Ўзбекистон чемпионатининг иккинчи тур учрашувлари ҳам ортда қолди. Биз ушбу турда қайд этилган 14 та ғалабали, ғалабасиз, мағлубиятли ва мағлубиятсиз серияларни аниқладик ва уни сизнинг эътиборингизга ҳавола этамиз.
1. “Пахтакор”нинг ғалабали серияси
Амалдаги чемпион Тошкентнинг “Пахтакор” клуби Олий лигадаги охирги 6 та учрашувни ҳам ғалаба билан якунлади. Нўмон Хасанов шогирдлари ўтган мавсумда “Динамо” (6:0), “Машъал” (2:1), “Насаф” (1:0), “Андижон” (6:0), ушбу мавсумда эса “Андижон” (2:1) ва “Қўқон-1912” (4:0) жамоалари таслим этишди. “Шерлар” охирги марта ўтган мавсумда “Бунёдкор”га ютқазишганди.
2. “Пахтакор”нинг ўз майдонидаги ғалабали серияси
Тошкентликлар “Қўқон-1912”га қарши ўйинда яна бир ёқимли анъаналарини давом эттиришди. Яъни “Шерлар” Олий лига доирасида ўз майдонларида ўтказган кетма-кет 16-учрашувда ғалаба нашидасини суришди. “Пахтакор” ўз майдонида охирги марта 2015 йилнинг 12-март санасида “Олмалиқ” билан ўйинда очко йўқотган.
3. “Пахтакор”дан учинчи серия
“Пахтакор” Олий лигада “Пахтакор” марказий стадионида ўтказган охирги 34 та ўйинда мағлубиятга учрамаган. “Шерлар” Ўзбекистон чемпионатида охирги марта ўз майдонида 2013 йилнинг 17-август санасида Игор Шквирин мураббийлигидаги “Олмалиқ”дан мағлуб бўлишган эди.
4. “Андижон”нинг ғалабасиз серияси
Ўз майдонида “Локомотив”га 1:3 ҳисобида имкониятни бой берган “Андижон” Олий лигадаги ғалабасиз сериялари сонини 5 тага етказди. Андижонликлар ушбу мавсумда “Локомотив” ва “Пахтакор”га, ўтган мавсумда эса “Пахтакор” ва “Бунёдкор”га ютқазиб қўйишган бўлса, “Динамо” билан муроса кўчасини танлаган. Эътиборли жиҳати “Андижон” охирги 5 ўйиннинг 4тасини пойтахт жамоаларига қарши ўтказиб, барчасида мағлуб бўлган.
5. “Бухоро”дан мағлубиятсиз серия
“Бухоро” “Обод”га қарши ўйинда Олий лигадаги ғалабали сериясига якун ясади. Клуб охирги 4 ўйинда “Металлург”, “Нефтчи”, “Сўғдиёна” ва “Олмалиқ” жамоаларини таслим қилган эди. Шундай бўлса ҳам Бухорликлар энди Ўзбекистон чемпионатидаги мағлубиятсиз сериялари сонини 5 тага етказиб олишди.
6. “Бунёдкор”нинг мағлубиятсиз серияси
Тошкентнинг “Бунёдкор” клуби Олий лигадаги мағлубиятсиз сериясини 8 ўйинга етказди. “Қалдирғочлар” ана шу ўйинларда “Сўғдиёна”, “Нефтчи”, “Қўқон-1912”, “Андижон” ва “Пахтакор”ни мағлуб этишган бўлса, “Олмалиқ”, “Насаф” ва “Динамо” билан муроса кўчасини танлашган.
7. “Локомотив”дан ғалабали серия
“Локомотив” жамоаси Олий лига доирасидаги охирги 7 ўйинда фақат ғалаба қозонган. “Темирйўлчилар” ана шу баҳсларда “Бухоро”, “Қизилқум”, “Шўртан”, “Машъал”, “Андижон” ва “Навбаҳор” (2 марта) клубларини таслим этган.
8. “Локомотив”дан мағлубиятсиз серия
Тошкентнинг “Локомотив” жамоаси сафарда “Андижон”ни таслим этган ҳолда Олий лигадаги мағлубиятсиз сериясини 11 ўйинга етказиб олди. “Темирйўлчилар” Ўзбекистон чемпионатида охирги марта 2015 йилнинг 12-сентябр куни “Пахтакор”дан мағлуб бўлишган.
9. “Локомотив”нинг Водий клубларига қарши мағлубиятсиз серияси
“Локомотив” клуби дастлабки икки турни водийда ўтказиб ҳар иккаласида ҳам ғалаба қозонди. Шу тариқа “темирйўлчилар” Водий жамоаларига қарши ўтказган сафардаги охирги 15 ўйинни мағлубиятсиз ўтказишди. “Локомотив” жамоаси ана шу ўйинларда “Андижон (4 ғалаба), “Нефтчи” (3 ғалаба, 1 дуранг), “Навбаҳор” (4 ғалаба, 1 дуранг) ва “Қўқон-1912” (2 дуранг) билан ўйинларда ютқазмади. “Локо” охирги марта 2010 йилининг 31-октябр санасида “Нефтчи” билан ўйинда водийдан очкосиз қайтган.
10. “Металлург”дан мағлубиятсиз серия
Бекободнинг “Металлург” жамоаси Олий лигадаги мағкубиятсиз сериясини 4 тага етказди. “Металлург” “Қизилқум” билан дуранг ўйнаб, “Шўртан”, “Сўғдиёна” ва “Машъал”ни мағлуб этди. Эътиборли жиҳати клубнинг ғалабали серияси 3 тага етди.
11. “Навбаҳор”нинг ғалабасиз серияси
“Навбаҳор” Олий лигада ўтказган охирги 4 та ўйинида ҳам имкониятни бой берди. Наманганликлар “Шўртан” (1:2), “Навбаҳор” икки марта (2:3) ва “Нефтчи” (0:1) билан ўйинларни бой беришди. 1996 йилги Ўзбекистон чемпиони охирги ғалабасини 2015 йилнинг 30-октябр куни “Қизилқум” билан ўйинда қўлга киритган.
12. “Олмалиқ”нинг ғалабасиз серияси
“Олмалиқ” жамоаси ушбу мавсумни жуда ёмон бошлади. Игор Швирин шогирдлари ўтган мавсумни ҳам қўшиб ҳисоблаганда охирги 7 ўйиндан буён ғалаба нималигини билмай келишмоқда. Тошкент вилояти жамоаси охирги марта 2015 йилнинг 16-октябр санасида уч очкони қўлга киритган.
13. “Шўртан”дан мағлубиятли серия
2-турда ўз майдонида “Қизилқум”га ютқазган “Шўртан” Олий лигадаги мағлубиятли сериясини 3 тага етказди. Ғузорликлар Навоий жамоасидан ташқари, “Насаф” ва “Металлург” билан ўйинларни ҳам бой берган. “Шўртан” сўнги бор, ўтган йилнинг 5-ноябрида “Навбаҳор”ни мағлубиятга учратган эди.
14. “Сўғдиёна” дан мағлубиятли серия
“Сўғдиёна” жамоаси Олий лигадаги охирги 3 та ўйинда ҳам имкониятни бой берди. Жиззахликлар бу ўйинларда “Бунёдкор”, “Металлург” ва “Бухоро” томонидан таслим этилган. Клуб охирги бор 2015-йилнинг 5-ноябрида “Қўқон-1912” устидан ғалабага эришган.
Фурқат Юсупов тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
