Бу шахсий мақола. Ўтиб бораётган йилнинг энг муҳим воқеаларини ўнлик шаклида тузиб чиқдим. Ўзимга ёққан, ўзим эътибор берган ва ўзимга маъқул келган футбол ҳодисаларини ёдга олганман, холос.
10. Мураббийлар эпидемияси.
Бу йил ҳақида гап кетадиган бўлса, бир қатор тажрибали мураббийларнинг омадсизлиги билан эсда қоладиган бўлди:
Анчелоттидан бошланди ҳаммаси. Одатда, бунақа ишлар Мадриддан бошланади...
Моуриньонинг ҳам 3 йиллик миссияси поёнига етди. Маурнинг “Челси”ни премьер-лигадан тушириб юборишини кутиб ўтиришмади ҳалиям...
Луи ван Гаал асри ҳам тугаб бораётганлигини кўряпмиз. Янги йилда у ҳам бошқа жамоа қидириши турган гап. Бироқ, голланднинг қаерга боришини билмаймизу, ўрнини Моуриньога бўшатиб бериши мумкинлигидан о-о-озгина хабаримиз бор ҳар ҳолда…
“Реал”га олинган Рафа Бенитеснинг курсиси ҳам қимирлаб турибди. Мухлислар ҳар куни талаб қилишмоқда унинг кетишини. У ҳам янги йилнинг илк ойида ариза ёзса кераг-ов…
Пеллегринида ҳам шунақароқ ҳолат. “МС” сарфланаётган пулга яраша ўйнамаяпти. Табиийки, унинг бошига “Бавария”да зерикаётган Пеп Гвардиола келса керак. Бу ҳам деярли аниқ бўлиб улгурган тахмин.
Йилнинг аввалида ҳам бизда мураббий алмашганди. Бу ҳақда кейинроқ, албатта.
9. Мессининг фантастик голлари.
Леонель Мессининг голларига, айниқса, суперрейд орқали амалга оширадиган голларига ўрганиб кетганмиз. Лекин икки йил қаторасига “Олтин тўп”ни Роналдуга олдириб қўйган феномен бу сафар асосий рақибига ҳеч қандай имконият қолдирмади. Кейинги йилнинг илк ойи Мессининг ана шу тўпни қайтариб олиши билан бошланади, албатта. Бунга эса у уч-тўртта ўйинда кўрсатган фантастик ҳаракатлари билан эришди, деб айта оламан.
“Бавария” дарвозасига урган голи ва Испания чемпионлигини ҳал қилувчи баҳсдаги “слалом юриши” йилнинг шедев голлари туркумига кириши билан биргаликда, асосий баҳсда кимлар юкни кўтариши лозимлигини эсга солиб қўйди. Месси терма жамоада ҳам шундай рейдлар уюштирди Чилидаги мусобақада, бироқ “Барса”даги фаолияти барибир унинг “кўзири” бўлиб қолажак, шекилли. Беш-олти сониялик ҳаракатлари билан Лео ким аслида кимлигини эслатиб қўяверди ҳаммага. Ҳеч қачон Мессини ўзидан зўр демаган Роналду ҳам охири бу йил тан олди. Бошқа чораси қолмади. Браво!
8. Чилининг ғалабаси.
Мессининг омадсиз мусобақаси… Тўғри, бир йил олдингидек бу мусобақа ҳам Аргентина учун иккинчи ўрин билан тугади, буни ёмон натижа деб бўлмас балки. Аммо, тан олинг, Аргентина ўтган йили Германиядан енгилган эди. Бу сафар Чилидан. Фарқи бор-а?! Шу боис, аргентиналиклар бу турнирни бемалол, катта ҳарфлар билан ОМАДСИЗ деб атасалар бўлади. Чили бу беллашувда ҳақли ғалабани қўлга киритгани сўзимизни тасдиқлайди. Пенальтилар сериясида гоҳида кучсизлар ҳам енгиб кетадилар. Бу турнирда кучлилар енгди, адолат қарор топди. Дунё яна бир грандни кашф этди. Унинг номи ЧИЛИ эди. Бу юрт вакиллари юлдузлар терма жамоасини мағлуб этиб, кейинги мусобақаларда уларга бепарво бўлувчиларни қаттиқ жазолашларини эслатиб қўйишди. Огоҳ бўлинг-а энди, фалон-фалонлар!..
7. Левандовскийнинг рекорди.
Левандовский деган йигит икки йилда бир порлайди. Порлагандаям “Реал”га 4та гол уриб ташлайдими-е, 9 дақиқа ичида 5та гол уриб ташлайдими-е, хуллас, “гол жинниси”га айланади-қўяди. Кейинги йил давомида юраверади, ҳеч нарса бўлмагандек. Тўғри, бу йил у Гиннес рекордлар китобига кирганидан кейин ҳам роса гол уриб юрди. Аммо барибир ўша одатни тарк этмайдигандек туюлаверади – гол урмасдан ҳам йиллаб юра олиш одати!
Аммо “Ювентус” хавотир олса бўлаверади. Февралда Роберт кўпинча яхши формада бўлади.
6. “Барса” 5 карра ғолиб:
Йил Каталонияга бағишланди!
Ўтган йил охирларидаги “Барселона”нинг аҳволи ёдингиздами? Жамоага янги мураббий келган, жамоасини ўйната олмаётган пайтлар эди. Эл класикодаги Суарес дебюти омадсиз бошланган, хуллас, ўртамиёна клубга ўхшаб бораётганди “Барса”. Энрике билан Месси ўртасидаги тушунмовчиликлардан сўнг эса, янги мураббийнинг клубни тарк этиши ҳақидаги гаплар урчиганди, эсингизда бўлса. Аммо Луис Энрике ғалати одам экан. У ҳаммасини тўғрилай олди. Тўғрилаганидаям, шу қадар тўғриладики, асти қўяверинг. Дастлаб чемпионатда ғолиб бўлди. Кейин ЕЧЛни енгди. Суперкубок соҳиби бўлди. Охири ҳақли равишда жаҳон чемпиони деган номни ўзиники қилиб олди. Пепнинг даври қайтиб келгандек бўлди. Хави-Иньеста-Месси учлиги сиймоси бошқа учликда – Месси-Неймар-Cуарес учлигида намоён бўлди. Бу “Барса”ни келаётган йилда ҳам тўхтатиб қолишнинг иложи йўққа ўхшайди.
5. Келишганларни ушладик!
Уларни нима қилайлик энди???
Ҳа, жиноятчилар гўёинки ушланди. Лекин нимагадир ижрога келганда, оқсадик. Айримлар бу ҳолни КУТИЛГАН ВОҚЕЛИК деб атамоқдалар. Менимча, буниси кутилмаган эди. Ўзи, олий лигамиздаги келишилган ўйинни эълон қилиш илк кутилмаган воқеа бўлса, ижросини аста-секин “эсдан чиқариб юбориш” иккинчи кутилмаганлик эди. Ҳай, майли, энди нима деймиз: Журналистнинг қўлидан нима ҳам келарди? Борини гапирди, айтди, кўрсатди, ёзди. Уёғига эса мутасаддиларимизга инсоф берсин. Агар бир ишни охиригача етказа олмас эканлар, бошламасинлар эди. Бошладиларми, мард бўлиб якунига етказсинлар. Шу!
4. АПЛга нима бўляпти?
Мен таниган ва билган АПЛ бу йили чилпарчин бўлиб кетгандек чамамда. Олдинлари ҳам дастлабки турларда қандайдир “Сандерленд” ё Саутгемптон” пешқадам бўлиб оларди, аммо 10-турдан кейин ҳаммаси жойига тушарди. Бу йил эса умуман бўлакча ишлар содир бўлмоқда. “Лестер”нинг олдинда юрганига битта “Челси”ни айбдор санаб бўлмайди, ахир. Лондонликларда инқироз экан, бошқалар-чи? Улар нима қилишмоқда? Айниқса, “Арсенал”???
Бу довдир жамоанинг ҳолати шунақаки, у биринчи ўринга кўтарилиши мумкин ҳолда ҳам 0:4га енгилиб қўяверади. Арсен Венгер юқоридаги мураббийлар эпидемиясига кирмаса-да, уни ҳам қўшиб юбориш вақти келганини таъкидламоқда баъзилар. Хуллас, кузатишда давом этамиз. Барибир “Лестер”нинг тахтда туришига ҳеч ким ишонмаяпти. Раньери эса ишонтирмоқда. Йил тугаб бораётган паллада, Клопп деган одам ўзгача туш кўраётган инглизларни уйғотишни бошлади: “Туринглар-е-е-е-ей!” (Узр, немисчасини билмайман...)
3. Эл-класико тугадими?!
Мана буниси энди даҳшат. АПЛ-ку изига тушиб кетар, бироқ Испания премьеросида “эл класико”нинг маъноси йўқолса, миллий чемпионат тамом бўлди, деяверинг. АПЛда “Челси” бўлмаса, “Арсенал” бор, “МЮ” бўлмаса “МС” бор. “Ливерпуль” қаердандир уйғониб қолади. Аммо шўрлик испанларни бир ўйин ушлаб турса, не ажаб. Класико баҳсида бир жамоа азалий рақибининг уйига бориб 4та жавобсиз гол уриб келса, додингни яна қайси ўйинга айтасан??? Бошқа қайси ўйинни кўриш мумкин, билмадим, очиғи. Ҳа-я, 10:2лар ҳам бору бошқа учрашувларда, узр, адашиб кетибман...
2. Ўзбекистон терма жамоасининг 5та ғалабаси.
АПЛинггаям, ла-лигаганггаям, деймизу, саёҳатимизни тугатиб, жонажон Ўзбекистонимизга қайтиб келамиз. Бизда ўтиб бораётган йил ажойиб ғалабалар билан эсда қоладиган бўлди. Бабаяннинг терма жамоага келиши ва қаторасига 5та ўйинда ғалабага эришишини очиғи, мен кутмагандим. Айниқса, Тошкентдаги Шимолий Корея билан бўлган ўйиннинг 3-дақиқасида умуман ишонмай қўйгандим. Ютқазаётгандик-да!
Бабаян терма жамоа бош мураббийи сифатида чиройли рекорд қайд этиб, гуруҳда қолиши мумкин бўлган жамоамизни деярли кейинги босқичга олиб чиқди. Деярли. Буёғига, келаётган йилда иккита осон ўйинда муваффақиятга эришишимиз қолди, холос. Кейин эса оғир босқич. Сараланганлар билан ўйнашимизга тўғри келади. Ҳар доим мушкулот туғдиради бу баҳслар. Аммо барибир умид қилиб қолаверамиз. Умид қиламизки, кейинги йиллар сарҳисоби қилинаётганда, терма жамоамиз муваффақияти яна ва яна юқори ўринларда эсга олинажак. Ишониб қоламиз.
1. Энг муҳими.
Энг муҳим воқеага етиб келдим. Мен учун энг муҳими – юқорида номи қайд этилган ўйинлару ҳодисаларни ЎЗ УЙИМДА КЎРГАНИМ, УЙИМИЗ ТЎРИДА ОСИҒЛИК ТУРГАН ТЕЛЕВИЗОРИМИЗДА ТОМОША ҚИЛГАНИМ, СТАДИОНГА БОРИБ-ДА КУЗАТГАНИМДИР!!! Бундан ортиқ бахтни билмаган эдим оламда. Тушундингиз деб ўйлайман мени?!
Юқорида айтиб ўтдиму, ўнталик шахсий, деб. Ўзимга тегишли, деб. Шунинг учун биринчи ўринда бошқа қандайдир футбол ҳодисасини ёки қайсидир шедевр голни кутган мухлислардан узр сўрайман. Умидлари оқланмагани учун. Аммо кейинги йил, насиб қилса, бошқачароқ ўнталик тузамиз, албатта. Европа чемпионати турибди олдинда. ЕЧЛлар, термамиз ўйинлари. Хуллас, кўришгунча.
Хайрулла Ҳамидов. Махсус сайт учун.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
