Олий лига баҳслари ўзининг қизғин палласига кириб боргани сайин, футболчилар ўз ўйинларини аста-секин кучайтиришмоқда. Натижада, кескин ва муросасиз баҳслар сони ортмоқда. 8-тур қаҳрамонларидан иборат рамзий терма жамоани тузар эканмиз, бу рўйхатга илк бор «Шўртан» вакилини ҳам киритдик.
Дарвозабон:
Суҳроб Султонов («Металлург»)
Бухорода нурсиз, аммо жанговар дуранг қайд этилди. Шу куни меҳмонлар посбони Суҳроб Султоновни ранжитиш «Бухоро»нинг ҳеч бир футболчисига насиб этмади. «Металлург» дарвозабони мезбонларнинг ҳар қандай зарбасини маҳорат билан қайтариб, якунда жамоасининг кўҳна шаҳардан очко олиб қайтишига замин ҳозирлади.
Ҳимоячилар:
Даврон Ҳошимов («Пахтакор»)
«Шерлар» ўз майдонларида «Навбаҳор»га ҳеч қандай имконият қолдиришмади. Бунда, албатта, Даврон Ҳошимовнинг ҳам ҳиссаси катта. Тўп учун курашда ўзини ва рақибларини асло аямаган «Пахтакор» ҳимоячиси якунда жамоаси билан ғалабани тантана қилди.
Мақсуд Каримов («Насаф»)
«Аждарлар» иштирокидаги ўйинлар қайдномасининг «гол муаллифлари» бўлимига «ташриф буюриш» Мақсуд Каримов учун одат тусини олди. Тажрибали ҳимоячи мудофаа чизиғидаги вазифаси билан чекланиб қолмай, тўпурарлик салоҳиятини ҳам намойиш этмоқда.
Азамат Исроилов («Андижон»)
Бу футболчи ҳам 8-турда ўзининг нималарга қодирлигини кўрсатиб қўйди. «Андижон»-«Машъал» учрашувида фаоллиги билан ажралиб турган Азамат Исроилов мураббийлар ишончини оқлади.
Ярим ҳимоячилар:
Сервер Жепаров («Локомотив»)
Сўнгги пайтларда тур рамзий терма жамоасини тузиш чоғида Жепаровнинг номидан тез-тез фойдаланилмоқда. Ҳа, ўзбек футболи юлдузларидан бири ҳали яна узоқ вақт порлайдиган кўринади. Бу ҳолат мухлисларни фақат қувонтиради, ҳар ҳолда, у ҳамон миллий термамиз етакчиларидан бири-да.
Арслонмурод Омонов («Олмалиқ»)
Туркманистонлик легионер «Нефтчи»га қарши кечган баҳсда ажойиб ўйнади. Фарғона жамоасининг ожиз нуқталарини ўз вақтида топа олган Омонов гарчи ўзи тўп киритмаган бўлса-да, шерикларини голли узатмалар билан таъминлади ва ҳақли равишда учрашувнинг энг яхши футболчиларидан бири сифатида тан олинди.
Ислом Рашидхонов («Насаф»)
Ўтган турда Рўзиқул Бердиевнинг эътирофига сазовор бўлган футболчи, мақтовлардан илҳомланган чоғи, «Қизилқум» билан ўйинда ажойиб ҳаракат қилди. Рашидхонов томонидан урилган тезкор гол «Насаф»нинг муваффақиятига дебоча ясади, десак муболаға бўлмас.
Шавкат Саломов («Бухоро»)
Бухороликлар «Металлург» қаршилигини енга олишмади, аниқроғи, бекободликлар дарвозасига йўл топа билишмади. Шавкат Саломов шу куни рақиб жарима майдончасида фаоллик кўрсатиб, гол уришга ҳарчанд уринмасин, бунинг уддасидан чиқолмади. Аммо унинг хатти-ҳаракатлари мезбонлар сафидаги энг яхши ўйинчи номига лойиқ кўрилиши учун етарли бўлди.
Ҳужумчилар:
Шаҳзод Нурматов («Бунёдкор»)
«Қалдирғочлар»нинг сафардан муҳим уч очко билан қайтишларига замин яратган футболчи. Айнан Нурматов захирадан ўйинга қўшилгач, «Бунёдкор» футболчилари иккита гол уришди. Дастлаб шеригини аниқ «пас» билан таъминлаган Шаҳзод кейинчалик ўз номини таблога ёздириб қўйди.
Игорь Таран («Шўртан»)
8-турда қайд этилган «хет-трик» муаллифи. «Сўғдиёна»га қарши кечган баҳс Тараннинг ёдида ҳали узоқ вақт сақланиб қолса, ажабмас. «Шўртан»нинг дастлабки ғалабаси айнан шу футболчининг саъй-ҳаракатлари эвазига қўлга киритилди, десак ҳеч ким қарши чиқмаса керак.
Игорь Сергеев («Пахтакор»)
Миллий термамиз ҳужумчиси тўпурарлар пойгасидаги рақобатчиларини олдинга қўйиб юбормоқчи эмас. «Навбаҳор»га қарши кечган баҳсда Сергеев «дубль» қайд этди, аксарият вазиятларда ҳақиқий етакчиларга хос тарзда ҳаракат қилди. Натижада, мазкур баҳсда «Пахтакор» сафидаги энг яхши футболчи сифатида эътироф этилди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Австралия
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
