Миттивойлар ва альбинослар клублари ҳақида эшитганмисиз? Эҳтимол, Ватикан термаси борлигини ҳам билардирсиз? Мабодо, булардан ҳамон бехабар бўлсангиз, қуйидаги мақолани ўқишни тавсия этамиз. Бугун жаҳонда фаолият юритаётган ўзига хос ҳаваскорлар жамоалари тўғрисида сўз юритмоқчимиз.
«Гигантес ду Норти»
Митти одам(карлик)лар футболи - янгилик эмас. Англияда паст бўйли ўйинчилар ўртасида чемпионат ҳам ўтказилади: мини-футбол кўринишидаги турнирда бир жамоада 7 нафар футболчи тўп суради. Ҳаттоки, 2005 ва 2009 йилларда мазкур тоифа бўйича жаҳон чемпионати ҳам ташкил этилган. Бразилияликлар спортнинг бу турига ўзига хос янгилик киритишгач, маҳаллий биринчиликда «Гигантес ду Норти» (португалчадан таржима қилганда «Шаҳарлик гигантлар» маъносини билдиради) деб номланувчи жамоа қатнаша бошлади. Клубга асос солишдан мақсад - туғма нуқсонлар камситиш ва жирканишга сабаб бўлмаслигини исботлашдан иборат эди. Дастлаб «гигантлар»ни кўпчилик жиддий қабул қилмади, аммо ҳозирга келиб уларни ҳеч ким мазах қилмай қўйган. 28 ёшли Каземиро Рибейро жамоа юлдузи саналади. Бўйи 139 сантиметр бўлган ушбу футболчига ўйин услубига мос равишда «Вагнер Лав» тахаллуси берилган.
«Пойтахт полицияси»
Англиянинг Ист-Молиси графлигидаги шаҳар - Суррей биринчилигида «Пойтахт полицияси» деб номланувчи жамоа қатнашади. Мазкур клубда кимлар тўп суришини англаш қийин эмас - фақат ҳуқуқ-тартибот вакиллари. Бош мураббийлик вазифасини маҳаллий террорчиликка қарши бўлинма раҳбари Жимми Купер бажаради. «Ўйинлар пайти бизни камдан-кам ҳолларда қўллаб-қувватлашади, - дейди у. - Трибуналардан турли нохуш ҳайқириқлар эшитилади, ўша томонга қарашимиз ҳамоно мухлислар жим бўлиб қолишади. Умуман, учрашув давомида қандайдир тартибсизлик содир этилса, қонунбузар билан ўзимиз гаплашиб қўямиз».
«Коа Боско»
2010 йили Италиянинг Розарно шаҳрида африкалик икки кишининг ўлдирилиши мамлакатда тартибсизликларни келтириб чиқарди. Шунда маҳаллий руҳоний Роберто Медури мураккаб вазиятдан чиқиб кетиш чорасини топди: у қора қитъадан ташриф буюрган мигрантлардан тузилган «Коа Боско» жамоасига асос солди. Улар италиялик аҳолидан тузилган терма билан ўртоқлик учрашуви ўтказишди ва шу тариқа, ихтилофга барҳам берилди. Ҳозирда «Коа Боско» Италиянинг еттинчи дивизионида иштирок этмоқда. Роберто Медури эса спорт ҳар қандай низоларни бартараф этишга қодир соҳа эканлигини алоҳида таъкидлади.
«Альбинос Юнайтед»
Танзанияда истиқомат қилувчи альбинослардан тузилган жамоа - «Альбинос Юнайтед» турли хурофотлар ва ирқчиликка қарши футбол билан жавоб қайтаришни маъқул билади. Зеро, улар ўзлари яшаётган мамлакатда тез-тез тажовузларга гирифтор бўлишади. «Бутун умрим шу билан ўтди, - дейди клубнинг 22 ёшли ярим ҳимоячиси Ёсин. - Маҳаллий фуқароларнинг бизни кўргани кўзлари йўқ, доимо калака қилишади. Мағлубиятга учрасак, «Ғалаба қозона олмасликлари тайин эди, ахир улар одам эмас-ку», дейишарди. Аммо зафар қучсак, кўзлари очилиб, аслида нотўғри фикр юритишгани, барча жабҳада ҳеч кимдан қолишмаслигимизни тушуниб етардилар. Айнан шундай ҳолатлар учун ҳам футбол ўйнаймиз». Танзания ҳукумати жамоани қўллаб-қувватлаш мақсадида ҳар ой маблағ ажратади. Яқинда «Альбинос Юнайтед» мамлакат учинчи дивизионида иштирок этишга рухсат олди.
«Авлиё Жон Диф»
Испанияда ҳар йили кар-соқовлар ўртасида чемпионат ўтказиб келинади. Сўнгги учта турнирда Англиянинг «Авлиё Жон Диф» клуби ғалаба қозонди. Гарчи футболчиларда туғма нуқсон бўлсада, бир-бирларини тушуниш ва ажойиб ҳамжиҳатликни намойиш этишади. «Оддий футболчилар билан таққослаганда, шогирдларимга нисбатан қийинроқ, - дейди бош мураббий Мэтью Бэнк. - Карлар майдонда ўзаро суҳбатлашиш имкониятидан мосуволар, шунга қарамай, ҳеч қачон ҳакам билан тортишишмайди. Умуман, ҳар бир ўйинимиз дўстона ва илиқ тарзда кечади».
Ватикан термаси
Жаҳон миқёсида тан олинган давлатлардан бири - Ватиканнинг футбол бўйича миллий жамоаси ФИФА аъзоси саналмайди. Мамлакат термаси швейцариялик гвардиячилар, музейчилар ва албатта, руҳонийлардан ташкил топган. Улар ўз тарихларида тўрт марта халқаро ўртоқлик учрашуви ўтказишган бўлса, ҳар гал рақиб сифатида Монакони танлашган. Италиялик журналистларнинг таъкидлашларича, собиқ понтифик Иоанн Павел II ўсмирлигида ажойиб дарвозабон бўлган, кейинчалик Генуя архиепископлигига тайинланганидан кейин ТВ орқали ўйинларни шарҳлаган. «Келажакда Ватикан термаси ҳам юксак даражада футбол ўйнаб, «Рома» ва «Интер»дан кам эмаслигини исботлайди», - дея ўз фикрлари билан ўртоқлашди Ватикан давлат котиби, кардинал Тарчизио Бертоне.
«Санта Клаус»
Ҳа, Финляндия учинчи дивизионида худди шундай ном билан аталувчи жамоа бор. Унда тўп сурувчи футболчилар танаффуслар пайтида маҳаллий болакайларнинг Санта Клаусга ёзган мактубларини ўқиб, уларда ёзилган истакларни рўёбга чиқаришга интилишади. Клубда, ҳаттоки, хайрияга йўналтирилган махсус харажатлар бўлими мавжуд.
«Эббсфлит Юнайтед»
1946 йили ташкил топган клуб 2007 йилгача «Грейвзенд ва Нортвлит» деб аталган. Кейинчалик жамоа ишқибозлар тасарруфига ўтгач, «Эббсфлит Юнайтед» номи остида фаолият юритган. Хўжайин-мухлислар интернет-сўров орқали ўйинчилар трансфери, навбатдаги ўйинда майдонга тушадиган таркиб, бюджет ва чипталар нархини белгилашган. Аммо бу каби тизим ўзини оқламади. Орадан беш йил ўтиб, «Эббсфлит» инқироз кўчасига кириб қолди. Жамоани қувайтлик ишбилармонлар қутқариб қолишди: улар қарзлар тўловини ўз зиммаларига олиб, клуб ривожи йўлида инвестиция киритишга ваъда бердилар. Натижада, жамоанинг уй стадиони - «Стоунбридж Роуд» реконструкция қилинди, кўплаб истеъдодли футболчилар харид қилинди, аммо Миллий конференцияга қайтиш «Эббсфлит»га ҳозирча насиб этмаяпти.
Ў.УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
