Тулкилар» жамоаси финиш яқинлашган сари АПЛ чемпионлиги ифорини ҳис этаётган бўлса, ажабмас. Охирги дамларда «Лестер»га қизиқиш энг юқори чўққига чиққани ҳам айни ҳақиқат. Демак, бугун камтарин клубни назорат қилаётган шахс билан танишамиз. Вишай Шривадданапрабха ўйинлардан сўнг шахсий вертолётида учиб кетади, у «Лестер» стадионига доимий равишда будда роҳибларини таклиф этади ва Клаудио Раньери шогирдларини ҳар бир муваффақият учун муносиб тақдирлайди.
Англияда жорий мавсум давомида бир қўполроқ латифа тўқилди:
2036 йил.
- Отажон, 2016 йили «Лестер» чемпион бўлганини эслай оласизми? Бу қандай рўй берганди?
- Ҳмм.. Ҳаммаси Найжел Пирсоннинг ўғли ва осиёлик қиз ўртасида юзага келган можаро билан бошланганди...
Хуллас, латифанинг кулгули томони йўқ. Инглизлар шу орқали ёзда кўтарилган жанжал ва унинг ижобий таъсирига шаъма қилишган. Клуб обрўсини мухлислар меҳрини қозонган ва «тулкилар»ни катта жасорат билан қуйи лигага тушиб кетишдан сақлаб қолган мураббийникидан устун қўйган шахс - бу Вишай Шривадданапрабха. У Найжел Пирсонни истеъфога чиқаргач, бу қарори кўпчилик томонидан яхши қабул қилинмаганди. Шунинг баробарида клуб соҳибини қўллаганлар ҳам топилганди? Хўш, Жейми Варди, Риёд Маҳрез ва Клаудио Раньери билан бирга янги тарих ёзаётган Шривадданапрабха ким? 58 ёшли бизнесмен, таиландлик. Миллий duty-free дўконлар тармоғи соҳиби. King Power, деб аталувчи тармоқ Бангкок аэропортларида ўзига хос мавқега эга. Вишай АҚШ ва Тайван (Хитой Тайпейи)да таҳсил олган. Оилали, 4 нафар фарзанди бор. Айни пайт Таиланднинг энг бой 10 нафар фуқаросидан бири. Forbes Вишай Шривадданапрабханинг бойлигини 3,2 миллиард долларга баҳолаган.
Аслида Вишайнинг фамилияси Раксриаксорн эди. Фақат, 2013 йилнинг февралида бизнесмен оиласи Таиланд қиролидан совға тариқасида ёзилиши ва ўқилиши анча мураккаб янги фамилия олди - Шривадданапрабха. Маҳаллий анъанага кўра, Таиланд ҳукмдори улкан ютуқларга эришган фуқароларни фахрий фамилия билан тақдирлайди. «Шривадданапрабха» ибораси «Узоқ муддатли муваффақият йўлини ўзлаштирган оила» маъносига эга.
Умуман, таиландлик тадбиркор «Лестер»ни 2010 йили Милан Мандаричдан сотиб олганди. Аниқроғи, келишув King Power клубнинг бош ҳомийсига айланганидан бир неча ҳафта ўтгач, расмийлаштирилган. Вишай аввалига Лондон клубларидан бирини харид қилишни мўлжаллаган. Бироқ ўғли - Айаваттнинг айтишича, «Лестер» фойдасига қарор чиқариши учун стадионда 30 дақиқа ўтириши кифоя қилган (Лондондан жамоа сотиб олиш ҳаракати ҳақидаги хабарни эса, ўғлига «сюрприз» улашиш мақсадида сир тутган экан). Савдо амалга ошганидан ярим йил ўтиб, Вишай «Лестер»да раис лавозимини эгаллади. Шунда ҳам келишув шартлари тўлиқ ошкор этилмади. Шривадданапрабха оиласи дастлабки даврда чемпионшип миқёсида олганда, ўта катта харажатлар билан кўзга ташланди. Маблағ асосан Жермейн Бекфорд каби персонажларни таклиф этишга йўналтирилди, шунингдек, бизнесмен тажрибали Свен-Ёран Эрикссонни ишга чорлаб, унга тўлиқ ишонч билдирди. Лекин кейинчалик шов-шувли харидлар кети узилди, яъни Шривадданапрабха бироз тин олди ва жамоа ҳозирги ҳолатга келди.
Вишай Шривадданапрабханинг энг асосий вазифаси ва мақсади - «Лестер» брендини Осиё бозорида ҳаракатга тушириш. Биласиз, айни пайт «сариқ қитъа»да «Манчестер Юнайтед» каби грандларнинг мавқеси баланд. Энди «Лестер» ҳам Осиё бозорида ўз ўрнини топмоқчи. Ҳозирда клуб атрибутлари аэропортлар атрофида ва умуман, Шривадданапрабхага тегишли улкан империя дўконларида сотилмоқда. «Тулкилар» чемпионшипда иштирок этишган пайт ҳам хўжайиннинг ташаббуси билан мавсумолди йиғинларини ўтказиш учун мунтазам Осиё бўйлаб турнега чиқишарди. Моҳиятан қарасак, футбол «Лестер» президентининг биринчи рақамли қизиқиши ҳам эмас. Чунончи, Вишай Шривадданапрабха от полосидан ақлини йўқотади, гўё. Оила бошлиғи - отлар гўзаллиги ва қувватининг азалий ихлосманди. У аввалига ўзини от спортида ҳам синаб кўрган - кўргазмали чиқиш ва конкур йўналишида. Лекин бу машғулотлардан тезда зерикди, чоғи. Вишай полога ишқибозликни Англияда «ёқтирди» ва Таиландга қайтиши ҳамоно махсус ер ҳудудини сотиб олиб, Бангкок поло-клубига асос солди. Бироқ шу билан кўнгли жойига тушгани йўқ. Бу спортга муҳаббати шунчалик кучлилик қилдики, кўп ўтмай, Таиланд от полоси ассоциациясини тузди ва у 2004 йили расман халқаро мақомини олди. Асрлар алманишуви вақти катта Шривадданапрабха Лондондаги обрўли Ham Polo Club клубини бошқарди. Хусусан, таиландлик тадбиркор ҳомийлик қилувчи King Power Foxes жамоаси ўтган йили Англияда ташкил этилган бир қатор турнирлар ғолибига айланди. Вишай бу ишга икки нафар ўғлини ҳам жалб этган. Айтганча, от полосидаги жамоа аъзолари худди «Лестер» каби кўк рангли либослардан фойдаланишади.
Вишай Шривадданапрабха стадиондан чинакам голливудча услубда кетишга жазм эта олади. Яъни майдонга чиқиб, тўғри вертолётга ўтиради ва... «Лестер»нинг «Челси»га қарши кечган охирги 2та уй учрашувида худди шундай бўлди. Ҳар икки сафар стадион сухандони вертолётнинг қўниши учун майдонни бўшатиб қўйишни илтимос қилганида, меҳмон жамоа футболчилари ҳайратдан донг қотишди. Чунки улар ўйиндан сўнг майдонни тарк этишга унча шошилмагандилар. Баҳорда Хуан Куадрадо бу ҳолатни таърифлашга сўз тополмай қийналганди, декабрда эса «Челси»нинг ягона голини ўз номига ёзиб қўйган Лоик Реми ҳаттоки, вертолёт кабинасига яқинлашиб, учувчи билан бир-икки оғиз гаплашди ҳам. Дарвоқе, улкан «учиш аппарати» дум қисмига «Лестер» рамзи туширилган. Шунинг баробарида кўпчилик таиландлик миллиардерни ўта камтар, уятчан ва художўй инсон сифатида таърифлайди. Дейлик, Вишай Шривадданапрабха доимий тарзда будда роҳибларини стадионга таклиф қилади. Унинг ташаббуси билан роҳиблар «Кинг Пауэр Стэдиум»га чамаси 10 марта ташриф буюришди. Улардан бири - Фра Проммангкалачан (Бангкокдаги ибодатхона вакили) яқинда футболчиларга омад келтираётган тумор ҳақида қизиқарли гапларни айтди ва қўшиб қўйди: «Бизни диний қарашлар ажратиб турган бўлсада, яхши дўстлар каби ўзаро жуда яқинмиз».
Шривадданапрабха ва фанатлар ўртасидаги муносабатлар ҳам жойида. Тўғри, «Лестер» мухлислари вақтида янги соҳибга хавотир билан қарашганди. Зеро, улар таиландлик бошқа бир бизнесмен - Таксин Чиннаватнинг «Манчестер Сити»даги омадсизлигини унутишмаганди. Лекин бундай хавотирлар ўтмишда қолди. Ҳарқалай, «тулкилар» фатанлари ҳеч қачон ўзларини бугунгидек бахтиёр сезишмаганди. 19-тур доирасидаги учрашувдан сўнг ҳар бир мухлис президент ҳисобидан қўлига қадаҳ кўтарди. Вишай 2015 йил давомидаги таърифланмас қўллаб-қувватлаш ишларига жавобан шу тариқа миннатдорчилик билдирди.
Вишай Шривадданапрабха январь ойи охирида Лестер юридик фанлар университетининг фахрий доктори мақомини олди. Илм даргоҳи вакили бу борада шундай деди: «Шривадданапрабханинг бизнес, спорт ва ижтимоий соҳалар ривожига қўшаётган ҳиссаси бизнинг битирувчилар интилаётган идеалга мувофиқ келади».
«Лестер»нинг жорий мавсум якунида 13-ўрин ёки ундан пастроққа тушмаслиги аниқ бўлиб улгурди. Чемпионат стартидан олдин футболчилар ва раҳбарият вакиллари 12-ўрин ёки ундан юқорироқ поғонани банд этиш бўйича келишиб олишганди. Бошқача айтганда, шундай натижа билан жамоанинг 6,5 миллион фунт миқдорида бонусга эга бўлишини таъминлашни мақсад қилишганди. Мана, мажбурият 10 чандон ошириб бажариляпти. Агар Клаудио Раньери жамоаси қолган 7та тур давомида пешқадамлик мавқеини сақлаб қолиш уддасидан чиқса, ҳаммаси, хусусан, мукофот пули салмоғи ҳам аъло кўриниш олади. Шундай тақдирда Вишай Шривадданапрабха футболчилар учун Лас-Вегасга махсус саёҳат уюштириб, барча харажатни кўтаришга ваъда берган. Айтганча, клуб вакиллари йилнинг энг яхши тантанали кечасига таклиф олиб бўлишган.
Манба: Sports.ru,
И. РАҲИМОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
