Яқинда «Амкар» клубининг нишериялик лигионери Фегор Огуденинг рафииқаси ўғирлаб кетилгани ҳақидаги хабарлар жамоатчилик нафрат ва жиддий хавотир билан қарши олганди. Мазкур нохуш ҳодиса барча спортчиларга, жумладан футболчиларга шон-шуҳрат, бойлик ва машҳурликнинг ўзига яраша қалтис жиҳатлари ҳам йўқ емаслигини эслатиб қўйди. Хайриятки, Огуденинг турмуш ўртоғини 6 кундан кейин оилага қайтаришга муваффақ бўлинди. Аммо бу спортчиларнинг хотиржам, эмин-эркин фаолият юритишларига кафолат бўла олмайди. Айниқса, бу каби зўравонликлар тез-тез такрорланаётган ва айрим ҳолларда фожиа билан тугаётгани ҳар қандай кишини хавотирга солади.
1994 йил Ромарионинг отаси
ЖЧ-1994 стартига бир ойдан сал кўпроқ вақт қолганида Бразилия терма жамоаси етакчи этакчи ҳужумчисининг отаси Эдеваир номаълум шахслар томонидан ўғирлаб кетилгани маълум бўлди. Тахминларга кўра, ўшанда жиноятчилар Ромариога катта маблағ эвазига отасини қайтаришни таклиф қилишган. Аммо ҳужумчи хун тўлаш ўрнига «селесао» таркибида мундиалга боришдан бош тортишини билдирган. Оқибатда қилмишлари яхшиликка олиб бормаслигини англаган безорилар гаровга олинган Эдеваирни қўйиб юборишди. Ромарио эса мусобақанинг энг яхши тўпурари сифатида Бразилиянинг шоҳсупага кўтарилишга улкан ҳисса қўшди.
2001 йил. Каладзенинг укаси
Тиббиёт универстетининг тўртинчи курсида таҳсил олаётган Леван Каладзени 2001 йилнинг майида Тбилисида ўғирлаб кетишганди. Ўшанда Каханинг укаси 21 ёшда эди. Шантажчилар футболчидан ярим млн. $ талаб қилишди. Кейин товонни 300 000га туширишди. Вақт ўтган сайин Леваннинг топиш эҳтимоли камайиб борди. Ҳуқуқ-тартибот маҳкамалари фаоллигини ошириш мақсадида Каладзе терма жамоада тўп суришдан бош тортишини эълон қилди. Аммо буч ора ҳам самара бермади. Леван Каладзенинг жасади 2006 йилда топилди. Жиноятга алоқадор шахслар полиция томонидан қўлга олиниб, узоқ муддатли қамоқ жазосига тортилдилар.
2002 йил. Рикельменинг укаси
Жанубий Американинг 2001 йилдаги энг яхши футболчиси унвонига сазовор бўлган Хуан-Рамон Рикельмедан укаси Кристиан учун талончилар 300 000$ талаб қилишди. Маълум муддатдан кейин тўлов миқдори 2 бараварга камайтирилди. Эндигина «Барселона» сафига қўшилган аргентиналик ярим ҳимоячи жиноятчилар талабини қондириб, Кристиан ҳаётини сақлаб қолди.
2002 йил. Ака-ука Милитоларнинг отаси
Учинчи минг йиллик бошларида Аргентина чинакам «футнеппинг» тажовузи остида қолганди. Футболчилар, Таниқли шахсларнинг оила аъзоларини ўғирлаш орқали мўмай пул топиш жиноий бирикмаларнинг асосий машғулоти бўлиб қолганди. Рикельме бошига тушган кўргилик қийинчилик ака-ука Габриэль ва Диего Милитоларда давом этди. Бу сафар жиноятчилар футболчиларнинг отасини қўлга олишганди. Хайриятки, Хлрхе Милито 19 соатдан кейин оила даврасига қайтди. Бунинг учун фарзандлари 100 000$дан воз кечишларига тўғри келди.
2005 йил. Робиньонинг онаси
2004-2007 йиллар оралиғида талончиликлар маркази Аргентинадан қўшни Бразилияга кўчди. Бу мамлакатда ўнлаб футболчиларнинг қариндошлари ўғирлаб кетилди. Жумладан, ўз вақтида «Реал» ва «Милан» клубларида тўп сурган ва «янги Пеле» унвонига сазовор бўлган Робиньо ҳам жабр кўрди. Жиноятчилар футболчининг онасини гаровга олиб, 40 кунга яқин Сан-Паулунинг овлоқ бир ҳудудида тушкунликда сақлашди. Фақат Робиньо улар талаб қилган 81000$ маблағни берганидан кейин муштипар она уйига қайтди. Дарвоқе, жиноий гуруҳ етакчиси 1 йилдан кейин қўлга олиниб, турмага ташланди.
2005 йил. Луис Фабианунинг онаси
2005 йилнинг баҳорида навбат Бразилия терма жамоасининг яна бир ҳужумчиси - Луис Фабиануга келди. Талончилар униинг онасини ўғирлаб кетишди. Орадан 2 ой вақт ўтгач, аёлни чекка бир қишлоқдан топиб олишди. Айрим маълумотларга қараганда, футболчи талаб қилинган маблағни тўлаганидан кейин онасини қўйиб юборишган. Иккинчи тахминга кўра, маҳаллий полиция вакилларининг тезкор ҳаракатлари натижасида аёл оиласига қайтарилган.
2005 йил. Графитенинг онаси
Яна шу йили Таниқли ҳужумчи - «Вольфсбург» вакили Графитенинг онаси ҳам ўғирлаб кетилди. Лекин Германия чемпиони ўз онасини зўравонлар чангалидан соғ-омон халос этиш учун 1 млн. $дан воз кечишига тўғри келди.
2006 йил. Риккардо Оливейранинг синглиси
«Футнеппинг» балоси «Милан» ҳужумчиси Рикардо Оливейранинг оиласини ҳам четлаб ўтмади. Бу сафар жиноятчилар футболчининг синглиси Марияни нишонга олишди. Миш-мишларга қараганда, Мариянинг гиёҳванд ўғли безориларга ёрдамлашган экан. Босқинчилар аёлнинг уйига бостириб кириб, эрини дўппослашган ва Марияни олиб кетишган. Шундан кейин 6 ой давом этган музокаралар ва пул ўтказишлар эвазига асира қутқариб олинди.
2009 йил. Паласиоснинг укаси
«Тоттенхэм» ярим ҳимоячиси Уилсон Паласиосдан жиноятчилар унинг укаси Эдвин учун катта маблағ талаб қилишганди. Футболчи уларга 500 000$ тўлаган бўлсада, безорилар укасини қўйиб юбормадилар. Афсуски, маълум муддатдан кейин Гондурас полицияси Эдвиннинг жонсиз жасадини топишга муваффақ бўлишди.
2011 йил. Оби Микелнинг отаси
«Челси»нинг Нигериялик ярим ҳимоячиси Жон-Оби Микель ҳам бир неча такликали кунларини бошидан кечиришга мажбур бўлди. Учрашувлардан бирининг бошланиш арафасида «кўклар»нинг ўша пайтдаги бош мураббийи Андре-Виллаш Боаш ўз шогирдига унинг отаси ўғирлаб кетилгани ҳақидаги нохуш хабарни етказди. Бироқ Жон ўша оқшом майдонга тушди. Орадан 5 кун ўтгач, шантажчилар Микелдан 130 000$ талаб қилишди. Аммо футболчи 1 цент ҳам бермади - жиноий гуруҳ полиция томонидан қўлга олиниб, Жоннинг отаси озод этилди.
2012 йил. Халкнинг синглиси
Бразилиялик тўпурарнинг синглиси билан боғлиқ жиноят ҳам катта шов-шувга сабаб бўлди. 22 ёшли Анжелика Виейра де Соуза Кампина Гранди шаҳарчасидаги ресторандан чиққан пайтида нотаниш машинага мажбуран ўтказилиб олиб кетилди. Лекин полиция 1 суткадан кейин кўчада унга дуч келди ва уйига элтиб қўйди. Расмий маълумотларга кўра, Анжелика «оиланинг дўсти», шу билан биргаликда қизнинг иш берувчиси бўлган Элио Перейра томонидан ўғирланган. Перейра шу йўл билан Халкнинг оиласидан 115 000$ евро талаб қилмоқчи бўлган, лекин нияти амалга ошмай қолди.
2012 йил. Эменикенинг ота-онаси
2012 йилнинг июнида жиноятчилар «Спартак»нинг африкалик лигионери Эмануэьл Эменикенинг ота-онасини гаровга олишга уриниб кўришди. Хайриятки, ҳужумчининг укаси Эбука қўни-қўшниларни босқинчилар ҳужумидан хабардор қилиб, уларни оёққа турғазади. Натижа буни кутмаган талончилар саросимага тушиб, жуфтакни ростлаб қолишади.
2013 йил. Ламеланинг укаси
«Тоттенхэм»нинг аргентиналик ярим ҳимоячиси Эрик Ламеланинг укаси Аксел Буэнос-Айресде талончилар қўлига тушиб қолди. Қуролланган безорилар 18 ёшли йигитча учун атиги 500 фунт талаб қилишади. Афтидан, қароқчилар «ўлжа» Таниқли футболчининг укаси эканидан бехабар эдилар. Акс ҳолда, кўпроқ маблағ талаб қилишлари шубҳасиз эди.
2014 йил. Тевеснинг отаси
Аргентиналик Таниқли ҳужумчи «Ювентус» сафида тўп суриб юрган пайтда унинг отасини ўғирлаб кетишди. Аслида Морон шаҳридани безорилар қимматбаҳо автомобилни ўғирлаш ниятида эдилар. Аммо улар мошина ичидаги ҳужжатлар орқали унинг машҳур футболчининг отасига тегишли эканини билиб қолишди. Шундан кейин кўпроқ пул ишлаш тараддудига тушишди. Юз берган воқеадан Карлос машғулот пайтида хабардор бўлди ва ўша заҳоти Аргентинага учиб кетди. Маълумотларга кўра, отани уйга қайтариш учун Тевеслар оиласи 4000 евро сарфлаган.
Манба: www.intersport.uz
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
