Шерали Бобоқулов: "Чемпионлик учун курашга тайёрмиз"
2015 йилги мавсумни кўтаринки кайфиятда ўтказган “Металлург-вумен” жамоаси аъзолари Ўзбекистон Конституцияси куни арафасида муассислар томонидан муносиб тақдирланди. Ушбу фурсатдан фойдаланиб биз жамоа бош мураббийи Шерали Бобоқулов билан ортда қолган мавсум ҳамда келгуси режалар ҳақида суҳбатлашдик.
- Шерали, аввало сизни, мураббийлар штабини, барча ўйинчиларни 2015 йилги мавсумда эришган ютуқларингиз билан табриклаймиз. Одатда, мавсум охирига етгач ортга бир назар ташланади. Эришилган ютуқлар сарҳисоб қилинади. Йўл қўйилган камчиликлар таҳлил этилади. 2015 йилги мавсумдан кўнглингиз тўлдими?
- Табрик учун раҳмат. Бош қомусимиз – Ўзбекистон Конституцияси куни биз учун қўшалоқ байрамга айланиб кетди. Мавсумда эришилган ютуқлар учун муассисларимиз ўйинчиларимизни муносиб тақдирлашди. Бунинг учун аввало уларга катта раҳмат билдирмоқчиман. Биз футболчилар зиммасидаги асосий вазифа ажойиб ўйинимиз билан Бекобод аҳлини, “Металлург-вумен” ишқибозларини хурсанд этиш, уларнинг кайфиятини кўтаришдир. Бу вазифани шараф билан уддаладик деб ўйлайман. Ташкил этилганимизга эндигина уч йил бўлди. Дастлабки мавсумда бронза медали билан тақдирланган бўлсак, икки йилдирки чемпионатда вице-чемпион бўлаяпмиз. Шунингдек, Ўзбекистон кубогини қўлдан бермай келаяпмиз. Кимлардир, ўтган йилги ғалабаларимизни тасоддифий деб баҳолашганди. Бироқ биз бу йил Кубокни ўзимизда сақлаб қолган ҳолда, мамлакат чемпионлиги учун ҳам жиддий баҳс юритдик ва ютуқларимизга шубҳа қилган инсонларга ҳақлигимизни исботладик. Бекобод аҳли футбол ҳавоси билан яшайди. Пойтахт вилоятининг энг чекка ҳудудида истиқомат қилаётган меҳнаткашлар, ишчи ва хизматчилар учун футбол куни ҳақиқий байрамдир. “Металлург” футбол клубининг ҳар иккала жамоаси – йигитларимиз ҳам, қизларимиз ҳам олдиларига қўйилган вазифани бажариб келишаяпти деб ўйлайман. Ўз навбатида аёллар жамоасини ташкил этишда, оёққа туришида бизга тўғри йўл кўрсатганлиги, ҳамиша қўллаб-қувватлаб келаётганлиги учун Ўзбекистон металлургия комбинати раҳбариятига, “Металлург” футбол клуби раҳбариятига, хусусан бош мураббий Рустам Тўхтамуродович ҳамда жамоа бошлиғи Шавкат Неъматовичларга ҳам катта ташаккур билдираман.
- Бевосита жамоа ўйинчиларига, уларнинг мавсумдаги муваффақиятларига қўшган улушларига баҳо бериб ўтсангиз...
- Аввало жамоамизнинг миллий чемпионатлар тарихидаги бир қатор рекордларни янгилаганини мамнуният билан қайд этишни истардим. Футболчиларимиз 22 учрашув мобайнида рақиблар дарвозасига 135 та тўп киритишди. Ҳали бирон бир жамоа бундай натижага эришмаган. Тўпурарлар рўйхатини бошқарган ҳужумчимиз Людмила Карачик эса рақиблар дарвозасини 66 марта ишғол этиб, у ҳам тўпурарлик борасида мутлоқ рекорд натижани ўрнатди. Бу икки жиҳат бўйича биз яққол етакчилик қилдик. Тўғри, 11 карра мамлакат чемпиони – “Севинч”га асосий ўйинларни бой бериб қўйдик. Аммо қайд этилган ҳисобларга назар ташланг. Катта фарқ билан ютқазмадик. Тенгма тенг ўйнадик. Бироз омадимиз чопганда ижобий натижага ҳам эришган бўлардик. “Севинч”да таркиб йиллар давомида шаклланган. Ўринбосарларни тайёрлаш иши тўғри йўлга қўйилган. Бугунги кунда қаршиликлар тўрт-бешта таркибга эга деб бемалол айта оламиз. Биз эса энди аёллар футболини йўлга қўяяпмиз. Камчиликлар бўлиши табиий. Тажриба, маҳорат мана шундай камчиликлар, нуқсонларга йўл қўйиб тўпланади. Энди чизиқларга тўхталадиган бўлсам, ҳужум чизиғимиз ишончни тўлиқ оқлаганлигини юқоридаги рақамларда келтириб ўтдим. Ярим ҳимоячиларимизнинг саъйи ҳаракатлари эвазига аксарият учрашувларда йирик ғалабаларни қўлга киритдик. Демак, бу чизиқда ҳам муаммолар йўқ ҳисоби. Ҳимоячиларимиз ва дарвозабонлардан ҳам нолимайман. Тўғри баъзан кутилмаган, кулгили голларни ўтказиб юбордик. Бироқ қандай қийин ҳужумларга бардош бера олганлигимизни ҳам учрашувларга тушиб, кузатиб бораётган мухлислар яхши билишади. Яққол етакчиларимиз бор. Булар ҳужумчимиз – Людмила Карачик, жамоа диспетчери, плеймейкер – Наргиза Абдурасулова, таянч ҳимоячимиз, жамоа сардори Албина Белалова. Уларнинг хизматлари беқиёс. Қолган барча ўйинчиларга ҳам мавсумни бир текис ва кўтаринки кайфиятда ўтказишганлиги учун миннатдорчилик билдираман.
- Бу йилги таркиб келгуси мавсумга ҳам сақлаб қолинадими? Янги ўйинчиларни кўрамизми?
- “Металлург”да таркибни сақлаб қолиш анъанаси йигитлар жамоасидан бизга ҳам юққан. Асосий таркиб ўйинчиларини ўзгартириш ниятимиз йўқ. Баъзи чизиқларни эса кучайтиришимиз керак. Таянч ярим ҳимоя чизиғида Наргиза Абдурасулова ёлғизланиб қолаяпти. Унга муносиб ёрдамчилар тайёрлаяпмиз. Мисол учун Юлдуз Набиева, Дилдора Нозимова, Холида Дадабоева, Нозима Камолтоева сингари қизларимиз ярим ҳимоя ва ҳужум чизиқларини яқин орада мустаҳкам қўлга олишади. Бу йилги мавсумда Моҳигул Икромова, Умида Худойбоқова сингари қизларимизнинг ўрни яққол билинди. Улар ҳам сафга қайтишса олдинги чизиқдан кўнглимиз тўлиқ хотиржам бўларди. Қанот инсайдларимиз Иродахон Турдалиева, Лутфинисо Ҳамидовалар ҳам бу йилги мавсумда катта юкни ўз зиммаларига олишди. Ҳимоя чизиғида Шодия Тошева, Албина Беляловаларга тез орада Камола Бердиева, Нозима Эргашева, Маҳлиё Абдурашидова, Насиба Ҳожиева сингари ўринбосарлари катта ёрдам кўсатишига ишонаман. Марказ ўйинчиларимиздан Мавлуда Мунавварова олдинги чизиқдаги фаоллиги билан яққол ажралиб турганлигини ҳам эътироф этиш лозим. Бир йил муқаддам бизда дарвозабон муаммоси бор эди. Бу йил Гуландон Бойматова асосий оғирликни ўз зиммасига олди ва Алина Демьяненконинг вазифасини енгиллаштирди. Бу қизларимиз ҳам ўз устларида ишлашдан тўхташмаса, маҳоратларини ошириб боришса жамоага бошқа дарвозабон чақиришнинг ҳожати қолмайди. Маҳфуза Туропованинг тажрибасига катта умид қилгандик. Лекин унинг олдинги олинган жароҳатларидан тузалиб, асосий таркибдан жой олиши чўзилиб кетди. Фақатгина мавсумнинг иккинчи ярмида, ўшанда ҳам битта таймдагини уни майдонга тушира олдик. Бир сўз билан айтганда бугунги таркибни сақлаб қолишимиз керак. Уни янада кучайтириш фикридан ҳам воз кечмаймиз. Кўз остимизга олиб қўйган ўйинчилар бор. Агар келиша олсак, уларнинг жамоалари бизга ўтишига тўсқинлик қилишмаса баъзи ўзгаришларга қўл урамиз.
- 2015 йилги мавсумда кўнгилни хижил қиладиган жиҳатлар бўлмадими?
- Иш бор жойда камчилик албатта бўлади. Аммо мени хурсанд қилган жиҳати жамоалар аста секин уй-сафар тизимига кўникиб боришаётганлиги, худди эркаклар ўртасидаги миллий чемпионатларимиз сингари ўз мухлислари эга бўлишаётганлигидир. Аёллар футболига эътибор аввалгиларга қараганда сезиларли равишда ошди. Мухлислар томонидан ҳам, мутахассислар, ҳомийлар томонидан ҳам. Ўйинларнинг сифати ошиб бораяпти. Барча жамоаларда олдинга силжиш яққол кўриняпти. Мисол учун чемпионлик учун “Севинч” ва “Металлург” ўртасида кураш жиддий ўтди деб ўйлайман. “Андижанка”, “Бунёдкор” жамоаларининг бронза медали учун баҳси ҳам ишқибозларни беэътибор қолдирмади. Ўз йўлини топиб бораётган жамоалар қаторига “Олмалиқ”ни, “Машъал”ни, “Гули”ни қўшган бўлардим. Кейинги мавсумларда ҳакамлар, назоратчи ҳакамлар масаласига ҳам жиддий эътибор берилишини истардим. Малакали, эл таниган мутахассисларнинг аёллар футболига кўпроқ жалб этилиши фақатгина тараққиётимизга хизмат қилади деб ўйлайман. Энг асосийси, кейинги йилда мусобақа тақвимига жиддий ёндошиш керак. Бу йил битта турни тугатмай иккинчи турни бошлаб юборган ҳолатларимиз кўп учради. Нега битта турни бир, ошиб борса икки кун ичида ўтказиш мумкин эмас. Бизга нима халақит қилаяпти? Ўйинларнинг эркаклар ўртасидаги чемпионат учрашувлари билан битта вақтга тўғри келиб қолишининг олди олинган эмиш. Бўлмаган гап. Чемпионатимизда қатнашган жамоалар орасида фақат биз эркаклар жамоамиз билан ўйинларни битта стадионда ўтказамиз. Қолган барча жамоаларнинг эркаклар жамоаси билан йўли умуман кесишмайди. “Севинч” ўз ўйингоҳига эга. “Андижанка”нинг ўз базаси бор. Олмалиқда ҳам эски стадион аёллар жамоасининг ихтиёрига бериб қўйилган. Қолган жамоаларимиз ҳам турли майдонларда ўйинларини ўтказишади ва эркакларга халақит беришмайди. Унда муаммо нимада? Ҳакамлар етишмаяптими? ЎзПФЛга айтиб бу масаланинг ҳам ечимини топса бўлади. Иштиёқ бўлса муаммо ечилади. Мухлисларга ҳам бу қулайлик туғдиради. Бир кунда барча ўйинлар натижасидан воқиф бўлишса, мусобақа жадвалларини ўзлари тузиб боришса, завқланишса, бунинг нимаси ёмон. Яхлит тизимга, яхлит тақвимга ўтишимиз шарт ва зарур.
- Кейинги мавсумга тайёргарлик жараёни қачон бошланади. Жамоа олдига қандай вазифалар қўйилди?
- Тайёргарликни январь ойининг дастлабки кунларидан бошлашни режалаштириб турибмиз. Клуб раҳбарияти, муассисларимиз кейинги мавсумда биздан чемпионликни кутишаяпти. Чемпионлик учун футболчиларимизнинг маҳоратлари ҳам ўсиб етди деб ўйлайман. Табиийки, Ўзбекистон кубогида ҳам бўш келиш ниятида эмасмиз. Асосий вазифа эса чиройли, ҳужумкор ўйин билан биринчи навбатда Бекобод аҳлини, қолаверса аёллар футболининг барча мухлисларини хурсанд этишдир.
- Бу йўлда Сизга, жамоанинг барча раҳбариятига, футболчи қизларга омад ёр бўлишини истаймиз. Мақсад ва вазифаларингизни бажаришда куч қувват тилаймиз.
- Раҳмат.
Манба: www.metallurg-pfc.uz
Киритилди: 12:02, 11.12.2015. Ўқилди: 3542 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
