"Интер Майами"нинг МЛСдаги ғалабасиз серияси 5 та ўйинга етди.
Жамоа сафарда "Коламбус"га 1:2 ҳисобида мағлуб бўлди. Лионель Месси жарима зарбасидан гол урганига қарамай, флоридаликлар очко олишга муваффақ бўла олмади.
Бунга қадар "Интер Майами" кетма-кет 4 та учрашувда дуранг қайд этган эди.
Жамоа 27 та ўйиндан 46 очко тўплаб, Шарқий конференция турнир жадвалида 3-ўринни эгаллаб турибди. Сўнгги 10 та учрашувда "Интер Майами" атиги бир марта ғалаба қозонган.
Ушбу ўйинда клуб дурангли сериясини 5 та баҳсга етказиши мумкин эди, аммо иккинчи бўлимга қўшиб берилган 8-дақиқада ҳал қилувчи голни ўтказиб юборди.
"Коламбус"нинг испаниялик ярим ҳимоячиси Браис Мендес зарба берди. "Интер Майами" дарвозабони Рокко Риос тўпни қайтарди, аммо тўпни биринчи бўлиб етиб келган сенегаллик Жамаль Тиаре дарвозага жойлаб қўйди.
"Интер Майами" футболчилари эҳтимолий офсайдга ишора қилиб, ҳакамга фаол эътироз билдиришди. VAR орқали вазият кўриб чиқилганидан сўнг бош ҳакам Виктор Ривас голни ҳисобга олди.
Ҳакамнинг қарори "Интер Майами" мураббийлар штабида кескин норозиликка сабаб бўлди. Бош мураббий Кили Гонсалес ҳакам билан тортишгани учун сариқ карточка олди.
Шу пайтга келиб "Интер Майами" майдонда 10 киши бўлиб қолган эди. Ярим ҳимоячи Сантьяго Моралес қўшиб берилган вақтда икки марта сариқ карточка олиб, майдондан четлатилган эди.
Матнда хатолик топсангиз, ўша хатони белгилаб, бизга жўнатинг (Ctrl + Enter).