан 300 миллион доллар ишлаб топди. Ушбу умумий сумманинг қарийб 235 миллион доллари унинг “Ан-Наср” клуби билан тузилган йиллик шартномасидан, 65 миллион доллари эса реклама, тадбирларидаги иштирок, лицензиялаш, эсдалик совғалари ва бошқа тадбиркорлик фаолиятидан тушган.
Роналду спортчилар даромадлари рейтингида олти марта пешқадам бўлиш бўйича Майкл Жордан билан тенглашиб олди. Бу борада ундан олдинда 11 марта йилнинг энг бой спортчиси рейтингини бошқарган Тайгер Вудс жойлашган. Шунга қарамай, Роналдунинг сўнгги ишлаб топган суммаси тарихий ҳисобланади.
2025-йилга нисбатан Роналдунинг даромади 25 миллион долларга ошди. Бу йил унга ўз спорт турларида даромад бўйича рекордларни янгилаган яна икки нафар спортчи ҳамроҳлик қилмоқда.
"Интер Майами" футболчиси Лионель Месси эса рейтингда учинчи ўринни банд этди. У бир йил давомида жами 140 миллион евро ишлаб топган. Ушбу даромаднинг ярми майдонда, қолган ярми эса майдондаги ташқаридаги фаолияти орқали топилган.
“Феррари” пойгачиси Луис Ҳемилтон сўнгги 12 ой ичида тахминан 100 миллион доллар ишлаб топди. Бу унинг 2021 йилда “Мерседес” таркибида ҳаракат қилган пайтида ўзи ўрнатган Формула-1 рекордини (82 миллион доллар) янгилади. “Лос-Анжелос Доджерс” жамоаси юлдузи Шоҳей Отани эса 127,6 миллион доллар ишлаб топиб, бейсбол бойича Мейжор Лига “тожини” қайтариб олди. Ундан аввал, 2025 йилда ”Нью Йорк Мец” ташқи ҳимоячиси Хуан Сото 114 миллион доллар билан бир йил давомида пешқадамлик қилаётган эди.
Матнда хатолик топсангиз, ўша хатони белгилаб, бизга жўнатинг (Ctrl + Enter).