дейди Олимпиада кумуш медали совриндори Бектемир Мелиқўзиевнинг отаси Рўзматжон Сулаймонов
Рио-де-Жанейро шаҳрида бўлиб ўтган XXXI ёзги Олимпия ўйинларини бутун халқимиз ҳаяжон билан кузатиб борди. Гарчи масофа жуда узоқ бўлса-да, юртимиз спорт делегациясини руҳан қўллаб-қувватлаб турди. Спортчиларимизга балли, тўрт йилликнинг энг нуфузли мусобақасида юксак натижаларни қайд этиб, халқимиз ишончини оқлади, Ўзбекистон ёшлари ҳеч кимдан кам эмаслиги ва ҳеч қачон кам бўлмаслигини яна бир бор бутун дунёга кенг намоён этди.
Бокс бўйича кумуш медални қўлга киритган Бектемир Мелиқўзиевнинг ғалабаси ҳам барчамизни чексиз қувонтирмоқда.
Ҳар гал истеъдодли ёшларимизнинг халқаро спорт мусобақаларида эришган ғалабалари шарафига мадҳиямиз янграб, байроғимиз баланд кўтарилганда беихтиёр тўлқинланиб кетамиз, қалбимиз фахр-ифтихорга тўлади.Бундай лаҳзаларда туюладиган қувончу ғурурни бошқа ҳеч қаердан тополмайсиз. Унинг аҳамияти беқиёс. Ватанимиз шуҳратини дунёга ёйишга хизмат қилаётган ушбу муваффақиятлар замирида Президентимиз раҳнамолигида жисмоний тарбия ва спортни оммавийлаштириш, айниқса, болалар спортини ривожлантиришга қаратилаётган алоҳида эътибор мужассам.
Бугун нафақат шаҳар ва туманлар марказида, балки чекка ва тоғли қишлоқларда қад ростлаган замонавий спорт иншоотларида фарзандларимиз ўзлари қизиққан спорт тури билан мунтазам шуғулланиши, соғлом, кучли, мард ва жасур бўлиб улғайиши учун барча шароит муҳайё.
Юртимизда спортнинг кўплаб турлари қатори бокс ҳам жадал ривожланмоқда. Ушбу спорт тури бўйича ҳар йили янги-янги номлар кашф этилмоқда, абжирлиги, кучи ва иродаси билан жаҳон аҳлини ҳайратга солмоқда. Ана шундай ёшлардан бири Бектемир Мелиқўзиевдир.
Бектемир 1996 йили Фарғона вилоятининг Фурқат туманида туғилган. Оиладаги муҳит унда болалигидан спортга қизиқиш уйғотди, 10 ёшидан тажрибали мураббий Маъруф Аҳмедовдан бокс сирларини ўргана бошлади.
Шаҳар, вилоят ва мамлакат миқёсидаги мусобақаларда маҳорат оширган боксчи халқаро майдондаги илк ғалабасига 2012 йили Озарбайжонда эришди. Сўнгра Сербия, Таиланд ва Россияда ўтказилган халқаро мусобақаларда совриндорлар сафидан жой олди.
2014 йили Таиландда ўтказилган бокс бўйича ўсмирлар ўртасидаги Осиё чемпионатида ва Болгарияда бўлиб ўтган жаҳон чемпионатида олтин медални қўлга киритди. Наманган вилояти мезбонлик қилган «Баркамол авлод – 2014» спорт ўйинларида ғолиб бўлди. Бу мусобақалар Бектемирни Хитойнинг Нанкин шаҳри мезбонлик қилган II ўсмирлар Олимпиадасига пухта тайёрланиши ва унда ғалаба қозонишида муҳим аҳамият касб этди.
Кейинчалик катталар ўртасидаги Осиё чемпионатида олтин медални қўлга киритди. Қатарда ўтказилган жаҳон чемпионатида кумуш медалга сазовор бўлиб, XXXI ёзги Олимпия ўйинлари йўлланмасини олди. Албатта, бу ютуқлар осонликча қўлга киритилгани йўқ. Тинимсиз машғулотлар, мураббийлар ўгитлари, энг муҳими, яратилган шароит, халқимиз ва Президентимиз ишончи ҳал қилувчи роль ўйнади.
Бутун Олимпиада давомида Фурқат тумани Шойимбек қишлоғидаги Рўзматжон Сулаймонов хонадониқариндош-уруғлар, маҳалладошлар билан гавжум бўлди. Бектемирнинг финалга қадар кечган баҳслари – австралиялик Даниэль Жейсон Льюис, ҳиндистонлик Кришан Викаш, мексикалик Мисаэль Узиель Родригезга қарши барча жангларини шу хонадонда жам бўлиб томоша қилди. Уйида шундай ҳолат эканини ҳар куни телефон орқали билиб турган Бектемир бундан руҳий қувват олди, енгилишга ҳаққи йўқлиги, уни бутун Ўзбекистон кузатаётганини ҳис этди. Ўзбек ўғлонининг ҳар бир ҳаракатини барча ҳаяжон билан кузатиб борди. Бектемирнинг ўзига хос услубини кўрган жаҳон аҳли ҳам моҳир чарм қўлпоқ устасига тан берди. Бокс бўйича вазни 75 килограммгача бўлган спортчилар баҳсида Ўзбекистон спорт делегацияси ҳисобига навбатдаги кумуш медални келтирди.
Рио-де-Жанейро Олимпиадасида кумуш медаль соҳиби бўлган Бектемирни қутлаш учун шу куни унинг хонадонига яна юзлаб одамлар келди. Онаси Наврўза опанинг қувончи чексиз. Шундай ўғлонни тарбиялаган ота-онасига миннатдорлик билдирилди.
– Ўғлим эришаётган ғалабалар Президентимиз раҳнамолигида ёшларнинг спорт билан шуғулланиши учун яратиб берилаётган кенг шароит ва имкониятлар самарасидир, – дейди отаси Рўзматжон Сулаймонов. – Ёшлигимда футболга қизиқардим, армон бўлиб қолди. Ҳозиргидай шароит, имконият қайда, дейсиз?! Мен етолмаган орзуларга фарзандларим эришаётганини кўриб, армонлар ҳам эсимдан чиқди. Ўғлимнинг Рио-де-Жанейро шаҳрида бўлиб ўтган XXXI ёзги Олимпия ўйинларидаги ғалабаси юртимизда спортчиларга бўлган юксак эътиборнинг амалдаги ифодасидир. Давлатимиз раҳбарининг катта ишончи ўғлимга куч-ғайрат бағишлади. Бундай эътибор учун Юртбошимиздан миннатдормиз.
Б.Мелиқўзиевнинг Олимпиадада қўлга киритган кумуш медали Ватанимиз мустақиллигининг 25 йиллик байрамига муносиб туҳфа бўлди.
Айни кунларда юртимизнинг барча жойларида байрам шукуҳи кезмоқда. “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида нишонланаётган мустақиллигимизнинг 25 йиллик айёми арафасида спортчиларимиз қўлга киритган ютуқлар барчамизга фахр-ифтихор бағишламоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
