«Арсенал» сафида Англия чемпионлигини нишонлаган, 2000 йилги Европанинг тенгсиз термаси таркибидан ўрин эгаллаган Эмманюэль Пети футболнинг кўп нарсага қодир эканини таъкидлади. Унинг фикрича, Франциянинг ўз уйида 1998 йили жаҳон кубогини қўлга киритиши бунга яққол мисол бўла олади. Собиқ футболчи The Telegraph нашрига интервью бериш чоғида шу ва бошқа қизиқарли маълумотлар билан ўртоқлашди.
- Жаҳон чемпионлигини нишонлаш чоғида нимани ҳис қилганимни тушунтириб бериш учун луғатдан сўз топиш қийин, - дейди у. - Бутун дунёдагилар диққат марказида бўларкансан, ҳақиқатан ҳаёт лаззатидан баҳра оласан. Жиддий айтяпман. Доимо қандайдир ғайритабиий нарсалар ортидан қувамиз, бундай муваффақиятга эришганда эса, гап топишга қийналамиз.
- Бутун Франция орзусини рўёбга чиқариш янада ёқимлироқ бўлса керак?
- Албатта. Биз мамлакатимизнинг ҳар бир ҳудуди билан боғлиқликни ҳис қилдик - бу ажо-йиб эди. Бир неча кун мобайнида барча французларни бир мақсад йўлида бирлаштира олганимиздан фахрландик. Бундай паллаларда одамлар муаммоларини унутишади. Халқинг орзусини рўёбга чиқардингми, демак ниятингга эришганинг шу.
- Нима деб ўйлайсиз, Евро-2016 ҳам французларга қайсидир маънода кўмакдош бўлиши мумкинми?
- Орадан 18 йил ўтди, кўп нарса ўзгарди. Франция учун осон ўтмаётган даврда бу турнир айни муддаога айланиши табиий. Мамлакатимиз ҳар жабҳада қийинчиликни бошдан кечирмоқда - иқтисодий ва ижтимоий ҳолат шулар жумласидан. Кимлардир ҳозир Еврони қабул қилиш учун маъқул пайт эмас, деб ҳисоблашади. Аммо ушбу мусобақа халқимизни бирлаштириб, қалбларга оз бўлсада қувон улашиши, мушкулотларни унутишда ёрдам бериши мумкин. Тўғри, футбол ҳамма муаммоларни енга олмас, аммо бироз енгил тин олишга имкон яратади.
- Сиз ўйнаган даврдан кейин Франция термасида қандай ўзгаришлар рўй берди?
- Миллий жамоамизнинг ривожланиш йўли мени тўлиқ қаноатлантирмоқда, айниқса, ўйинчиларнинг майдонда ўзларини тутишлари таҳсинга сазовор. Жанубий Африка Республикасидаги турнирдан сўнг (футболчилар бош мураббий Раймон Доменек билан муросага келолмагандилар) узоқ йўлни босиб ўтдик. Ўшанда кўпчилик ҳайрон бўлганди. Франция термаси жиддий можарога йўлиққанди.
- Ҳозир муаммо бартараф этилган, деб ўйлайсизми?
- Орадан олти йил ўтди ва термадаги ҳолат мутлақо ўзгарди. Тўғри, айрим футболчилар миллий жамоа либосини кийиш нимани англатишини ҳамон тушунмайдилар, аммо ўйинчиларимиздаги жанговар руҳ шундоқ сезилиб турибди, ҳозирда ҳақиқий дўстона жамоа ташкил топган.
- Бугунги таркибдаги футболчилардан кимни алоҳида ажратиб кўрсатасиз?
- Поль Погба - ҳақиқий хазинанинг ўзгинаси. Менимча, у миллий жамоада бунданда ёрқинроқ ўйин кўрсатишга қодир. Поль ўтган йилнинг сентябридан буён Франция термаси сафида гол урмаяпти. Ҳозирча Евро-2016да ёмон ўйнамаяпти. Фақат рақиб жарима майдонига кўпроқ борса, яхши бўларди. Сўнгги икки йил мобайнида Погбанинг ўйинида пасайиш кузатилгандек туюлди менга. Эҳтимол, бу асосан ўртоқлик ўйинларида майдонга тушганимиз билан боғлиқдир. Расмий турнирлар ушбу ёш иқтидор эгасининг ўзини кўрсатиши учун асқотар, балки...
- Пайе ҳақида нима дейсиз?
- Димитри жамоанинг турнирдаги тақдирини ҳал эта олишга қодир футболчилардан бири. Замонавий футболда жарима зарбаларининг ўрни беқиёс - Пайе уларни сифатли амалга оширади. Қолаверса, бошқа вазиятларда ҳам тўп билан ажойиб тарзда муомала қилади. У Франция умид боғлаган футболчилардан бири.
- Персонал етакчи сифатида кимни кўрсата оласиз?
- «Лестер» вакили - Кантени. Уни Францияда қанчалик яхши кўришларини тасаввур қилолмайсиз. Жамоа учун қилаётган ишлари учун Н`голони қўлларида кўтариб юришга тайёрлар.
- Сизнингча, қайси жамоалар турнир фаворитлари ҳисобланишади?
- Испания, Италия ва Германия. Қачонлардир Гари Линекер немисларнинг ҳамиша ғолиб чиқишлари ҳақида фикр билдирганди. Шунингдек, Англияни ҳам унутмаслик керак, уларда яхши ўйинчилар кўп. Менга Жейми Варди ёқади. У «Арсенал»га ўтади, деган умиддаман. Арсен Венгер ушбу ҳужумчи билан шартнома имзолаш орқали жамоага жанговар руҳ кириб келиши мумкинлигини яхши билади. Варди - мисоли гол машинаси. Ҳамма керакли нарсаларни ўзлаштирган: тезлик, ғалаба иштиёқи. Аммо француз ва собиқ ярим ҳимоячи эканлигимни инобатга олиб, Венгерга Кантени сотиб олишни маслаҳат берган бўлардим. Канте ва Варди бор жойда ҳақиқий жамоа вужудга келади.
- Жаҳон чемпиони сифатида ҳамюртларингизга қандай тилак билдирасиз?
- Ҳозирги Франция термаси биз каби ўз уйида ўтаётган турнирда муваффақият қозонсин. Ҳар бир авлод ўз номини тарих зарварақларига битиши лозим. Улкан муваффақиятлар пайтидаги қувонч бутун умрга татийди. Бундай паллаларда одамлар сени шунчаки футболчи сифатида қабул қилишмайди. Уларнинг кўз ўнгида француз миллатининг идеал вакили, мамлакат фахри сифатида намоён бўласан. Бу ерда гап энди футбол эмас, бошқа каттароқ нарса ҳақида кетяпти. Бундай имконият Франция термасининг ҳозирги таркибидан ўрин эгаллаганларда ҳам мавжуд.
Football.ua - Ў.УМАРОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
