«Реал Мадрид» ярим ҳимоячиси Федерико Вальверде жамоадоши Орельен Тчуамени билан юзага келган келишмовчилик ҳақида тўхталиб ўтди. Бу ҳақда Madrid Universal нашри хабар тарқатди.
27 ёшли футболчи айни дамда Жаҳон чемпионатига тайёргарлик кўриш учун Уругвай терма жамоаси ихтиёрига етиб борган.
«Ўзимни аъло даражада ҳис қиляпман. «Реал»нинг барча мухлислари ва клубдан катта далда олдим. Баъзан ҳаётда ва футболда ўсиш ҳамда улғайиш учун шундай синовлардан ўтиб туришга тўғри келади», — деди Вальверде.
Сўнгги воқеалар атрофидаги шов-шувларга қарамай, Вальверде бор эътиборини терма жамоага ёрдам беришга қаратганини таъкидлади:
«Мен доим ушбу кубокни бошим узра баланд кўтаришни орзу қиламан. Жаҳон чемпионатида ғолиб чиқиш — болаликдаги энг катта мақсадим».
Шунингдек, футболчи Уругвай тўртинчи ўринни эгаллаган 2010 йилги Жаҳон чемпионатини ёдга олди:
«Биз ўша жамоанинг ғалабалари билан улғайганмиз. Уругвай халқи биз билан фахрланиши учун ўша натижани такрорлашни жуда истаймиз».
Эслатиб ўтамиз, Уругвай терма жамоаси гуруҳ босқичида Испания, Саудия Арабистони ва Кабо-Верде билан куч синашади.
Матнда хатолик топсангиз, ўша хатони белгилаб, бизга жўнатинг (Ctrl + Enter).