Бугун Ўзбекистон Миллий олимпия қўмитасида 2014-2015 йилларда Олимпиада ўйинлари дастурига кирган спорт турлари бўйича катталар ўртасида ўтказилган жаҳон чемпионатларида совринли ўринларни эгаллаган спортчиларимиз ҳамда 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларига йўлланма олган спортчилар, уларнинг ота-оналари, мураббийлари, шунингдек, Ўзбекистонда олимпия ҳаракатини ривожлантиришга муносиб улуш қўшаётган бир қатор юртдошларимизни мукофотлаш маросими ўтказилди.
Тадбирда Ўзбекистон Республикаси Бош вазирининг ўринбосари Баҳодир Ходиев, Ўзбекистон Миллий олимпия қўмитаси президенти, сенатор Мираброр Усманов ва бошқалар сўзга чиқиб, мамлакатимизда жисмоний тарбия ва спорт соҳасини ривожлантириш Истиқлолнинг дастлабки йилларидан бошлаб Давлатимиз сиёсатининг устувор вазифаларидан бирига айланганлигини, бу эса ўз навбатида энг аввало жамиятда соғлом турмуш тарзини қарор топишида ҳамда халқаро спорт майдонларида қўлга киритилаётган муваффақиятлар салмоғини юксалишида асосий омил бўлаётганлигини алоҳида таъкидлаб ўтдилар.
Шундан сўнг Ўзбекистон Республикаси Президентининг 2008 йил 25 ноябрдаги “Жаҳон чемпионатларида юқори натижаларга эришгани учун Ўзбекистон Республикаси спортчиларини мукофотлаш тартибини такомиллаштириш тўғрисида”ги Фармонига кўра 2014-2015 йилларда ўтказилган Жаҳон чемпионатида совринли ўринларни эгаллаган спортчиларни тақдирлаш маросими ўтказилди.
Шу ўринда таъкидлаш жоизки, мукофотланган жами 18 нафар спортчининг 14 нафари 2015 йили бўлиб ўтган жаҳон чемпионатларида совринли ўринларни қўлга киритишган. Мутахассисларнинг таъкидлашларича, ушбу кўрсаткич мамлакатимиз истиқлолга эришгандан буён юртимиз спортчилари томонидан Олимпия ўйинлари дастурига киритилган спорт турлари бўйича катталар ўртасидаги жаҳон чемпионатларида қайд этилган энг юқори натижа ҳисобланади.
Маълумки, жорий йилда “Рио-2016” ўйинларининг йўлланмалари учун кўплаб мусобақалар ўтказилди. Уларнинг аксарияти жаҳон чемпионатлари бўлганлиги боис, ҳар бир лицензия учун кураш ўта муросасиз рухда кечди.
Эътиборлиси, кучли рақобат остида бўлиб ўтган нуфузли мусобақаларда мамлакатимиз спортчилари 26 та Олимпиада ҳамда 24 та Паралимпия ўйинларининг йўлланмаларига эга бўлдилар.
Жумладан, XXXI ёзги Олимпиада ўйинларига енгил атлетикачиларимиз 7та, бокс, байдарка ва каноэда эшкак эшиш ҳамда оғир атлетика спорт турларида 5тадан, таэквондо (WTF), сузиш, эркин ва юнон-рим курашида биттадан йўлланма қўлга киритилди. Паралимпиячиларимиз эса спортнинг енгил атлетика (10 та), дзюдо (8 та), сузиш (4 та), шунингдек, ўқ отиш ҳамда пауэрлифтинг каби турларида биттадан йўлланмага эга бўлдилар.
Тадбирда “Рио-2016” ўйинларига йўлланма олган спортчилар ҳамда уларни вояга етказган ота-оналари, мураббийларига диплом ва пул мукофотлари тантанали суратда топширилди.
Шундан сўнг, Халқаро олимпия қўмитасининг “Спорт ва инновация” соврини Ўзбекистон Таэквондо (WTF) Миллий ассоциациясининг раиси Ботир Парпиевга топширилди. “Спорт ва инновация” соврини Халқаро олимпия қўмитаси томонидан 1985 йилдан буён спорт соҳасини ривожлантиришда инновацион ғояларни тадбиқ этаётган ва муваффақиятлар салмоғини юксалишида муносиб ҳисса қўшаётганларга бериб келинади.
Мукофотлаш маросимида, шунингдек, Ўзбекистонда олимпия ҳаракатини ривожлантириш, олимпизм ғояларини кенг тарғиб этиш борасида муносиб ҳисса қўшиб келаётган бир гуруҳ юртдошларимиз ҳам тақдирландилар.
Тадбир сўнгида 2015 йил якунларига кўра мамлакатимизнинг энг яхши спортчиси деб топилган Ўзбекистонда хизмат кўрсатган спортчи, Таэквондонинг (WTF) йўналиши бўйича жаҳон чемпиони Дмитрий Шокинга ҳам мукофот тантанали суратда топширилди.
Маълумки, 2016 йилда “Рио-2016” ўйинларига яна кўплаб лицензион мусобақалар ўтказилади. Умид қиламизки, мазкур мусобақаларда ҳам мамлакатимиз спортчилари муносиб иштирок этадилар ва Бразилияга йўл оладиган делегациямиз таркиби янада кенгаяди. Бу йўлда уларга омад ва зафарлар тилаб қоламиз.
Шавкат Жалилов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Қўқон-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
