«Тегирмон навбати билан» эканлиги Англия чемпионатининг жорий мавсумида ўз исботини топмоқда. Анчадан буён «митти» роллар билан кифояланган «Лестер», «Тоттенхэм», «Вест Хэм» ва «Уотфорд» каби жамоалар ҳозирда мусобақа об-ҳавосини белгилашмоқда. Soссer.ru сайти жорий мавсум мусобақаларига ўзгача жило бахш этаётган яшил майдон рицарлари ҳақида ҳикоя қилишни лозим топди.
Жек Батленд («Сток Сити»)
Ҳозиргача 2та мавсумда атиги 6 марта АПЛ жамоаларига қарши майдонга тушган, лекин 3-мавсумда 30та учрашувда иштирок этишга улгурган йигитчанинг Англия терма жамоасидан таклиф олгани бежиз эмас. Шу пайтгача асосий вақтини «сургунлик» («Лидс», «Дерби Каунти»)да ўтказган посбон илк марта элитада тўлиқ мавсумни ўтказмоқда. Албатта, Чех, Де Хеа ва Гомес ҳам ажойиб ўйин кўрсатишмоқда. Аммо Батленднинг ишончли ҳаракатлари мухлисларни хушнуд этмоқда. Ҳа, Беговични «Челси»га сотиб юборган «Сток»да ажойиб дарвозабон вояга етмоқда.
Скотт Данн («Кристалл Пэлас»)
Ўтган мавсум Бельерин кўп ишларга қодирлигини исботлаган, Смоллинг «МЮ» ҳимоя чизиғида етакчи бўлишга уринган, ношуд шериклар орасида қолган Отаменди индивидуал маҳоратини ишга солганди. 29 ёшли Скотт эса чинакам «бургутлар»га хос парвозни намойиш этмоқда. Жамоанинг «Арсенал» ёки «МЮ»га қараганда кўпроқ ҳимояланишга мажбур эканини инобатга олсак, Даннинг аҳамияти янада ортади. Фақат ўз дарвозаси олдида тўп суриш билан чекланиб қолмаяпти - ҳозирча ҳисобига 5та гол ёзиб қўйди. Скоттга ўхшаган тиниб-тинчимас футболчиларга харидор мўл. Миш-мишларга қараганда, бу сермаҳсул ҳимоячини «Челси» скаутлари кўз остиларига олган эмишлар.
Деле Алли («Тоттенхэм»)
Шу пайтгача «МК Донс» сафида тўп сурган 19 ёшли йигитчанинг «Тоттенхэм» асосий таркибида тўп суришини ҳеч ким кутмаганди. Боз устига, «тақачилар» чемпионлик учун кураш олиб бораётган мавсумда. Алли эса нафақат клубдаги, балки Англия терма жамоасидаги дебютини ҳам муваффақиятли ўтказиб, Париж саёҳатига умид қилмоқда.
Одион Игало («Уотфорд»)
АПЛда Жиру ёки Костадан кўра, кўпроқ майдонга тушган. Лекин унинг самарадорлиги ҳам, «Арсенал» ва «Челси»даги касбдошлариникидан юқори. «Уотфорд» қўлга киритаётган ғалабаларда Одионнинг улуши катта. Масалан, «Арсенал»нинг кубок беллашувларидан чиқиб кетишига ҳам у сабабчи бўлди. Албатта, Варди, Кейн ёки Агуэродек маҳорат соҳибларидан ўзиб кета олгани йўқ. Аммо чемпионшипдаги ишончли ўйинларини элитада ҳам давом этираётгани ҳайратланарли. Очиғи, Игало жамоа мухлисларига ёқимли сюрприз тақдим этмоқда.
Эрик Дайер («Тоттенхэм»)
Эҳтимол Деле каби ёш бўлганлиги ёки «Тоттенхэм»нинг жорий мавсумдаги парвози туфайли Дайернинг мақтовини бироз ошириб юбораётгандирмиз. Қолаверса, «тақачилар» сафида ёрқин ўйин кўрсатаётган футболчилар етарли. Бироқ 20 ёшли Эрикнинг таянч ярим ҳимоясидаги масъулиятни ўз зиммасига олиши алоҳида эътирофга лойиқ. Бўйдор, лекин ёшларга хос енгил вазнли Дайер «иккинчи қават»да ҳам самарали ўйнай олади. Алли ва Дайернинг жамоадаги аҳамиятини «Боруссия» Д.га қарши баҳсдан билиб олиш мумкин - Дортмундга Алли ва Дайерсиз ташриф буюрган «Тоттенхэм» «Боруссия»нинг ҳужумларига дош беролмади.
Виржил ван Дейк («Саутгемптон»)
Худди Батленд каби бу футболчидан ҳам ишончли ўйинлар кутилганди. Лекин бунчалик даражада эмас. Ўта бақувват марказий ҳимоячи техника борасида ҳам юксак савия соҳиби. «Авлиёлар»нинг ярим ҳимоячилари ва ҳужумчилари рақиб дарвозасига йўл тополмай қолган паллаларда Виржил ташаббус кўрсатади, ҳимоячи бўла туриб, 3та гол урди. «Иккинчи қават»да самарали ўйнайдиган голландиялик ҳимоячи янги мавсумни номдор жамоада бошласа, ажабланмаймиз. Шунда у ёрқин юлдузга айланиш имконига эга бўлади.
Н~Голо Канте («Лестер»)
Бугунги «Лестер»нинг барча ўйинчилари ушбу рўйхатдан жой олишлари мумкин, Фукс ва Хут ҳам юксак савияда ўйнашмоқда. Аммо «тулкилар»нинг аутсайдердан карвонбошига айланишларида «нозиккина» француз асосий ролни ижро этмоқда. Марказда ҳаракатланадиган Канте рақиблардан тўпни олиб қўйиш, аниқ зарбаларни амалга оширишда юқори кўрсаткичларни қайд этмоқда. Афтидан, Клод Макелелега қиёсланаётган ёш иқтидор соҳиби чемпионат якунида қайсидир гранд таркибига қўшиладиган кўринади. Нима бўлганда ҳам, у тобора юқориланаётган юлдуз.
Жейми Варди («Лестер»)
Савия, тажриба ва маҳорат бобида Серхио Агуэро АПЛнинг энг кучли ҳужумчиси бўлиши мумкин. Лекин ҳозир бутун дунёдаги мухлислар Варди томонида. Тўғри, «Лестер»нинг парвози узоқ давом этмайди, деган фикрлар ҳам йўқ эмас. Бироқ Вардига бунинг аҳамияти йўқ - у ўзининг севимли иши бўлмиш гол уриш билан банд. «Тулкилар» эса ҳамон етакчи. Ҳужумчи ҳеч бўлмаганда Евро-2016 «заявка»сидан жой олиши керак. Акс ҳолда, адолат мезонига путур етади.
Димитри Пайе («Вест Хэм»)
Бу футболчи «болғачилар»нинг асосий ижодкори сифатида донг таратмоқда. Аслида, Пайе Франция чемпионатида ҳам юксак савияни қайд этаётганди. Лондонда эса чинакам эътирофга эришди. Майдоннинг исталган нуқтасида тўғри ечимни топа оладиган стандартлар устаси таркибда бўлмаган ҳолларда Славен Билич жиддий муаммоларга дуч келмоқда. Пайенинг савияси Варди ёки Маҳрезникидан кам эмас. Бунинг устига, Димитри ўта ақлли ва айёр футболчи. «МЮ» дарвозасига урган голи фикримизни тасдиқлайди.
Риёд Маҳрез («Лестер»)
Вардининг муносиб шериги бўлган футболчи ҳозиргача ўз ҳисобига 15та гол ва 11та самарали узатмани ёзиб қўйди. Риёд доимо қандайдир янгиликларни яратиш пайида. Аввалига унинг қобилиятига эътибор қаратишмади, лекин кейинчалик муносиб баҳо бера бошлашди. Юлдузларга бой бўлган АПЛда бунга ажабланмаса ҳам бўлади. Жазоирлик иқтидор соҳиби муҳим учрашувларда тажриба тўплаб, янада ёрқинроқ ўйинларни кўрсатишига шубҳа йўқ.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
