"Локомотив" ва "Нефтчи" жамоалари ўртасидаги учрашувдан кейин матбуот анжумани ташкил этилди. Унинг иккинчи қисмида мезбонлар мураббийи Андрей Микляев иштирок этди.
— Ҳисобдан қониқиш ҳосил қилдим. Ҳужумкор ўйин кўрсатиб, голлар урдик. Бугун ҳимоядаги ҳаракатларимиз менга ёқмади, гарчи гол ўтказиб юбормаган бўлсак-да. Кўплаб хатоларга йўл қўйдик. Балки тезкор гол уриб олганимиз учун футболчиларимиз хотиржамликка берилишгандир. Олдимизда Чемпионлар лигаси доирасида "Сепоҳон"га қарши ўйин кутиб турибди. Унда ҳимоядаги бундай хатолар кечирилмайди. Шу боис анча эҳтиёткорлик билан ўйнаш талаб этилади.
— Бугунги ўйинга тайёргарлик жараёнида "Сепоҳон"га қарши ўйин услубини синовдан ўтказиб олиш режалаштирилганмиди?
— Ҳа, буни режалаштиргандик, аммо баъзи сабабларга кўра буни тўлиқ амалга ошира олмадик. Эрондан қайтиб келган заҳотимиз кўп футболчиларимиз терма жамоа йиғинига йўл олишди, иккита ўйинда иштирок этишди, деярли дам олишмади. Ислом Тўхтахўжаев эса жароҳат олди. Шу боис унга бугун дам беришга қарор қилдик. Шунингдек, Яничичнинг жароҳатдан фориғ бўлиши қийин бўляпти. Шулардан келиб чиқиб тактик схемада ўзгаришлар қилдик. Умуман олганда, бугунги ўйинга нисбатан ОЧЛ баҳси тайёргарлик сифатида қарадик.
— Жамоанинг қанотлари яхши ўйнади. Жумладан, Зотеев ва Мирзаев, Бикмаев ва Мустафоев ўрин алмашиб ҳаракат қилишди. Аммо, назаримда, Бикмаев ва Мирзаев ҳимоявий ўйинда яхши иштирок этишмади.
— Ҳа, тўғри таъкидладингиз. Ҳа, ҳар бир футболчи нафақат ҳужумда, балки ҳимояда ҳам ўйнаши керак. Ўз вақтида Жасур Ҳасанов нима учун майдонга тушмаяпти деб сўрагандингиз. Биласизми, замонавий футбол ҳар бир футболчи ҳимояда ҳам ўйнай олиши талаб этилади. Миллий чемпионат ўйинлари бошқа, халқаро учрашувлар бошқа. Халқаро ўйинларда футболчи ҳам жисмоний, ҳам руҳий томонлама ўйинга тайёр бўлиши, ҳимояда ҳам, ҳужумда ҳам яхши ўйнай олиши лозим. Бундай футболчиларни топиш осон эмас. Уларни тарбиялаш керак.
Матнда хатолик топсангиз, ўша хатони белгилаб, бизга жўнатинг (Ctrl + Enter).