Испания терма жамоаси бош мураббийи Висенте Дель Боскенинг фикрича, Андрес Иньестани ҳисобдан чиқаришга ҳали эрта экан. У «Барселона» ярим ҳимоячисининг Францияда бўлиб ўтадиган Европа чемпионатида энг яхши формасида бўлишига умид қилмоқда. Шунингдек, испаниялик мутахассис Goal.com сайтига берган интервьюсида Икер Касильяснинг асосий дарвозабонга айланишига ишонаётганлигини билдирди.
- Испания термасининг ҳозирги таркиби танқидларга учради. Сизнингча, бу борада қандайдир ўзгартиришлар киритиш лозимми ёки футболчиларнинг ҳолатидан қониқиш ҳосил қиляпсизми?
- Айрим ўйинчиларни ҳисобдан эрта чиқариб қўйишади. Бразилиядаги жаҳон чемпионатидан сўнг ҳам шундай бўлди. Кўпчилик у ёки бу футболчини таклиф қилишимиз лозимлиги ҳақида гапирди. Лекин айрим йигитларнинг қайси пайтда қандай ўйин намойиш этишларини тахмин қилиш қийин. 2008 йили терма жамоани қабул қилиб олганимда ҳозирги таркибдагиларнинг кўпчилиги бор эди. Давид Сильва, Сеск Фабрегас, Андрес Иньеста, Санти Касорла, Серхио Рамослар шулар жумласидандир. Аммо уларни Бразилияга олиб борганимизни танқид қилишди. Айни пайтда Иньеста фаолиятидаги энг яхши дамларини ўтказмоқда. Умид қиламизки, у Францияга ҳам худди шундай ҳолатда етиб боради. Биз бир-биримизни қўллашимиз керак.
- Сўнгги пайтларда Херард Пикени ишқибозлар ҳуштакбозлик билан қарши олишларига кўникиб қолдик. Хўш, Испания термаси бош мураббийи сифатида шогирдингизнинг бундай ҳолатга тушиб қолишига қандай қарайсиз?
- Буни эшитиш оғир. Лекин биз ўрганиб қолдик. Херард хуштакбозликка умуман эътибор бермайди. Бу эса, энг муҳими. Пике Испания терма жамоаси учун муҳим футболчи. Умид қиламанки, бундан буёғига ҳам у шу тарзда ўйин намойиш қилади.
- Нолитонинг «Барселона»га ўтиши унинг учун терма жамоа эшикларини очиб берадими?
- Биз футболчиларнинг ҳозирги даражасига қараб баҳо берамиз. Масалан, Нолитонинг «Барселона»га ўтиш ёки ўтмаслиги унинг терма жамоага жалб қилинишига умуман таъсир ўтказмайди. Муҳими, унинг айни пайтда қандай ўйин намойиш қилаётгани. У ўйнаётган клуб эса ҳеч қандай роль ўйнамайди.
- Икер Касильяс-чи? Ушбу дарвозабон ҳозирги ҳолатда сизнинг жамоангиздан ўрин ола билармикан?
- Терма жамоадаги жой ҳеч ким учун кафолатланмаган. Биз футболчиларни 17 майга қадар кузатиб борамиз. Шундан кейингина таркибни эълон қиламиз. Айнан ўшанда мухлислар Еврога ким боришидан хабар топишади. Умид қиламанки, энг яхшиларни танлаб оламиз. Таркибда Касильяс бўладими? Шунга умид қиламан. Аввало, унинг кўрсатаётган ўйинига баҳо берамиз. Даражаси, клуби ва терма жамоаси учун муҳимлиги ва энг асосийси, кўрсатаётган ўйини туфайли термадан жой олади. Икер ўйнашдан тўхтамади ва ҳозирда ёмон ҳаракат қилмаяпти. Яна шуни алоҳида таъкидламоқчиман. Касильяс ҳақида мендан сўраганингиз учун гапиряпман. Буни Икернинг бошқалардан ажраб тургани учун айтмаяпман.
- Ҳужум чизиғидан кўнглингиз тўляптими? Айтайлик, терма жамоага номзодлардан бири - Альваро Моратанинг ўйинлари сизга маъ-қул келяптими?
- У «Юве»нинг деярли барча учрашувларида иштирок этяпти. Аммо майдонда кўп вақт бўлмаяпти. Яъни, ўтган мавсумдагидан озроқ ўйнамоқда. Бу унга таъсир ўтказиши мумкинми? Албатта. Ҳозирда узоқ келажакни ўйламай, кўз остимизга олган футболчиларга эътибор қаратишимиз лозим. Мақсадимиз - июлда ўйнаш.
- Дарвоқе, бу ёқда Виктор Вальдеснинг ҳам ишлари унчалик қовушмаяпти...
- Вальдес ҳозирда термага қайтиш эмас, балки кўпроқ ўйнаш ҳақида ўйлаши керак. Ҳар қандай инсон унинг ўйнашини истайди. Вальдеснинг ҳозирги ҳолати эса, шунчаки омадсизлиги туфайли вужудга келган.
- Хабарингиз бор, Зайниддин Зидан «Реал» бош мураббийлигига тайинланди. Унинг Мадридда юксак натижаларни қўлга киритишига ишонасизми?
- Ҳеч қачон бирор-бир футболчидан қандай мураббий чиқишини аниқ айтиб бўлмайди. Лекин Зиданда яхши тайёргарлик бор, спорт билан яхши таниш, жамоа билан яхши муносабатда ва муаммоларни ҳал қила олади. Мен Мадридда ишлаган даврлар бошқача эди. Ҳозир эса яхши ҳам эмас, ёмон ҳам. Ўшанда бизда пул кўп бўлмаган. Ҳозир чегаралар кенгайди, футболчиларни бутун жаҳон бўйлаб қидиришади. Испания клублари ёш футболчиларни қоидага зид равишда ўз таркибларига қўшиб олишлари мумкин. Аммо ўша футболчиларнинг ривожланишида катта роль ўйнашади. Уларни хориждан таклиф қилишлари муҳим эмас. Вақт ўтган сари улар мослашиб оладилар. Лекин барибир ФИФА қоидаларига амал қилиш керак.
- Ўтган мавсум ФИФПРОнинг рамзий термасида Серхио Бускетснинг номи қайд этилмади. Ушбу футболчи сараланганлар қаторидан жой олишга ҳақлимиди?
- Менимча, бу нохақлик бўлди. Диего Симеоне ҳам ҳурматга лойиқ. Умуман олганда, Серхионинг «Барселона» ва Испания терма жамоаси учун қанчалик муҳим ўйинчи эканлигини барча яхши билади.
Манба: Football.ua,
Ж.БОБОХОНОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
