Ўтган мавсумларда кўплаб омадсизликларни бошдан кечирган «Интер» Роберто Манчини бошчилигида совринлар учун курашга қўшилди. «Нерадзурри» еврокубокларга қайтишга шай. Португалия футболининг тирик афсоналаридан бири Луиш Фигу бу ҳолатдан хурсанд эканини яширмади. Собиқ вингер La Gazzetta dello Sport нашрига берган интервьюсида миланликларнинг яна скудеттога эга чиқиш йўлида улкан қадамларни ташлашаётганидан мамнун эканини билдирди. Ўз навбатида, бошқа рақиблар, хусусан, ҳозирда ажойиб формага кириб бораётган «Ювентус»га етарлича баҳо бериш лозимлигини уқтирди. 43 ёшли Фигу гарчи «Жузеппе Меацца» ёқимтойлари билан ҳамкорлик қилмаётган бўлсада, бу ерда футболчи (2005-2009 йиллар) ҳамда директор (фаолиятини якунлаганидан кейинги бир неча йил мобайнида) сифатида ўтказган кунларини ёрқин хотиралар билан ёдга олади. Луиш ҳозирда асосан, хайрия мақсадида уюштириладиган футбол турнирларида қатнашмоқда. Ўз навбатида, «Интер»нинг «А» сериядаги бир нечта омадсиз мавсумлардан кейин яна юксак чўққиларни кўзлаётганидан ҳам хабардор.
- Бир неча йил давом этган қийинчиликлардан сўнг «Интер» яна скудетто учун курашмоқда.
- Дарҳақиқат, улар мураккаб даврни бошдан кечиришди, катта пул сарфлашганига қарамай, жамоада сезиларли ўзгариш рўй бермади. Ҳозир эса клубнинг айни куч-қувватга тўлган пайти, барча Италия чемпионлиги ҳамда ЕЧЛда иштирок этиш ҳақида ўйламоқда.
- Худди эски даврлардагидек олдинда «Ювентус» билан ўтадиган «дуэль» кутиб турибди.
- «Интер»нинг турнир жадвалида пешқадамлик қилаётгани ёқимли, шунга қарамай, чемпионлик учун фақатгина иккита жамоа кураш олиб боради, демаган бўлардим. Италияда бунга лойиқ клублар бисёр. «Фиорентина» ҳамда дўстим Паулу Соузани ёддан чиқармаслик керак.
- Дарвоқе, португалча тактика ҳақида: Моуриньо учун жорий мавсумнинг шундай муваффақиятсиз кечишини кутганмидингиз?
- Бундай бўлишини олдиндан тахмин қилиш имконсиз. Унутмайликки, ҳамманинг ҳаётида қийин даврлар учрайди, ҳаттоки, кечагина Англия чемпионлигини қўлга киритганларда ҳам. Ҳар қандай вазиятда Моуриньо энг яхши мураббийлардан бири бўлиб қолаверади.
- Италиядаги ҳаёт тарзингиз ҳақида гапирсангиз...
- Дунёнинг турли шаҳарларига сафар қилдим, аммо Милан мен учун алоҳида аҳамиятга эга. Зеро, фаолиятимни айнан шу ерда якунладим. Мадриддан кейин Италиядаги футбол менга бироз заифдек кўринди. Аммо бу шаҳарда жаҳоннинг иккита буюк жамоалари борлиги рақобатбардошликни таъминлашга хизмат қилмоқда.
- Бироқ «Ювентус» ҳамиша миланликларга қарши курашишга шай...
- Албатта, «кекса синьора»ни ёддан чиқариш ярамайди, зеро бу клубнинг ўзига хос тарихи бор. Айтайлик, «Реал» ва «Барселона»нинг ўйинлари «Интер» ҳамда «Юве»никидан анча фарқланади, қолаверса, ўта муҳим Милан дербилари бор. «Интер» ва «Ювентус» рақобати ҳамиша кескинлик касб этади. Менимча, «А» серияга кучли «Интер» керак. Чемпионлик учун икки-учтадан кўпроқ жамоа кураш олиб борса, ишқибозлар ҳам зерикиб қолмайдилар.
- Оқ-қораларга қарши ўйинларда эсда қоларли вазиятлар бўлганми?
- Албатта, бунақаси кўп учраган. «Интер»нинг гуллаган даврида Миланда ўйнаганимдан хурсандман.
- «Интер»нинг скудеттони қўлга киритишига нима кўмаклашиши мумкин?
- Улардаги ғалабага бўлган иштиёқ. Бир неча йилдан буён совринсиз қолишаётгани ўзига хос мотивация вазифасини ўташи тайин. Ўйлашимча, ҳамма Чемпионлар Лигасига қайтишни хоҳлайди.
- «Интер»нинг энг кучли томонлари?..
- Жамоа босим ва муаммоларга қарши қандай курашиш лозимлигини билади. Мавсум сўнггида сезиладиган чарчоқни енгиб ўта олишади. Менимча, бундай тажриба «нерадзурри»га асқотиши тайин.
Манба: Football.ua,
Ўткир УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
